निर्गमन 12

फसहन तिहवारन

1ओळी मिसर देश मा योहोवा भगवान मुसा आरु हारुन सी कयो, 2यो मयनो तुम लोगहन क लिये पेहलो टाकायसे; मतलब यो कि सालोन पेहलो मयनो यो टाकायलो रयनो जुवे। 3इसराएलन सारी मण्डळी सी इनीये रीतिये कयो, कि इना मयनान दसवा दाहड़ाक तुम लोगहन तुमरो डाहडान घरानान अनसारे, घरो पछोळ एक–एक गाडरो लीन राखो। 4आरु कदाम काहला घरो मा एक गाडराक खानेन करीन मनुस कम हय, ती त्यो आपसे साते रयने वाळा फळेन लोगहन क सात मा जीवोन गिनतीन अनसारे एक गाडरो लीन राखे; आरु तुमु आखा क लियेन खानेन अनारे गाडरान हिसाब करजो। 5तुमरो गाडरो विनगुनाको नी आरु पेहले सालोन नर हुयनो जुवे, आरु उको चाहे गाडरा माईन लेजो चाहे ती बुकड़ा माईन। 6आरु इना मयनान चोवदे दाहड़ा तक उको मेल राखजो, आरु उना दाहड़े शांतन टेम पर इसराएलन सारी मण्डळीन लोगहन उको बली कर। 7तव उना लुहुय माईन थुड़क लीन जिना घर मा गाडरान को खास हेनका झपला दुय धड़े चोखट पर लगाड़जो। 8आरु त्या ओको मास को उनी रात आगठा मा चुयनीन पान्यान रोटान क सात मा आरु कड़वा भाजी क सात मा खानो। 9उको मुनका, पाय आरु आतड़ियान क सात मा आगठाम चुयनीन खाजो काचलो या पानी मा थुड़क पकाड़ीन नी खानो। 10आरु उना माईन थुड़क बी संदारे तक नी रयने देजो, आरु कदाम संदारे तक रय बी जाय, ती उको आगठाम धपाड़ देजो। 11आरु उको खानेन रीति यी छे: कि कड़ीयाम बांध लेय, पाय मा खासड़ा पेहर लेय आरु हात मा लाकड़ी लीन उको उतावाळीया खाजो; त्यो ते योहोवा भगवानन तिहवार हुयसे।1 12काहकी उनी रात मा हांव मिसर देशन वीच मा रईन जाईस, आरु मिसर देशन काय मानसे, काय ढुर, सबन पेहला खुळीयान को मारीस; आरु मिसर देशन सारा देवतान को बी हांव डन आपीस;हांव ते योहोवा छे।2 13आरु जिना घरो मा तुमु रयसु उना घर पर‍ त्यो लुहुय तुमरे लिये सोहलानी बनसे; मतलब हांव उना लुहुय को देखीन तुमको छुड़ीन जात रईस, आरु जव हांव मिसर देशन लोगहन को मारी, तव त्यो पीड़ा तुमरे उपर नी पड़े आरु तुमु नाश नी हुयो। 14आरु त्यो दागड़ो तुमुक फोम देवाड़ने वाळो रयसे, आरु तुमु उको योहोवा भगवान क लिये तिहवार करीन मनावजो;‍ त्यो तुमरी पीड़ी क लियन जलोमकी रीति जानीन तिहवार को मनावजो।

अखमीरी रोटो

15परमेश्वर कयो, "सात दाहड़ा तक अखमीरी रोटो खाया करजो, उनाम सी पेहलेत दाहड़े तुमरा घरो मा सी खमीर चुट लेजो, याँ तक कि जो पेहले दाहड़े सी लगाड़ीन सातवे दाहड़े तक कोय खमीरी चीज को खाजे, उना जीवड़ो इसराएल मा सी नाश होय जासे। 16पेहले दाहड़े एक चुखली मीटिंग, आरु सातवे दाहड़े बी एक चुखली मीटिंग करजो; तनी दुयु दाहड़ा मा कोय बी काम को नी करनो हय; पुण अतरोत कि जिना जीवड़ा को जो खानो छे ओको चो ओतरोत तुमु रांद सोकतला। 17अतरान करीन तुमु बीना खमीरन रोटान तिहवार मनावजो, काहकी उना दाहड़े यो मानो कि हांव तुमुक टुळुन टुळु करीन मिसर देश मा सी निकाळ्ळो छे; इना कारण सी त्यो दाहड़ो तुमरी पीड़ी मा जलोमकी रीति जानीन मनावजो।3 18पेहला मयनान चोवदे दाहड़ान सान्तो सी लगाड़ीन इक्कीस दाहड़ान सान्तो तक तुमु अखमीरी रोटो खाया करजो। 19सात दाहड़ा तक तुमरा घरो मा काय बी खमीर नी वाचणो जुवे, पुण जो काय काहली खमीरी चीज को खाय, चाहे त्यो देशी हय चाहे पारको, त्यो आखा मानसे इसराएली लोगहन मा रईन नाश हुय जासे। 20कोय खमीरी चीज को नी खानो, तुमरा घरो मा विगुर खमीरन रोटो खाया करजो।"

पेहलो फसहन तिहवार

21तव मुसा इसराएलीन सब डाहडान को बुलावीन कयो, "तुमु तुमरा आपसा कुलन अनसारे एक–एक गाडरो अलग करीन राखो, आरु फसहन गाडरो बलिदान करजो। 22आरु उको लुहुय जो वाटका मा हुयसे उना मा एक गछळो डुबाड़ीन उना तसला माईन लुहुय को झपलान चुखट कुना आरु दुयु धड़ मा थुड़ोक लगाड़जो; आरु भोळ भाका तक तुमरे माईन कोय घर सी बाहर झुण निकळता। 23काहकी योहोवा भगवान मिसर देशन वीच मा रईन मिसरीयान को मारतो जासे; अतरान करीन जाँ सारीक त्यो चुखोटन कुना, आरु दुयु धड पर उना लुहुय को देखसे, वाँ सारीक त्यो झपला को छुड़ीन जात रयसे, आरु नाश करने वाळा को तुमरा घरो मा मारने करीन जाने नी देय।4 24ओळते तुमु इनी रीति को तुमरे आरु तुमरी ओवलियाद क लिये जोलमकात रिति जानीन मानीया करो। 25जव तुमु उना देशम मा जिनाक योहोवा कि कयनेन अनसारै तुमुक आपसे भरायजो, तव ज्यी रितीन पाळनी पाळजो। 26आरु जव तुमरा पोर्या वाळा तुमरे सी पुछे, कि इनी रिती सी तुमरा काय मतलब छे?'5 27तव तुमु हेनको यो जवाब देजो, योहोवा जो मिसरीयान को मारनेन टेमे मिसर मा रयने वाळा हामु इसराएलीयान घरोक वाचाड़ीयो इना कारण सी उका लिये फसहन यो बलिदान करजो।" तव लोगहन मुनका झुकाड़ीन आराधना कोरीया। 28तव त्या इसराएलीया लोगहन जाईन, जो हुकुम योहोवा मुसा आरु हारुन को आपलो, उनात् अनसारे करीया।

दसवी पीड़ा पेहल खुळीयान मरनो

29असो हुयो कि आदी राती योहोवा मिसर देश मा राजगाद्दी पर बसीन राज करने वाळा फिरोन सी लगाड़ीन जेलोम मा पड़ला केदड़ा लगुन सबन पेहल खुळीया को, याँ तक कि पशुन पेहल खुळीयान को बी मार न्हाकीयो।6 30आरु फिरोन रातो मा उठीन बठो हुयो, आरु सब करमचारिया, याँ तक कि सारा मिसर वाळा उठ गीया; आरु मिसर वाळा आखान या मोटो विखो हुयो, काहकी एक बी घर असो नी हुतो जिनाम मोत नी हय। 31तव फिरोन रातो मा मुसा आरु हारुन को बुलाईन कयो, तुमु इसराएलीयान को लीन म्हारी परजान वीच मा रईन निकळीन जात रय; आरु थारे कयुनेन अनसारे जाईन योहोवा भगवानन विनता कर। 32थारे कयने अनसारे थारा गाडरा–बोकड़ान आरु गाय–बयलीयान को सात मा ली जावो आरु मखे सोयबरकत कय जावो।" 33आरु मिसरी जो कयता हुता, हामु ते सब मरीन खतम हुय गीया; त्या इसराएली लोगहन पर दबाव बनावीन कया, "इना देश सी उतवाळीयात् निकळीन जात रयो।" 34तव त्या हेनको परातियान मा कुसनला पीठा को बीना खमीर को टाहरा क सात मा छिंदरा मा बाँधीन आपसा–आपसा खांदा पर न्हाक लीदा। 35इसराएलीया मुसान कयनेन अनसारे मिसरीया सी सोना–चाँदीन गयनो आरु छिंदरा मांग लीदा।7 36आरु योहोवा भगवान मिसरीयान को ओकी परजान लोगहन पर दयाळा बना दीदो कि त्या जो–जो मांगीया त्यो सब हेनको आप दीदा। इनीये रीतिये इसराएलीया मिसरीयान को लुट लीदा।8

इसराएली लोगहन क मिसर देश छुड़नो

37तव इसराएली लोगहन रामसेस सी थुड़ाक अगा जाईन सुक्कोत मा जात रीया, आरु नानला पोर्यान आरु बायरा को छुड़ीन छव लाख पाये चालीन जानेवाळा ओदेमड़ा हुता।9 38हेनका सात मा दिसरा जे इसरायली नु हुता। भेसकायलु टुळु गयु, आरु गाडरा–बोकड़ा, गाय–बयलीया, घण सवटा जीव जनवारीया बी गिया। 39आरु जो कुसनलो पीठो हुतो उको त्या मिसर सी सात मा ली गीया कि ओकी त्या वीन खमीरन रोटा बनाया; काहकी त्या मिसर सी असा उतवाळीया निकळी गीया, कि हेनको टेम बी नी जड़ीयो कि वाट्‌ये खाने करीन थुड़ोक खानो बनायलेय, इना कारण सी त्या विगुर खमीरन कुसनलो पीठो हुतो। 40मिसर मा रयने वाळा इसराएलीयान को चार सोव तीस साल वीत गयला हुता।10 41आरु उना चार सोव तीस सालोन वीतने पर, ठीक उना दाहड़े, योहोवा भगवानन सारी सेना मिसर देश सी निकळी गय। 42योहोवा इसराएलीयान को मिसर देश सी निकाळ लायो, इना कारण त्यी रात उको फोम करने लीयन छे यी योहोवान त्यो रात छे जिनाक पीढ़ी–पीढ़ी मा माननो इसराएलीयान क लिये पाकी छे।

फसहन वाराम रीति

43ओळते योहोवा मुसा हारुन सी कयो, "तिहवार न रीति यी छे; कि कोय पारका देशन उना माईन नी खानो; 44पुण जो कुय मुले लीदलो पावर हय, आरु तुम लोगहन उको चामड़ो काटीन नक करला हय ती त्यो खाय सकतलो। 45पारका देश वाळो आरु दाहड़कीयो उना माईन नी खानो। 46उको खानो एकुज घर मा हुयनो जुवे; मतलब तुमु उना मास माईन थुड़ोक बी घर सी खयड़े नी ली जानो; आरु बली करला गाडरान हाड़की झुण तोड़ता। 11 47तिहवार को माननो इसराएलन सारी मण्डळीन काम छे। 48आरु कदाम कोय पारका देशम वाळो तुमरे सात मा रयीन योहोवा क लिये तिहवार मनावने करे, ती त्यो उना याँ रयने वाळा सब ओदमीन को फातोरकाती करावे, तव त्यो साते आवीन उको माने; आरु त्यो पारका देश वाळा मनुस को सारको हुयसे। पुण कुय वीना नक करलो ओदमी उना माईन नी खानो जुवे। 49ओको रीति देशी आरु तुमरे वीच मा रयने वाळा पारका देश वाळानज दुयोन एक हुयनो जुवे।"12 50यो हुकुम जो योहोवा मुसा आरु हारुन को आपलो उको अनसारे सारा इसराएलीया करीया। 51आरु ठीक उना दाहड़े योहोवा इसराएलीयान को मिसर देश सी टुळुन–टुळु करीन निकाळ ली गयो।