दानियेल 2

नबुकदनेस्सर राजा क सपनो।

1राजा नबुकदनेस्सर न राज न दिसरो साल हुतो तव त्यो असो सपनो देखियो जेको कारण हेको जीव घबराय गियो आरु हेका डुळान नींद उड़ी गय। 2राजा नबुकदनेसर हुकुम आपलो की गियानी, आरु तंत्र बुलनिया आरु टोना आरु कसदी पंडित क बुलायो कि त्या राजा न उना सपना न वारा मा देखाड़े। अळते त्या आया आरु राजा न सामने उबा हुया। 3राजा हेनको कयो, हांव एक सपनो देख्‌यो जेका कारण म्हारो मन घबराय गिया। उना सपनान मतलब काय छे त्यो मखे जाननो छे।

4तव कसदी न पंडीत राजा सी आरामी भाषा मा कया, ए राजा तु जलोम जीवतो रये। थार दास न क सपनो देखाड़, आरु हामु हेका वाराम देखाड़जे।

5राजा कसदी न पंडीत क जवाब दीदो, हांव यह हुकुम पेहलुत आप दीदो कि कदाम तमु फळो न सात मा सपनान वारा मा नी देखाड़े ती हांव तमरा टुकड़ा टुकड़ा कराय दिस, आरु तमरा घरन को धपाड़ दिस। 6कदाम तमु अर्थन सात मा सपनान वारा मा देखाड़े ती हेनको म्हार सी वारु रीतिये दान आरु विजुत जड़से। हतरान करीन तमु मखे अर्थन सात मा सपनो देखाड़ो।

7त्या राजा सी दिसरी वार कया, ए राजा थारा चाकिरिया को सपनो काय छे देखाड़, आरु हामु हेको मतलब सझाड़ देसु।

8राजा जवाब दीदो, हांव पाको यो जानो कि यो कि तमु यी वाट टेम निकाळने करीन कर रीया; काहकी तमु यो जानो की म्हारो वचन टळने वाळो नी हय। 9कदाम तमु म्हारा सपनान वारा मा मखे नी देखाड़ो ती तुमरे वाटे मोतन डण्ड पाको छे। तमु इनी वात पर एकु करीया हसे की इव तक टेम नी बदली जाय तव तक हामु राजा सी झुट कयसु। हतरान करता हांय तमु मखे सपनान वाराम देखाड़ो, तव हांव जानीस की तमु हेको मतलब बी देखड़ सकसु।

10कसदी इलाकान पंड़ीत राजा सी कया, धरती पर असो कोय मनुस नी हय जो राजा न मनन वात क देखाड़ सके; आरु न कोय असो राजा, नी ते परधान, या हाकिम हुयो जो गियान वाळा या तंत्र वाळा, या कसदी सी असी वात पुछियो हसे। 11जी वात राजा हामरे सी पुछी रीयो,‍ त्यो देखाड़नो वातड़ो छे, आरु देवतात् राजान सपनान वारा मा देखाड़ सके। पुन देवता ते मनुसन विच मा नी रये।

12यी वात समळीन राजा नबुकदनेसर नराज हुय गियो। आरु त्यो किचवाय गियो। त्यो राजा हुकुम दीदो कि बेबीलोनन देश न सारा पंड़ीत आरु गियान वाळा, तंत्र वाळा आरु कसदी इलाका न पंड़ीत क मार देये। 13राजान यो हुकुम निकळी आरु पंड़ीत लोगहन क मारनेत वाळा हुता कि दानियेल आरु हेका सातीक बी हेरता हुता कि हेनको बी मार देय।

परमेश्वर लारे दानियेल पर मतलब क प्रगट करनो

14तव दानियेल राजान चाकरिया न डाहला अर्योक सी जो बेबीलोनन पंड़ीत आरु गियानवान क मारने करीन निकळ्लो हुतो विचार करीन अकोल सी कयो; 15आरु राजान हाकिम आर्‌योक सी पुछने लागियो, कि राजान यो हुकुम अतरो उतवाळीयो काह निकळीयो? तव आर्‌योक दानियेल क हेका वारा मा देखाड़ दीदो।

16तव दानियेल राजान महल मा गियो आरु राजा सी विनती करियो की, हेको वाटे काहलो टेम टाक देय, कि हांव टाकले टेम पर राजान सपनान मतलब देखाड़ो। 17तव दानियेल आपसे घर जाईन, हेका साती हनन्याह, मीशाएल, आरु अज्रयाह क यी वात देखाड़ीन कयो, 18इनी वात न वारा मा सगरमा वाळा परमेश्वर न दया वाटे यो कयीन विनता करो, कि बेबीलोनन आरु सारा पंड़ीत आरु दानियेल, गियानवाळा न सात मा हामरो बी नाश नी हयनो जुळे। 19आरु रातन टेमे दर्शनन लारे दानियेल को देखाय पड़ीयो। तव दानियेल सरगन परमेश्वर क यो कयीन घण वारु कयो,

20दानियेल कयो परमेश्वरन नाव जलोमको धन्य छे;

काहकी गियान आरु अकोल हेके वगे रयीन छे।

21परमेश्वर छे जो टेम आरु मोसोम त्योत् बदले;

राजान क उगेवनी आरु बुडेवनी टेमे हेकेत् लारे हुये;

परमेश्वरु ओकल वाळान क ओकल आरु समझ आपे।

22त्यो ढाकायली आरु सातायली वात क देखाड़े;

त्योत् जाने की अंधारला मा काय छे,

आरु हेकोत् सात मा विजाळो जलोम बनलो रये।

23ए म्हारा वेगला डाहडान परमेश्वर हांव तुको घण वारु कयो,

आरु भक्ति करोम्, काहकी तु मखे अकोल आरु ताकत आपीयो,

आरु जेकी ढाकायली वातन वारा मा हामु थार सी माँगीया हेको तु म्हारे पर उजेन्तो करीयो।

तु हामुक राजान वात देकाड़ीयो।

राजा क सपनान मतलब देखाड़नो

24तव दानियेल आर्‌योकन पास माहय भीयरो जाईन कयो, जेको राजा बेबीलोनन पंड़ीत क म्हारने करीन आदीकारी बनावलो हुतो, “बेबीलोनन पंड़ीत क मा मारावे, मखे राजा सामने ली चाल, हांव हेका सपनान फोव देखाड़ीस।”

25तव आर्‌योक दानियेल क राजा न सामने राजभवन मा ली जाईन राजा सी कयो, “यहुदी केदड़ा माईन मखे एक ओदमी जड़लो छे, जो राजा क सपनान मतलब देखाड़से।”

26राजा दानियेल सी जेको नाव बेलतशस्सर बी हुतो, हेकेक् पुछियो, काय थारे मा हतरी शक्ति छे कि जो सपनो हांव देखलो छे, हेको मतलब सात मा मखे देखाड़ीस?

27दानियेल राजा क जवाब दीदो, जी ढाकायली वात राजा पछ रीयो,‍ त्यो नी ते पण्डित, नी ते मंत्री, नी ते गियान वाळा, नी ते हात भाळने वाळा देखाड़ सके, 28पुन ढाकयली वात क उजेन्ती करने वाळो परमेश्वर सरग मा छे; आरु त्योत् नबुकदनेसर राजा क देखाड़ीयो कि आखरी दाहड़ा मा काय काय हुयने वाळो छे। थारो सपनो आरु जो काय तु खाटलाम पड़्यो पड़्यो देख्‌यो, त्यो यो छे;

29ए राजा जव तु खाटला पर लुटलो हुतो ती तको यो विचार आयो कि आवने वाळा दहाड़ा मा काय काय हुयने वाळो छे, तव ढाकायली वात क देखाड़ने वाळा तुको देखाड़ीया कि काय काय हुयने वाळो छे। 30म्हारे पर हतरान करीन उजेन्तो नी हुयो कि हांव सब जीवड़ान सी जादा ओकोल वाळो छे, पुन अतरान करता उजेन्तो हुयो कि सपनान जजो मतलब छे‍‍ त्यो राजाक देखाड़ो, आरु तु मनन विचार क समझी सके।

31ए राजा जव तु देख रीयो हुतो, तव एक मोटी मुरती देखाय पड़ी, आरु ची त्यात् मुरती जो थारे सामने उबली हुती, त्या नाम्बी चवड़ी हुती; आरु घण जबर चमकती हुती, आरु हेको रुप घण जुदो हुतो। 32उनी मुरतीन मुनको चुखला सोनान हुतो। हेकी छाती आरु कांधा चाँदीन, हेको पेट आरु सातळा पीतळन हुती, 33हेका पाय लुहड़ान, आरु पायन थुड़क भाग लुहड़ान आरु थड़ाक धुळान हुता। 34ए राजा जव तु मुरती क देख रीयो हुतो तव दगड़ान एक टुकड़ो आपसुत् उखळी गियो, आरु मुरतीन लुहड़ान आरु धुळान पाय पर पड़ियो आरु हेनको चुरा चुरा कर दीदो। 35उना टेम पर लुहड़ो, धुळु, चाँदी आरु सोनो बी एख्टो चुरा चुरा हुय गियो, आरु उनाळा दाहड़ान चारान तसो काकरो काकरो हुय गियो आरु वाहळी हेकेक् उड़ाय ली गय, आरु हेनको वाराम काय पतो नी चालीयो आरु हेनकी निशानी बी नी रयी। पुन जेका दगड़ा क मुरत क पायो पर देदो हतो, चो एक मोटलो डुंगर क रुप मा बदली गियो, आरु सब धरती मा पसरी गियो।

36राजान सपनो योत् छे। हांय हामु एको मतलब राजा क देकाड़सो। 37ए राजा तु ते आखा राजा सी मोटो राजा छे, काहकी सरगन परमेश्वर तुको राज आरु जुर ने ताकत आरु महिमा आपलो छे। 38परमेश्वर थार हात मा धरती परन आखा मनुस, जंगलन जनवारिया आरु उपर आकाश मे उड़ने वाळा चिल्‌ला आप दीदो। राजा परमेश्वर तुको एनु आखा पर हक करने ताकत आपलो छे आरु मुरतीन सोनान मुनको राजा तुत् छे। 39थार बाद मा एक दिसरा राज आवनो हुयसे। त्यो थार सी नानो रयसे, अळते एक अळी तीसरो पीतळन राज्य आवसे जो सारी धरती पर कह ने राज करसे। 40तव चवथो राज आवसे जो लुहड़ान जसो वातड़ो रयसे। जसो लुहड़ो आखी चीज क टुकड़ा-टुकड़ा कर देय, तसो आखाक क चुरा-चुरा कर देसे। 41तु जो मुरती न पाय आरु आंगळीयान क देख्‌यो, जो काय कुमायड़ान धुळान आरु लुहड़ान हुती, इना से चवथो राज वाटायलो रयसे; तेबी हेका मा लुहड़ा सारको वातड़ो रयसे, जसो की तु कुमायड़ान धुळान सात मा लुहड़ोक बी भेसाकळ देखलो हुतो। 42जिने रीतिये पायन आंगळीया थुड़ांक लुहड़ान आरु थुड़ांक धुळान हुता, तसोत् त्यो राज बी थड़ंक वातड़ो ने थुड़ंक कोमजुर रयसे। 43तु जो लुहड़ाक कुमायड़ान धुळाक सात मा भेसकाळ देखियो, हेको मतलब यो की उना राजन लोगहन एक दिसरा सी मेळाका रयसे, पुन जसो लुहड़ो धुळाकन सात मा भेसकाळ नी रये तसात् त्या लोगहन बी एक सारका मेळाका नी रये। 44हेनु राजान राज करने दाहाड़ाम सोरगम रयने वाळो परमेश्वर एक असो राज तियार करसे जो कदी नाश नी हुये त्यो जलोमको रयसे आरु नी ते हेकी राज करनेन हक दिसरा राज क नी आपे। पुन त्यो हेनु आखा राज नक चुरा चुरा कर न्हाकसे। आरु त्यो आपसुत् जलोमको बनलो रयसे। 45ए राजा जसो तु देख्‌यो कि एक दगड़ो कोय क हात सी खंदलो नी पुन आपसुत् बयड़ा पर सी उखळ्यो आरु त्यो लुहड़ान, पीतळन, धुळान, चाँदी, आरु सोनाक चुरा चुरा कर दीदो, इनीये रीतिये महान परमेश्वर राजा क देखाड़ीयो कि एखे बाद काय काय हुयने वाळो छे। नी सपना मा नी फोव मा काहय शोक हय।

राजान लारे दानियेलन विजुत

46यो समळीन नबुकदनेसर राजा मुयन भुरसे पड़ीन दानियेल न विजुत करीयो आरु हुकुम दीदो की हेकेक् भेट आपे, आरु हेके सामने वार गंधायने वाळो चीज धपड़े। 47अळते राजा दानियेल सी कयो, छाचाय ते यी छे कि तुमरो परमेश्वर, आखा ईश्वर न ईश्वर, राजा न राजा आरु ढाकायली वातोंन क उजेन्तोकरने वाळो छे, हतरान करता तु यी ढाकायली वात उजेन्ती करीयो। 48तव राजा नबुकसनेसर राजा दानियेल न पद मोटो करीयो, आरु यो हुकुम आपीयो की त्यो बेबीलोनन सारा प्रान्त मा आखान मुखी आरु बेबीलोनन आखा पंडती डर डाहलो आदिकारी बने। 49तव दानियेलन विनती करने पर राजा शद्रक, मेशक, आरु अबेदनगो क बेबीलोनन प्रान्तन कामन व्यवस्थान करनीया नियुक्त कर दीदो; पुन दानियेल आपसु राजा न दरबार मा रया करतो हुतो।