परमेश्वरन सत्य वचन
गलातिया 5
मसीह मे स्वतंत्रता
मसीह स्वतंत्रन करता हामुक स्वतंत्र करला छे; अळते: ओकामा स्थिर रवु, आरू दासत्वन जुवड़ो मा पछा नी जुपे। देखु, हाव पौलुस तुमूक कयतु छे कि यदि खतना करावसे, ते मसीह से तुमूक काजे काहय लाभ नी होयसे। पछु भी हाव हर एक खतना करनेवावा काजे जताए देतु छे कि ओका सी सब व्यवस्था माननी पड़से। तुमू जा व्यवस्थान द्वारा न्यायी ठहराने चाहता छे, मसीह रईन अलग आरू फोकटन दया रईन पड़ गया छे। काहकि आत्मान कारण हामु विश्वास रईन, आश होई न्यायीपनन वाट जोहता छे। मसीह ईशु मा नी खतना आरू नी खतनारहित काहय कामोन छे, पुन केवल विश्वास, जु मोंग न द्वारा शक्ति नाकतु छे। तुमू ते भली–भाति दौड़ता रोवता हुता। हिमी कुण तुमूक रूक दिदा कि सच्चाई काजे नी मानु। ओसली सीख तुमूक बुलावनेवावा रईन नी। 1थुड़ो सो खमीर सब कुसनीन पिठाक खमीर कर नाकतो छे। हाव पोरबु पर तुमरा विषय मा विश्वास राखतु छे कि तुमरू दिसरू विचार नी होयसे; पुन जु तुमूक घाबराय देतु छे, त्यो कोय काँ नी होय दण्ड जड़से। पुन हे भाईस्यो, यदि आज भी जोसो कि काहय मानसे समझता छे, खतना करनो महत्त्वपुर्ण होय, क यो प्रचार करतु छे, ते मखे आज तक सतावता काँ जाय रया छे? तव ते मसीहान कुरूसन कारण जनम हुयो सब मारी बाधा समाप्त होय जानु जुवे! भलो होयतो कि जो तुमूक डावाडोल काजे दुःखी करता छे, चाँ आपसा अंग काट देता छे। हे भाईस्यो, तुमू स्वतंत्र होयनेन करता बुलाया गया छे; पुन ओसो नी हुयो कि यी स्वतंत्रता शारीरिक कामोंन करता मेखे बने, वरना मोंग से एक दिसरान दास बनु। काहकि सब व्यवस्था इन एकुज वात मा पुरी होय जाती छे, “तु आपसा पड़ोसी साथे आपने समान मोंग राख।” पर यदि तुमूक एक दिसरा काजे दात करीन काटे आरू फाड़ खाता से, ते चोकचौळीया रोवजु कि एक दिसरान सच्चाईानाश नी कर दे।
चुखलो आत्मा द्वारा संचालन
पर हाव कयतु छे, आत्मान लारे चालु ते तुमू शरीरन लालसा काहनी रीति रईन पूरी नी करसे। 2काहकि शरीर आत्मान विरोध मा आरू शरीरन विरोध मा लालसा करता छे, आरू या एक दिसरान विरोधी छे, अतरान करीन जो तुमू करनो चाहता छे चाँ नी कर सके। आरू यदि तुमू आत्मान चाले चालता से ते व्यवस्थान हको तळे नी रोवे। शरीरन काम ते प्रकट छे, मतलब् व्यभिचार, भोगविलास, लुचपन, मुर्तिपूजक, टोना, बैर, झगड़ु, किचवन, रीस, विरोध, फूट, अन्याय, मतवालापन, लीलाक्रीड़ा आरू इनाक जोसु आरू–आरू काम छे, इनाक विषय मा हाव तुमू पेहल कय देतु छे जोसो पेहल कय भी त्योक्यु छे, कि ओसा ओसा काम करनेवाला यहोवा–भगवानन राज्यन वारीस नी रोवे। पर आत्मान फोव मोंग, खुशी, शांती, धीरज, किरपा, भलाई, विश्वास, नम्रता, आरू संयम छे; ओसा ओसा कामोंन विरोध मा कोय भी व्यवस्था नी। आरू जु मसीह ईशुन छे, ओको शरीरन ओको लालसा आरू लालोच समेत कुरूस पर चढ़ाव दिदा छे। यदि हामु आत्मान द्वारा जीवता छे, ते आत्मान लारे चालु भी। हामु डाहळाय होईन नी एक दिसरा काजे छुड़सु, आरू नी एक दिसरा डाह करू।
Source notes (2)
- Cross-reference 1 कुरन्थियो 5:6
- Cross-reference रोमियो 7:15-23
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.