परमेश्वरन सत्य वचन
निर्गमन 14
इसराएलीयान रातला दरियान क पार छेकनो
योहोवा मुसा सी कयो, "इसराएलीयान को हुकुम दे, कि त्या पछा आवीन मिग्दोल आरु दरियान वीच मा पीहहीरोतन साने बालसपोन न सामने आपसो तम्बु कोरे, ओकोत् ओगळ दरियान धड़े तम्बु करे। तव फिरोन इसराएलीयान वाराम विचार करसे, त्या ओनजान देश मा भंगलायीन घबराय गयला छे, सुनसान पोरदेश मा हेनको बन्दि बोनाय लेदला छे। तव हांव फिरोन क मन को वातड़ो कर दीस, आरु हेनको पछोळ पड़से, तव फिरोन आरु ओकी सारी सेनान लारे म्हारी मोहिमा हुयसे; आरु मिसरी जान जासे कि हांव योहोवा छे।" आरु त्या वसात् करिया। जव मिसरन राजा को यो खबर मिळी कि त्या लोगहन ढास गीया, तव फिरोन आरु उका करमचारियान मन हेनका विरोध मा उल्टो हुय गीयो, आरु त्या कयने लाग गीया, "हामु यो काय करीया, कि इसराएलीयान को ओकी सेवा चाकरी सी छुटकारो आपीन जाने दीदो। तव त्यो उको रथ तियार करायो आरु आपसी सेना को पुठी ली गीयो। त्यो छव सोव वारु सी वारु घुड़सवारी मिसर न आखी घुड़सवारी लीन आरु हेनु आखा पर सरदार बठाड़ीयो। आरु योहोवा भगवान मिसरन राजा फिरोनन मन को वातड़ो कर दीदो। अतरान करीन त्यो इसराएली लोगहन पछोळ पड़ीयो; पुण इसराएली ती नीचळात् निकळीन जाता हुता। पुण फिरोनन सब घुल्ला, आरु घुड़सवारो क पुठी मिसरी सेना हेनको पछोळ पड़ीन हेनका पास, जो पीहहीरोत क पास, बालसपोन क सामने, दरियान धड़े तम्बु डालीन पड़ला हुता, वाँ सी जाय पुगीया। जव फिरोन साते आयो, तव इसराएलीयान ढुळा उगाड़ीन देखीया, कि मिसरी हामरे पछोळ पड़ीन आय रीया; आरु इसराएली घण बिह गीया, आरु आयड़ीन योहोवा भगवानन विनता करीया। आरु त्या मुसा सी कयने लाग गीया, "काय मिसर मा बीड़ा नी हुता जो तु हामुक वाँ रईन मरने करीन जंगलो मा ली आयो? तु हामरे साते यो काय करीयो कि हामुक मिसर देश सी निकाळ लायो? काय हामु थार सी मिसर देश मा रईन यी वात नी कया कि हामुक रयने दे कि हामु मिसरीयान सेवा चाकरी करजे? हामरे लिये ते मरने सी मिसरीयान सेवा करनो वारलो हुतो।"1 मुसा लोगहन सी कयो, बिहयो मा, उबा रईन त्या छुटकारान काम देखो, जो योहोवा भगवान आज तुमरे लिये करसे; काहकी जिनु मिसरीयान को आज तुमु देख रीया, हेनको ओळी पोछा कदी नी देखु। योहोवा भगवान आपसुत् तुमरे लिये लड़से, अतरान करीन तुमु हुगा रयो।"2 तव योहोवा भगवान मुसा सी कयो, "तु काय लेने मखे आयड़ी रीयो? इसराएलीयान को हुकुम दे कि याँ सी थुड़ोक काहय करे। आरु तु थारी लाकड़ी थारो हात दरियान उपर अगो बढ़ाव, आरु त्यो दुय वाटा हुय जासे; तव इसराएली दरियान वीच मा रईन सुकली धरती परुत् चालीन जात रयसे। आरु समळ, हांव मिसरीयान मन को वातड़ो करो, आरु त्या हेनका पछोळ पड़ीसे। तव फिरोन आरु हेका मानसे दरिया मा भराय जासे, तव फिरोन आरु ओकी सेना, आरु घुड़सवारीन लारे म्हारी मोहिमा हुयसे। आरु जव फिरोन, आरु उका घुल्ला गाड़ी, आरु सवारोन लारे म्हारी मोहिमा हुयसे, तव मिसरी जान लेसे कि हांव योहोवा भगवान छे।" तव योहोवा भगवान को दुत जो इसराएली सेना क अगोळ–अगोळ चालतो जातो हतो हेनको पछोळ हुय गीयो; आरु वादळान खाम्बो हेनको अगोळ सी हेनको पछोळ जाय पुगीयो। इने रीतिये त्यो मिसरी सेना आरु इसराएली सेनान वीच मा आय गीयो; आरु वादळो आरु आंधारो ते हुयो, ते बी आगठान खाम्बा सी हेनको विजाळो जड़तो रीयो; आरु त्या रात भरीन एक दीसरान क पास म नी आया। तव मुसा उको हात दरियान उपर अगो करीयो; आरु योहोवा भगवान रात भरीन घण भारी हवा चालाड़ीयो, आरु दरिया को पानी दुय वाटा मा वाटाय गुयो पोरबु दरिया सुकलो जागो बोनाय देदो। तव इसरायली दरियान वीच मा धरती पर चालीन जात रीया, आरु पानी हेनके जेवड़े आरु डाखरीये दुयु तरफ भीतन तसो हुय गीयो आरु भीतन काम करतो हुतो। तव मिसरी लोगहन, मतलब कि फिरोनन सब घुल्ला, घुड़सवारी, आरु सवार हेनको पछोळ पड़ीन दरियान वीच मा जात रीया। आरु रातन छेहला पेहराम योहोवा भगवान वादळान आरु आगठान खाम्बा मा रईन मिसरीया पर नजर न्हाखीन हेनको घबराय दीदो। आरु त्यो हेनकी घुड़सवारीन चाकटाक निकाळ दीदो, जिना सी हेनको चालनो काठो हुय गीयो; तव मिसरी एक दीसरा सी कयने लाग गीया; आवो हामु इसराएलीयान क अगळ सी ढास जाजे; काहकी योहोवा भगवान हेनका भेनी रईन मिसरीयान विरुद मा लड़ाय कर रीयो।" ओळते योहोवा भगवान मुसा सी कयो," थारो हात दरियान उपर बढ़ाब, कि पानी मिसरीया, आरु हेनकी घुड़सवारी, आरु सवार पर ओळी पछो उहवे तसे। तव मुसा उको हात दरियान उपर करीयो आरु भळभाको हयता–हुयता काय हुयो कि दरियो ओळी जसो हुतो तसो हुय गीयो आरु आपसा जागा पर आय गीयो; आरु मिसरी उलटा ढ़ासने लाग गीया, पुण योहोवा भगवान हेनको दरियान वीच मात् उहवाड़ दीदो। आरु पानीन पछो पलटने सी, जतरी घुड़सवारी आरु सवार इसराएलीयान पछोळ आवला हुता, त्या सब आरु फिरोनन सारी सेना उका मा डूब गुया, आरु उका माईन एक बी नी वाचीयो। पुण इसराएली दरियान वीच मा धरती पोर चालीन जात रीया, आरु पानी हेनके जेवड़े आरु डाखरीये दुयु धड़े भीतन बनीन उबो रयो। इनीये रीतिये योहोवा भगवान उना दाहड़े इसराएलीयान को मिसरीयान क हकोम रईन छुड़ायो; आरु इसराएलीया मिसरीयान को दरियान धड़े काठा पर मरला पड़ रयला देखीया। जव इसरालियो न मिसर क रोहने वाला पोर योहोवा न आपसी ताकोत देखाड़ीयो, तव त्या बिहने लाग्या ती हेका सेवक मुसा पोर विश्वास कोरीया।
Source notes (2)
- Cross-reference निर्गमन 16:3; 17:3
- Cross-reference यशायाह 30:15
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.