परमेश्वरन सत्य वचन
योहेजकेल 10
परमेश्वरन सेक योरुसालेमोन मन्दिर सी निकळी जानो
हांव डुळा उचा कोर्यो आरु यो देख्यो: करुब, मुनका उपोर वादळामोण्डळी छे, आरु एनु वादळामोण्डळी मा राजगादी सारको काहीन छे, जो नीलमणि सारको चोमकी रोयो। ओळी योहोवा न उना सोनोन छिंदरा पेहरला मानुस सी कयो, “फिरनेवाळा चाकटा क विच करुब, क नेचो जा आरु आपसी दुयो मुठोक करुब, क वीच क अंगारा सी भोरीन सोहोर पोर खोव्वी दे।”
त्या मार देखता देखता हेनका विच मा गोयो। जव त्या मानसे धड़े गुया, तव त्या करुब, भोवनोन दोखेवरो उबो हुतो; आरु वादळो आँगना मा भोरायलो हुतो। तव योहोवान सेक करुब, क उपर सी उठीन भवन क पोयड़ी पोर आय गुयो: आरु वादळो भवन मा भोराय गुयो; आरु त्यो आँगनो योहोवान ताकोतन विजाळा सी भोराय गुयो। करुब, क पाखड़ा क बुल खयड़े आंगनाम लगुन समळाय देदो हुतो, त्यो ताकोतवाळो परमेश्वर क बुलनेन सारको बुल हुतो।
जब त्यो सोनोन छिंदरा पेहरला मानुस क फिरने क धड़े करुब, क वीच मा सि आगठो लेने हुकुम आप्यो, तव त्यो हेनका विच मा जाईन एक चाकटा क धड़ उबो हुयो। तव करुब, क वीच सी एक करुब, न आपसो हात ओगो करीन, उना आगठा मा सी जो करुब, क बिच मा हुती, काहिन चुटीन सोनोन छिंदरा पेहरला मानुस क मुठ मा आप देदो; आरु त्यो हेको लीन खयड़े चाली गुयो। करुब, क पाखड़ा क नेचा ते मानसोन हात सारको काहिन देखा पोड़तो हुतो।
तव हांव देख्यो कि करुब, क धड़े चार चाकटा छे: एक एक करुब, क धड़े एक चाकटो छे। चाकटा क रुप रंग किमती दोगड़ा सारको चोमोकन्यो छे। आखा चाकटा रुप, च्यारु एक सारका देखायतला, जोसा एक चाकटा क वीच दुसरो चाकटो होय। चालनेन टेमे त्या आपसी च्यारु अलंगो क ताकुत सी चालतला छे: आरु चालते टेमे वोवतला नी, पुन जेंखेर हेनको मुनको रोहतलो त्या तेंखेरुत हेका पछळ चालतला छे आरु चालते टेमे त्या ववतला नी। हांव देख्यो कि करुब, क आखो डीलोम वासो, हात आरु पाखड़ा मा एने हेनका धड़ेन चाकटा मा वी आखा भेनी डुळा डुळा छे। मार सोमवता एनु चाकटाक चक्कर कोयो, फिरनेवाळा टायरा। एक एकोन च्यार च्यार मुय हुता: एक मुयोन ते करुब, सारको, दुसर मुय मानसो सारको, तीसरो मुय नाहरो सारको, आरु चवथो मय घुवोड़ चिल्ला सारको।
करुब, भुमी पोर सी उठ गुया। ये त्यात जीवधारि छे, जे हांव न कोबार नोंदी क पास देख्यो हुतो। जब जब त्या करुब, चालता हुता तब तब त्या चाकटा हेनका पास पास चालता हुता; आरु जव जव करुब, कळ पोर सी उठने क लिय आपसा पाखड़ा उठावतला तव तव चाकटा हेनका पास सी नी वोवता हुता। जव त्या उबा होयतला तव ये वी उबा होयतला हुता। आरु जव त्या उठतो तव ये वी हेनका भेळ उठतो हुता; काहकी जिवधारियो क जीव एनुम रोहती हुती। योहोवान सेक भवन क पाटड़ी पोर सी उठीन करुब, क उपोर बोस गोयो तव करुब, आपसा पाखड़ा चुटीन मार देखता देखता कळी पोर सी उठीन निकळी गुया; आरु चाकटा वी हेनका भेळ भेळ गुया, आरु त्या आखा योहोवा क भवन क उगेनले झपला मा उबा हुय गुया; आरु इसराएल क परमेश्वर क सेक क हेनका उपोर बोस रयो।
ये त्यात जीवधारि छे जे हांव न कोबार नोंदी क पास इसराएल क परमेश्वर क नेचो देखलो हुतो, आरु हांव न जान लेदो कि त्या वी करुब, छे। एक एक क चार मुय आरु च्यार पाखड़ा आरु पाखड़ा क नेचा मानसो सारका हात वी हुता। हेनका मुखो क रुप त्यो छे जे हांव कोबार नोंदी क धड़े देखलो हुतो। हेनका मुख काय पुन हेनका आखा डिल वी तसोज हुतो। त्या सुदा आपसा आपसा ओगळुत चालता हुता।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.