परमेश्वरन सत्य वचन
योहेजकेल 17
उकाबो आरु गोरुड़ोन ओंगुरोन वेलान वाराम
पोरबु योहोवान यो बुल मारेंचा पुग्यो: हे मानसोन ओवलियाद, इसराएलन घोराना सी यी छुड़ेवनाय काहानी कोव आरु काहानी कोव: पोरबु योहोवा ओसु कोवे; एक नाम्बला पाखड़ावाळो, पाखड़ा सी भोरलो आरु भात भातीन रोंगोन मोटला उकाब चिल्लान लोबानोन जायीन एक वेलावाळान फुनगी चुट लेदो। तोत्यार चो तेनी फुनगीन आखासी उपोरुन पातळी डाळ काजे तुड़ लेदो, आरु चो लेन देन कोरनेवाळा देश मा ली जायीन वेपारीन हाटोम लागाड़्यो। तोत्यार तेना देसोन बिजोक लीन एक पीयोत खोतोम वेर्यो, आरु चो बोंदा धोड़े वाळा जागाम मोजनु झाड़ सारको बीज वेर्यो। चो उगीन नानीस वेलायने वाळा ओंगुरोन वेला होय गोया जेरेसी डाळ्या नेचा वोळने लाग्या, आरु तेरा मुवे तेरे नेचा खोव्वाया, ऐने रीते सी चो ओंगुरोन वेला होईन कनखा फुड़ने आरु पानटा सी भोरायने लाग्यो।
ओळतेन एक आरु नांबला पाखड़ावाळा आरु पाखड़ा सी भोरायला मोटलो उकाब चिल्लो हुतो; आरु त्यो ओंगुरोन वेला उना जागा सी जां त्यो लागाड़लो हुतो, उना दिसरा उकाब भेनी आपसा मुवे खोव्वायने आरु आपसा डाळ्या नेचो कोरने लाग्यो की चो तीनाम पानी वाव्या कोरे। पुन चो ते ओतरा जुगु पीयोत जागाम ने सोवटा पानी धोड़े लागाड़लो हुतो, की पुड़ी निकवे, आरु फोवे, आरु वारु ओंगुरोन डाळ्या बोने।
ओतरान कोरीन तु यो कोव, पोरबु योहोवा ओसु पुछे; काय चे फुले फोळसे? काय चो हेनाक मुवो भेव उखावसे, आरु हेरो फोळन नी झाड़ नाखे की चो आपसा निळवा पानटा भेळ सुख जाय? इनाक मुवो भेव उखावने कोरीन जादा ताकुत आरु सोवटा मानसोन जोरुरोत नी होयेसे। चाहाय चो लागलो वी रोहे, तीवी काय चो फोळसे? जोत्यार तिनाक झाव लागे, ति काय चो खोरान सुक नी जाय? हुयो ते जां उगलो छे तेनी जागा मा सुक जासे।
कोवाड़ान मोतलोब
ओळी पोरबु योहोवान यो बुल मारेनचा पुग्यो: हेमी तु विद्रोही इसराएलोन घोराना सी यो कोव: काय तुमु हेमी वी ऐनी छुड़वनाय काहानी आरु काहानीन नी सोमज्या? सोमळु, ऐरो यो मोतलोब छे: बेबीलोन देसोन राजा योरुसालेम मा आयो। चो योरुसालेमन राजा, आरु ऐरा मोटला आदिकारीक बोन्दी बोनायो, आरु हेनुक आपसा देसोम ली गोयो। तोत्यार राजान घोराना मा गोथु एक मानुस लीन तीनासी आन खावाड़्यु, आरु तिनाक होकोम रोहने कोरी आन खावाड़्यु, आरु देसोन ताकोतवाळा मानसोक ली गुयो ओतरा जुगु ओसु कोर्यु, की इसरायलि राजोन हेरा पायो तोळे दाबायला रोहे, आरु आपसो मुनको उचो नी कोरे तोसे, आरु आनोन पाळोन कोरता रोहे। पुन त्यो बेबीलोनन विरुद लोड़ाय कोर देदो, आरु मिसर देसन आपसा दुतोन मुकल्यो की चो हेरी मोदोत कोरे, आरु हेरा घुल्लाक आरु सोवटा सिपायड़ा मुकले। काय त्यो आपसा लोड़ाय मा जासे? ओसा काम कोरनेवाळा मानसे काय ढासीन आपसो जीव वाचाड़से? जुवार पानी तुड़नेवाळा काय वाच जासे?
मार जीवनोन आन! हांव, पोरबु योहोवा ओसु कोहो, बेबीलोन देसोन राजा हेनाक राजा बोनायो हुतो, आरु जेना देसन राजान बुलोक ओसोत जाने, आरु जेरो जुवारपानी काजे तुड़ला छे, तीनात राजान देसोम चो मोरसे! जोत्यार लोड़ाय मा होजारु मानसे मोरने कोरीन बेबीलोनन राजान सेना सोहोरोन च्यारु मेर राखवाळी कोरसे आरु भितड़ो बादसे, ती मिसर देसोन राजा फिरोनोन ताकोतवाळी आरु मोटली सेना वी योरुसालेमोन राजान मोदोत नी कोर सोकसे। काहकी त्यो जुवारपानी काजो ओसोत जान्यो, आरु वायदाक तुड़्यो; देखु, त्यो बुल आपने पोर वी ओसा ओसा काम कोरलो छे, ओतरान कोरीन त्यो नी वाचसे। पोरबु योहोवा ओसु कोवे: मार जीवोनोन आन, हुयो मारो जुवारपानी काजे ओसोज जान्यो, आरु मार वायदाक तुड़्यो; यो पाप हांव हेरात मुनका पोर नाखिस। हांव आपसी जाळ उना पोर नाखीस आरु त्यो मार फांदा मा फोस जासे; आरु हांव हेनको बेबीलोन मा पुगाड़ीन उना धुकान वातोक उनासी लोड़ावीस, जो हुयो मारे पुठी कोरलो छे। हेरा आखा टुळा मा सी जोतरा वी आखा तोलवार सी मार नाख्या जासे, आरु जो रोय जाय चे च्यारु मेर रिवन्या तिवन्या होय जासे। तोत्यार तुमु जान जासु की हांव योहोवात ओसु कोहलु छे।
परमेश्वरन वायदो
ओळी पोरबु योहोवा ओसु कोवे:
हांव वी वेलावाळान उची फुनगी मा सी थुड़ोक लीन लागाड़ीस,
आरु हेरा आखासी उपोरुन डाव मा सी एक कुवेववो डाव तुड़ीन एक बेस उचा बोयड़ा पोर लागाड़ीस,
इसराएलन उचा बोयड़ा पोर लागाड़ीस;
तोत्यार हुयो डाळ्या फुड़ीन ताकोतवाळो
आरु वारु वेला बोन जासे आरु हेरे नेचा
एने हेरा डाळ्यान साहवाम भाति भातिन आखा
चिल्ला रोहसे।
तोत्यार खोयड़ाक आखा झाड़े जान लेसे
की मे योहोवात उचा झाड़ोन नेचो आरु
नेचा झाड़ोक उचो कोर्यो,
निळ्वा झाड़ोक सुकाड़ देदो आरु सुकला झाड़ोक निळ्वा कोर देदु।
मे योहोवात यो कोहलु आरु ओसु कोर वी देयो।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.