परमेश्वरन सत्य वचन
योहेजकेल 39
गोग राजान हारनो
ओळी हे मानसोन ओवलियाद, गोग राजान विरुद भोगवानो वोगे गोथी वात कोरीन कोव, हे गोग, हे रोश, मेशेक आरु तुबल सोहरोन डाहला, परमेश्वर योहोवा ओसु कोवे: हांव तारे विरुद छे। हांव तुसेक धोरिस आरु पोछु लावीस। आरु हांव तुसेक बोखेवरे गोथु नांबे नांबे देसोम सी चोड़ावीन ली आवीस, आरु इसराएलोन बोयड़ा पोर पुगाड़ीस। होंया हांव तारी धोंदली तारा डाखरीया हातोम सी पाड़ीस, आरु तारा बिलखाक तारा जेवड़ीया हातोम सी पाड़ीस। तु, तारा आखा सिपायड़ान टुळाक आरु आपसा पुठी आखी जाती भेळ इसराएलोन बोयड़ा पर मार नाख्यु जायीस; हांव तुसेक भाति भातिन मास खान्या चिल्ला आरु जोंगली जोनवारीयान खानो कोर दिस। तु खेतोम पोड़ीस, काहाकी हांव तुसेक ओसु कोवलु छे, परमेश्वर योहोवान यो बुल छे। हांव मागोग सोहोर मा आरु हेनु मानसोन, जे दोरियान कातोर पोर वारला रोवे, विरुद् आगठो मुकलीस। तोत्यार होये जानसे की हांव योहोवा छे।
हांव आपसा मानसोन इसराएलोन इचमा आपसो नाव कोरीस; आरु आपसा चुखलो नाव ओळी विटोळ नी होयने दोम; तोत्यार देस देसोन मानसे वी जान लेसे की हांव योहोवा, इसराएलोन चुखलु छे।
देखु, यो होयनेवाळो छे, यो विनभुरसियो होयसे; हांव परमेश्वर योहोवान यो बुल छे। यो चोंत दाहड़ो छे तेरे वाराम हांव कोवलो छे। तोत्यार इसराएलोन सोहोरोम रोवनीया निकोळसे आरु होतियार मा आगठो लागाड़ीन धोपाड़ देसे, ढाळ, आरु फोरी, धोंदली, आरु बिलखा, लाकुड़, बोर्छा, आखाक होये सात साल लोगुन धोपाड़ता रोवसे। ओस कोरीन होये खोयड़ाम लाकड़ान नी चुटसे, नी जोंगोल काटसे, काहाकी होये होतियारुत काजे धोपाडीया कोरसे, होये आपसा लुटनेवाळाक लुटसे, आरु आपसा हापेकेनेवाळाक हापेकसे, परमेश्वर योहोवान यो बुल छे।
गोग राजा काजे गाड़नो
तेने टेमे हांव गोग राजा काजे इसराएलोन देसोम बिड़ो आपीस, होतो तालोन उगेनले ओख्ये होयसे; होये आवने जानेवाळान घाटी कोवायसे, आरु आवने जानेवाळाक होंया रुकायनो पोड़से; होंया आखी गोड़दी भेळ गोग राजा काजे गाड़से आरु तीना जागान नाव गोग राजान गोड़दीन घाटी पोड़से। इसराएलोन घोरानो हेनुक सात मोहना लोगुन गाड़तो रोवसे, काहाकी आपसा देसोक चुखो कोरे। इसराएल देसोम आखा रोवन्या हेनुक गाड़से। आरु जिने टेमे मारी मोहिमा होयसे, तेने टेमे हेंदरो वी नाव मोटो होयसे, परमेश्वर योहोवान यो बुल छे। परमेश्वर कोयु, मानसे दाहड़कीयाक, हेनु मोरला सिपायड़ाक गाड़ने जुगु आखे टेमे दाहड़की आपसे। ओस कोरीन होये देसोक चुखो कोरसे। होये दाहाड़किया सात मोहना लोगुन काम कोरसे। होये धोड़ोक हेरता जायीन च्यारु मेर जासे। होये दाहाड़कीया च्यारु मेर हेरता फिरसे। कोदाम हेनुम कुदु मानुस एक हाड़की देखसे ती होयो हेरे जुळ एक सोहलानी बोनाय देसे। सोहलानी चां लोगुन बोनली रोवसे जोत्यार लोगुन बीड़ो खुंदने वाळा आवे नी आरु गोगोन सिपायड़ान घाटी मा तेनुत हाड़का काजे गाड़े नी। ओस कोरीन आखा देसोक चुखो कोरसे। हेनु मोरला मानसोन सोहोरोन होमोना नाव कोवायो।
ओळी हे मानसोन ओवलियाद, परमेश्वर योहोवा ओसु कोवे: भाति भातिन आखा चिल्ला आरु आखा जोंगली ढुरोक हुकुम आप, एकठा होय जावु, मार इना मोटला बादाम जो हांव तुमरे जुगु इसराएलोन बोयड़ा पोर कोरो, होरीक जागे सी एकठा होयु कि तुमु मास खावु आरु लुहुय पीयु। तुमु ताकोतवाळा सिपायड़ान डिलोन मास खासु। तुमु कोळीन डाहलान लुहुय पीसु। होये बासान देसोन गाडरा, मेमना, बुकड़ा, आरु मातला बुयल्योन तोसा होसे। तुमु जोतरो चाहाय, तोतरी चोरबी खाय सोकतेला आरु तुमु लुहुय तोत्यार लोगुन पीय सोकतेला जोत्यार लोगुन तुमरो पेट नी भोराये। तुमु मारी बादा सी खासु आर पीसु जो हांव तुमरे जुगु मारलु छे। तुमु मारी मेज पोर घुल्ला, रोथ, ताकोतवाळा सिपायड़ा आरु आखे भातीन लोड़ानीया मानसे आफरी जासु, परमेश्वरन यो बुल छे।
इसराएल काजे पोछो बोनावनो
हांव देस देसोन इचमा आपसी मोहिमा देखाड़ीस, आरु जाति जातिन आखा मानसे मार नियावोन काम जो हांव कोरीस, आरु मार हात जे हेनु पोर पोड़से, देख लेसे। तेने दाहड़े सी ओगा इसराएलोन घोरानो जान लेसे की योहोवा हामरो परमेश्वर छे। देस देसोन मानसे जान लेसे की इसराएलोन घोरानो आपसा ओधोरमोन कोरता बांदवाय मा गोयलो होतो; काहाकी होये मारे सी ओसु धुकु कोर्या कि हांव आपसो मुय हेनुसी वी फिरवी लेदु आरु हेनुक हेंदरा वेरीन हातोम कोर देदु, आरु होये आखा तोलवार सी मार्या गोया। हांव हेंदरा भुंनला आरु पापोन ओनसारे हेनुसी वेवहार कोरीन हेनुसी आपसो मुय फेरवी लेदो।
ओतरान कोरीन परमेश्वर योहोवा ओसु कोवे: हेमी हांव याकुब काजे बांदवाय सी पोछु लावीस, आरु इसराएलोन आखा घोराना पोर गीन कोरीस; आरु आपसो चुखलो नावो जुगु मेसे घाड़ाय होयसे। तोत्यार हेन आखा धुकान कोरता जे होये मारे विरुद् कोर्या होये लाजवायसे; आरु आपसा देस मा नी बिहये; आरु कुदु हेनुक नी बिहाड़े। जोत्यार हांव हेनुक देस देसोन इचमा सी पोछु लावीस, आरु हेनु वेरीन देसोम सी एकठा कोरीस, तोत्यार बेसकी जातिन निंगाम हेंदरे लारे चुखलो कोवायीस। तोत्यार होये जान लेसे की योहोवा हामरो परमेश्वर छे, काहाकी हांव हेनुक देस देसोम बांदवाय कोरीन ओळी हेंदरा आपसा देसोम एकठा कोरलु छे। हांव हेनुम गोथु कुदाक ओळी पारका देसोम नी छुड़ो, आरु हेनुम सी आपसो मुय ओळी कोदी नी फेरवो, काहाकी हांव इसराएलोन घोराना पोर आपसा जीव काजे उण्डेल्लु छे, परमेश्वर योहोवान यो बुल छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.