परमेश्वरन सत्य वचन
योहेजकेल 37
सुकला हाड़कान घाटी
योहोवान ताकोत मार पोर उतरी, आरु होयो मारेम आपसो जीव सोमाड़ीन खोयड़े ली गोयो आरु मेसे घाटीन इचमा उबो कोर देदो; होयी घाटी हाड़का सी भोरायली होती। तोत्यार होयो मेसेक हेंदरे च्यारु मेर फिरयो, आरु घाटिन नेचा बेसका हाड़का होता आरु चे बेसका सुकला होता। तोत्यार होयो मारे सी पुछ्यो, हे मानसोन ओवलियाद, काय ये हाड़का जीवता होय सोके?
हांव कोयो, हे परमेश्वर योहोवा, तुत जाने।
तोत्यार होयो मारेसी कोयो, एनु हाड़का सी मारे जुगु वात कोर। हेनु हाड़का सी कोव, सुकला हाड़का योहोवान बुल सोमवु! परमेश्वर योहोवा तुमु हाड़का सी ओसु कोवे: देखु, हांव तुमरेम जीव आवने दिस, आरु तुमु जिवता होय जासु! हांव तुमरे उपोर नोस आरु मास चोड़ावीस आरु हांव तुमुक चामड़े कोरीन ढांक दीस। तोत्यार हांव तुमरेम जिवोन दोम भोरीस आरु तुमु ओळी जिवता होय जासु। तोत्यार तुमु जान लेसु की हांव योहोवा छे।
हांव योहोवा जुगु हेनु हाड़का सी तोसोत वात कोर्यो की जोसो होयो कोयो। हांव जोत्यार भोगवानो वोगे गोथी वात कोय रोयु होतु तोत्यारुत हांव घोन जुरे ओवाज सोमळ्यु। हाड़का खोकड़ायने लाग्या आरु हाड़का हाड़का जुड़ाय गोया। होंया मार डुळा ओगोळ नोसे मांस आरु होये उपोर चामड़ा सी ढाकाय गोयो पुन हेरेम जीन नी होतो।
तोत्यार होयो मारे सी कोयो, हे मानसोन ओवलियाद, दोम सी मारे जुगु कोव। मानसोन पुर्या, मारे जुगु दोम सी वात कोर। दोम सी कोव परमेश्वर योहोवा ओसु कोवे: च्यारु मेरुन आवीन एनु मोरलाम सोमायजा की ये जीवता होय जाय।
ओस कोरीन हांव योहोवा जुगु दोम सी वात कोर्यो जोसो होयो कोयो आरु धोड़ोम दोम आय गोयो। होये जिवता होया आरु उबा होय गोया। होंया बेसका मानसे होता, होये एक मोटी गोड़दी होय गोय।
ओळी होयो मारेसी कोयो, हे मानसोन ओवलियाद, ये हाड़का इसराएलोन घोरानान तोसा छे। होये कोवे हामरा हाड़का सुक गोया, आरु हामरी होर जाती रोवी; हामु पुरे रीते नास होय गोयला छे। कोरीन मारे जुगु वात कोर, हेनुसी कोव, परमेश्वर योहोवा ओसु कोवे; मारे मानसे, हांव तुमरा बिड़ाक उगाड़ीस आरु तुमुक बिड़ाम गोथु खोयड़े लावीस, तोत्यार हांव तुमुक इसराएलोन जागा पोर लावीस। मार मानसे, हांव तुमरा बिड़ा उगाड़ीस आरु तुमरा बिड़ाम गोथु खोयड़े लावीस। तोत्यार तुमु जानसु की हांव योहोवा छे। हांव आपसो जीव तुमरेम नाखीस आरु तुमु ओळी जिवता होय जासु। तोत्यार तुमुक हांव तुमरा देसोम पोछु लावीस। तोत्यार तुमु जान लेसु की हांव योहोवा छे। तुमु जानसु की हांव यी वात कोयो आरु हेनुक पुरो कोरायो, योहोवान यो बुल छे।
योहुदान आरु इसराएलोन एकुत देस
ओळी योहोवान यो बुल मारे यां पुग्यो: हे मानसोन ओवलियाद, एक लाकुड़ लिन हेना पोर लिख, योहुदान आरु हेरा साथी इसराएलियान; तोत्यार दिसरी लाकुड़ चुट हेरे पोर लिख, युसुफोन मोतलोब एपरेमोन, आरु हेरा साथी इसराएलियान लाकुड़। तोत्यार दुयु लाकड़ीयाक एकठा जुड़ दे। तारा हातोम होये एक लाकुड़ बोन जाय। जोत्यार तारा मानसे तारे सी पुछसे, काय तु हामुक नी देखाड़िस की एना सी तारो काय मोतलोब छे? तोत्यार हेनुसी कोवजी, परमेश्वर योहोवा ओसु कोवे, हांव युसुफोन लाकुड़ जो एपरेमोन हातोम छे, आरु इसराएलोन लाकुड़ जो गोत्र हेरा साथीन हातोम छे। तोत्यार हांव हेनी लाकुड़ काजे योहुदान लाकुड़ पुठी मेकिस आरु एनुक एक लाकुड़ बोनावीस। मार हातोम होयी एक लाकुड़ होयसे।
जेनु लाकड़िया पोर तु ओसु लिखीस, होये हेंदरे ओगोळ तारा हातोम रोवे। तोत्यार तु हेनु मानसो सी कोव, परमेश्वर योहोवा ओसु कोवे: देखु, हांव इसराएलियाक हेनु देसोम गोथु लीन जेनुम होये जात रोया, च्यारु मेर गोथा एकठा कोरीस; आरु हेंदरा आपसा देस मा पुगाड़ीस। हांव हेनुक इसराएलोन बोयड़ान देसोम एक जाति बोनावीस। हेनु आखान एकुत राजा होयसे। होये दुय जाती नी बोनला रोवसे आरु नी दुय मुलकोम कोदी वाटायसे। होये आपसा देव मुरिया आरु भुंनला कामोन आरु आपसा काहने भातीन पापोन लारे आपसाक विटोळ नी कोरसे; पुन हांव हेनुक हेनु आखी वोसतिम गोथा, जां होये पाप कोरता होता। निकाळीन चुखो कोरीस, आरु होये मार मानसे होयसे, आरु हांव हेंदरो परमेश्वर होयिस। मारो दास दाऊद हेंदरो राजा होयसे; आरु हेनु आखान एकुत गुवाळ्यो होयसे। होये मार कायदा पोर चालसे आरु मार नेम काजे मानीन हेंदरे ओनसारे चालसे। होये हेना देसोम रोवसे जेनाक हांव आपसा दास याकुब काजे आपलो होतो; आरु जिनाक हांव तुमर डाहडा रोवता होता, हेनात मा होये आरु हेंदरा पुर्या-पारी जोलोम बोसला रोवसे; आरु मारो दास दाऊद जोलोम हेंदरो मुखी रोवसे। हांव हेंदरे पुठी शांतीन वायदु बांदीस; होयो जोलोमको वायदो कोवायसे; आरु हांव हेनुक जागु आपीन गिनाय मा वोदाड़ीस, आरु हेंदरे इचमा आपसो चुखलो जागो जोलोम बोनावलो राखीस। मारो चुखलो तोम्बु होंया हेंदरे इचमा रोवसे। हाव, हांव हेंदरो परमेश्वर आरु होये मार मानसे होयसे। जोत्यार मार चुखला जागान हेंदरे इचमा जोलोम जुगु रोवसे, तोत्यार आखी जाती जान लेसे की हांव योहोवा इसराएलोक चुखो कोरनेवाळो छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.