परमेश्वरन सत्य वचन
योहेजकेल 34
इसराएलोन गुवाया
योहोवान यो बुल मारे यां पुग्यो: हे मानसोन ओवलियाद, इसराएलोन गुवाळ्यान विरुद् भोगवानो वोगे गोथी वात कोरीन हेनु गुवाळ्या काजे कोव, परमेश्वर योहोवा ओसु कोवे: हाय इसराएलोन गुवाळ्या पोर जे आपसो आपसो पेट भोरे! काय गुवाळ्या काजे गाडरा-बुकड़ान पेट नी भोरनो जुवे? तुमु लोगहन चोरबी खावु, गाडरान झोटान छिंदरा पेहरु आरु मोटला मोटला ढुरोक काटु; पुन गाडरा-बुकड़ाक तुमु नी चारता। तुमु ते पातेळ्ळाक माता नी बोनाया। नी मांदला काजे आरगा कोरला, नी घायेलोन घाव काजे बांद्या, नी नीकावला काजे पोछा लाया, नी खुवायला काजे हेर्या, पुन तुमु ताकोत वावा आरु जोबोरजोस्ती होक चालाड़्या। होये गुवाळ्या नी होयने सी रिवन्या तिवन्या होय गोय; आरु आखा जोंगोलोन जोनवारीया खानो बोन गोया। मार गाडरा रिवन्या तिवन्या होय गोया। होये बोयड़ा पोर उचा उचा बोयड़ा पोर भुलवाय रोया। मार गाडरा कोळीन आखा देसोम रिवन्या तिवन्या होय गोया। हेनुक हेर-खोबोर लेनेवाळो, हेनुक हेरीन लावनेवाळो कुदु गुवाळ्यो नी होय।
ओतरान कोरीन, हे गुवाळ्या, योहोवान बुल सोमळु: परमेश्वर योहोवान यो बुल छे, मारी जिवायीन आन, मार गाडरा-बुकड़ा जे लुटाय गोया, आरु मार गाडरा-बुकड़ा जे गुवाळ्यो नी होयने सी आखा जोंगोलोन जोनवारीया खानो होय गोय; आरु ओतरान कोरीन कि मार गुवाळ्या मार गाडरा बुकड़ान फोम नी कोर्यो, आरु मार गाडरा बुकड़ान पेट नी, आपसो आपसोत पेट भोर्या; ओस कोरीन हे गुवाळ्या, योहोवान बुल सोमळु, परमेश्वर योहोवा ओसु कोवे: देखु, हांव गुवाळ्यान विरुद् छे; आरु हांव हेनुसी आपसा गाडरा-बुकड़ान हिसाब लीस, आरु हेनुक ओळी गाडराक चारावने नी आपो; होये ओळी आपसो आपसो पेट वी नी भोराये। हांव आपसा गाडरा-बुकड़ा हेंदरा मुयो सी छुड़ावीस की ओळी हेंदरो खानो नी होयसे।
वारलो गुवाळ्यो
काहाकी परमेश्वर योहोवा ओसु कोवे: देखु, हांव आपसुत आपसा गाडरा-बुकड़ान फोम राखीस, आरु हेनुक हेरीस। जोसा गुवाळ्या आपसा गाडरा-बुकड़ाम गोथा भुलवायला काजे ओळी आपसा टुवाम हेरे, तोसोत हांव वी आपसा गाडरा-बुकड़ा काजे हेरीस; हांव हेनुक हेनु आखा जागाम सी निकाळ लावीस, जां जां होये वादळाम आरु बेसका आंदारान दाहड़ाम रिवन्या तिवन्या होय गोया होय। हांव हेनुक देस देसोन मानसोम गोथु निकाळ लावीस, आरु देस देस सी एकठा कोरीस, आरु हेनुक आपसा जागाम ली आवीस; आरु इसराएलोन बोयड़ा पोर आरु खुदराम आरु हेना देसोन आखा बोसला जागाम चारावीस। हांव हेनु खोड़ोव वाळा खेतोम ली जायीस। होये इसराएलोन बोयड़ान उचला जागा पोर जासे। होंया होये वाराला जागाम सुवसे आरु खोड़ोव चोरसे। होये इसराएलोन बोयड़ा पोर वारु वारु खोड़ोव वाळा जागाम चोरसे।
हांव आपसुत आपसा गाडरा-बुकड़ान गुवाळ्यु रोविस, आरु हांव आपसुत हेनुक बोठाड़ीस, परमेश्वर योहोवान यो बुल छे।
हांव खुवायलाक हेरीस, हांव तेनु गाडराक पोछु लावीस जे खोव्वाय गोय। हांव हेनु गाडरान पाटू बांदिस जेंदरे झोट लाग गोय। हांव कोमजुर गाडराक ताकोतवाळा बोनावीस। पुन हांव हेनु मोटला आरु ताकोतवाळा गुवाळ्या काजे नास कोर दिस। हांव हेंदरी गुवाळीन ओनसारे नियाव कोरीस।
हे मार टुळा, तुमरे सी परमेश्वर यहोव ओसु कोवे: देखु, हांव गाडरा-गाडरान इचमा आरु मेढ़ोन आरु बुकड़ान इचमा नियाव कोरो। तुमु वाराला जागा पोर उगलो खोड़ोव खाय सोकु तुमु तेना खोड़ोव काजे काहा कुसनु जेनाक दिसरा गाडरा खाने चाहाये। तुमु आफरीन चुखलो पानी पी सोकतेला। तुमु तेना पानीक हालवीन भुंडो कोरु, जेनाक दिसरा गाडरा पीने चाहाय रोवे। काय मारा गाडरा-बुकड़ाक तुमरे पायो सी रोंदवायलाक चारजु, आरु तुमरा पायो सी गोंदयला पीनो पोड़से?
ओस कोरीन परमेश्वर योहोवा हेनुसी ओसु कोवे: देखु, हांव मार मातला आरु हारला गाडरा-बुकड़ा पुठी नियाव कोरीस। तुमु तोमान गाडराक पांजर आरु सिंगडे कोरीन दी दीन ढासाड़ देवु, आरु होये यां-वां खोव्वाय जाय। ओस कोरीन हांव आपसा गाडरा-बुकड़ाक छुड़ावीस, आरु होये ओळी नी लुटसे, आरु हांव गाडरा-गाडरान आरु बुकड़ा-बुकड़ान इचमा नियाव कोरीस। हांव हेनु पोर ओसो एक गुवाळ्यो मेकीस जो हेंदरी गुळावी कोरसे, होयो मारो दास दाऊद होयसे, होयो हेनुक चारसे, आरु होयो हेंदरो गुवाळ्यो होयसे। हांव योहोवा, हेंदरो परमेश्वर कोवायीस, आरु मारो दास दाऊद हेंदरे इचमा डाहलो होयसे, हांव योहोवा ओसु कोवलु छे।
हांव हेंदरे पुठी शांतीन वायदु बांदीस, आरु जोगली जिवोक देसोम नी रोवने दोम; होये जोंगोल मा विगुर बिहये रोवसे, आरु जोंगोल मा सुवसे। हांव हेनुक आरु आपसा बोयड़ान आड़े धोड़ेन जागाक बोरकोतोन कारण बोनावीस; आरु वादळान पानीक हांव वारु टेम पोर पाड़ीस; आरु होये बोरकोतोन पानी पोड़से। खेतोम उगने वाळा झाड़ आपसा फोव आपसे। धोरती आपसी मेर आपसे। गाडरा आपसा देसोम आरेगला रोवसे। हांव हेंदरे पोर वावो जुड़ो तुड़ दीस। हांव हेनु मानसोन ताकोत सी वाचाड़ीस जे हेनुक चाखरीया बोनाया। तोत्यार होये जान लेसे की हांव योहोवा छे। होये कोळीन देसोन शिकार नी बोनसे, आरु जोंगली जोनवार हेनुक मारीन नी खासे। पुन हेमी होये आरेगला रोवसे। कुदु हेनुक बिहाड़ीया नी कोरे। हांव हेनुक आपसो खास मानसो जुगु पीयोत खेत उपजाड़ीस, आरु होये देसोम ओळी भुकला नी मोरे, आरु नी देस देसोन मानसे ओळी हेंदरा वायकेड़ा नी उड़ावे। होये जानसे की हांव परमेश्वर योहोवा, हेंदरे पुठी छे, आरु होये जे इसराएलोन घोरानो छे, होये मार मानसे छे, हांव परमेश्वर योहोवान यो बुल छे।
तुमु ते मार गाडरा-बुकड़ा, मार चारवायान गाडरा-बुकड़ा छे, तुमु ते मानसे छे, आरु हांव तुमरो परमेश्वर छे, परमेश्वर योहोवान यो बुल छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.