परमेश्वरन सत्य वचन
योहेजकेल 25
ओम्नोनोन विरुद् भोगवानो वोगे गोथी वात
पोरबु योहोवान यो बुल मारे यां पुग्यो: हे मानसोन ओवलियाद, ओम्मोनियो भेनी मुय कोरीन हेंदरे वाराम भोगवानो वोगे गोथी वात कोर। हेनुसी कोव, हे ओम्मोनियो, परमेश्वर योहोवान यो बुल सोमवु, परमेश्वर योहोवा ओसु कोवे की तुमु जे मारा चुखला जागान वाराम जोत्यार होयो विटोळ कोरला, आरु इसराएली देसोन वाराम जोत्यार होयो उजड़ी गोयलो, आरु योहुदान घोरानान वाराम जोत्यार होये बांदवाय मा गोया, अहा, अहा! कोया। कोरीन सोमवु, हांव तुमुक उगेवना देसो वावा मानसोन होकोम कोरनेम छे; आरु हुये तुमरे इचमा आपसो पोड़ाव कोरसे आरु आपसा घोरे बोनावसे; हुये तारा फोव खासे आरु तारो दुद पीसे। हांव रोब्बा सोहोर काजे उटड़ान रोवने आरु ओम्मोनियोन देसोक गाडरा बुकड़ाक बोसनेन जागु कोर दीस; तोत्यार तुमु जान लेसु की हांव योहोवा छे। काहकी परमेश्वर योहोवा ओसु कोवे: तुमु जे इसराएल देसोन कारण थापड़्या वाजाड़्या आरु नाच्या, आरु आपसा आखा मोनोक वारु नी लागे ओसा खुश होया, कोरीन, हांव आपसो हात तारे उपोर कोरलो छे; आरु तुसेक राज राजोक लुटीन आप दिस, आरु देस देसोन मानसोम गोथा तुसेक सार दिस; आरु देस देश मा गोथा नास कोर दिस। हांव तारो नास कोर नाखीस; तोत्यार तु जान लीस की हांव योहोवा छे।
मोआबोन विरुद् भोगवानो वोगे गोथी वात
परमेश्वर योहोवा ओसु कोवे: मोआब आरु सेईर कोवे, देखु, योहुदान घोरानो आरु आखा मुलुकोन तोसा होय गोयला छे। ओस कोरीन देख, मोआब देसोन कातरोन सोहोर बेत्यशीमोत, बालमोन, आरु किरयातेम, जे हेना देसोन शिरोमणि छे, हांव हेंदरी वाट उगाड़ीन हेनुक उगेनला देसोन मानसोन होकोम ओसु कोर दीस कि हुये ओम्मोनियो काजे नास कोरे; आरु हांव ओम्मोनियोक यां लोगुन हेंदरा होकोम कोर दिस की जाति जातिन इचमा हेनुक ओळी फोम नी रोवसे। हांव मोआब काजे वि डोन आपीस। तोत्यार होये जान लेसे की हांव योहोवा छे।
एदोमोन विरुद् भोगवानो वोगे गोथी वात
परमेश्वर योहोवा ओसु वी कोवे: एदोम जो योहुदान घोराना सी बोदलु लेदु, आरु हेनुसी बोदलु लिन मोटलु गुनाकु होय गोयलु छे, ओस कोरीन परमेश्वर योहोवा ओसु कोवे, हांव एदोमोन देसोन विरुद् आपसो हात ओगु कोरीन हेरेम गोथा मानसे आरु ढुरे दुयोक सार दीस; आरु तेमान सोहोर गोथा दोदान सोहोर लोगुन हेनुक उजाड़ दिस; आरु हुये तोलवार सी मार्या जासे। हांव आपसा मानसे इसराएलोन लारे एदोम सी आपसो बोदलो लीस; आरु हुये हेना देस मा मारी आरु रीसोन ओनसारे काम कोरसे। तोत्यार हुये मारा बोदलाक जान लेसे, परमेश्वर योहोवान यो बुल छे।
पोलिस्तियान विरुद् भोगवानो वोगे गोथी वात
परमेश्वर योहोवा ओसु कोवे: पोलिस्तीन मोनोम इसराएलोन ओवलियाद जुगु ठेटकान वेरी माने। कोरीन होये वेरीन आरु बोदलान विचार कोरीन इसरालीया पुठी बोदलु लेदा, आरु हेनुक नास कोर देदा। ओस कोरीन परमेश्वर योहोवा ओसु कोवे, सोमोळ, हांव पोलिस्तीयोन विरुद् आपसो हात ओगु कोरनेम छे, आरु कोरेतियाक सार दिस; आरु दोरियान धोड़े वावा वाचलाक नास कोर दिस। हांव हेनुक मोटलो डोन आपीस। रिसो पुठी हांव हेनुसी बोदलु लीस। तोत्यार हेनुक पोतु चालसे की हांव परमेश्वर योहोवा छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.