प्रेरितन 10

पतरस आरू कुरनेलियुस

1कैसरिया मा कुरनेलियुस नावन एक मानुस होतो, इतालियानी नावन पलटनन सूबेदार होतो। 2वो भक्त होतो, आरू आपसा सब घराने सहावत यहोवा–भगवान सी बीक राखता हुतो, आरू यहूदि मानसोक घण दान देता, आरू बराबर यहोवा–भगवान सी प्रार्थना करता होतो। 3तीनेत दाहड़ेन तीसरे पहरन निकट दर्शन मा स्पष्ट रूप सी देख कि यहोवा–भगवानन एक सोरगदूत तेरे साथे माहीय आवीन कयता सी, हे कुरनेलियुस!

4त्यो ओको ध्यान सी देख्य आरू बिहीन कयो,

“तारी प्रार्थना आरू तारो दान फोम करता यहोवा–भगवानन सामने पुग्यो सी।” 5आरू हिमी याफा मा मानसी मुकली शमौनन, जो पतरस कोवयतो सी, बुलवा लेय। 6वो शमौन, चामड़ान धुदो करनेवाळान याहा पाहंनतराय सी, जेरो घर दरियान धोड़े सी। 7जव वो सोरगदूत जू ओको वात करी होती चाल गया, ती त्यो दुय चाकरीयो, आरू जो तेरे साथे हजुर रया करता हुता इनुमा सी एक भक्त सिपाहीक बुलाया। 8आरू तीनुक आखी वात कोवीन याफाक मुकल्यो।

9दिसरे दाहड़े जव वो चालता–चालता गाँवन साथे पुग्या, ती सिरानदाहडु निकट पतरस छत पर प्रार्थना करने चहड्यो। 10ओको भुख लागी आरू काही खानो जूवतो होतो, पुन जव वो तीयारी कर रया हुता ती वो बेसुध होय गया। 11आरू त्यो देख्यो कि सोरग उगड़ी गयो; आरू एक पात्र मोटी चादरान समान चार खुना सी लटकाड़ता होया, कोवीन चा रयन उतर रया सी। 12जिन मा धरती आखा प्रकारन चौपा आरू रेंगनेवावा जन्तु आरू सोरगदूतन चिल्ला हुता। 13ओको एक ओसो ओवाज सोमवाय दिदो, “हे पतरस उठ, मार आरू खा।”

14पुन पतरस ने कयो, “नी पोरबु कदी नी; काहकि हाव ने कदी काही विटुळ या विटळ चिज नी खाय सी।”

15ओवी दीसरी बार यी ओवाज सोमवाय दिदो, “जो काही यहोवा–भगवान ने चुखो ठराय सी, ओको तु विटळ मा कय।” 16तीन कावा ओसो ही हुयो; तव तत्काल वो पात्र सोरग पर उठाड़ ली गयो।

17जव पतरस आपसा मन मा दुविधा मा हुता, कि यो दर्शन जो हाव ने देख्य काय हो सकता सी, ती देखु वो मानुस जीनुक कुरनेलियुस ने मुकल्या हुता, शमौनन घरन पतु लगाड़ीन झपला पर आवीन उबा होया। 18आरू आयड़ीन पूछने लाग्या, “काय शमौन जो पतरस कोवायतो सी, योही पाहंनतराय सी?”

19पतरस तो ओको दर्शन पर सुच ही रया हुता, कि आत्मा ने ओकासी कयो, “देख, तीन मानसी तारी हेर मा सी। 20शेवली कावा उठाड़ीन नेचो जा, आरू नि: संका इन्दरे साथे होय ले; काहकि हाव ही ने तीनुक मुकल्या सी।” 21तव पतरस ने उतरीन इन मानसो सी कवो, “देखु, जेरी हेर तुमू कर रया होय, वो हाव ही सी। तुमरे आवनेन काय कारण सी?”

22तीनुक कयो, “कुरनेलियुस सूबेदार जो न्यायी आरू यहोवा भगवान सी बीक राखतो आरू सब यहूदि जाति मा सुनाम मानसी सी, त्यो एक चुखलो सोरगदूत सी यो निर्देश देख्य सी कि तुखे आपने घर बुलावीन तुखे सी वचन सोमवाया।” 23तव त्यो तीनुक माहीय बुलावीन तीन्दरी पाहंतराय कर्‍या। विश्वासी माईन काहय तिन्दरे पुठी चालिया

दीसरे दाहड़े वो तींदरा साथे गया, आरू याफान भाईस्यो मा सी काही तेरे साथे होय गया। 24दिसरे दाहड़े वो कैसरिया पुग्या, आरू कुरनेलियुस आपने घराना आरू मोंगावु दोस्तोक एखठा करीन इन्दरी वाट जूय रया हुता। 25जव पतरस माहीय आय रया होतो, ती कुरनेलियुस ने ओका सी भेंट करी, आरू ऐरा पाय पर पड़ीन ओको नमस्कार कर्‍या। 26पुन पतरस ने ओको उठाड़ीन कयो, “उभु होय, हाव भी तो मानुस सी।” 27आरू अतरान करीन साथे वातचीत करता होया माहीय गया, आरू घण सी मानसोन एखठा देखीन। 28त्यो कयो, “तुमू जानता होय कि बाहरजातीयान संगति करने या तेरे याहा जाने यहूदि न करता अन्याय सी, पुन यहोवा–भगवान ने मखे देखाड्य सी कि काही मानसोक विटुळ या विटळ नी कोवु।” 29अतरान करीन हाव जव बुलाया गया ती बिना काही कये चाल आश। हिमी हाव पूछता सी कि मखे काही कामन करता बुलाया गया।

30कुरनेलियुस ने कयो, इनी घड़ी, पूरो चार दाहड़ा होया, हाव आपने घर मा तीसरे पहर प्रार्थना कर रया हुता; ती देखु, मानुस चमकीला लुगड़ा पेहर्‍या हुयो मारे सामने आवीन उबो हुयो। 31आरू कयनो लाग्या, हे कुरनेलियुस, तारी प्रार्थना सोमवी लेदी गयी सी तारो दान यहोवा–भगवानन सामने स्मरण कर्‍या गया सी। 32अतरान करीन कुदाक याफा मुकली शमौनन जो पतरस कहवाये सी, बुला। वो दरियान धोड़े शमौन, चामड़ान धुदो करनेवाळान घर मा पाहंनतराय सी। 33तव हाव ने तत्काल तारे साथे मानसी मुकलीस, आरू तु ने भला कर्‍या जो आय गया। हिमी हामु आखा याहा यहोवा–भगवानन सामने सी, ताकि जो काही यहोवा–भगवान ने तुखे सी कयो सी ओको सोमव्या।

पतरसन शिक्षा

34तव पतरस ने कयो, हिमी मखे छाचो हुयो कि सचमा यहोवा–भगवान कुदान पक्ष नी करता। 35वरना हर जाति मा जो ओका सी बिहता आरू न्यायन काम करता सी, वो ओको भाता सी। 36जो वचन त्यो इस्त्राएलन साथे मुकल्या, जव त्यो ईशु मसीहन द्वारा जो आखान पोरबु सी शांतीन खुश खबर सोमवाया। 37वो वचन तुमू जानता होय, जो यहुन्ना न बपतिस्मा खबरन ओतेन गलील सी शुरू हईन सब यहूदि या मा पसरी गयो। 38यहोवा–भगवान ने काही रीति सी ईशु नासरी चुखलो आत्मा आरू शक्ति सी अभिषेक कर्‍या; वो भलाई करता आरू आखान जो शैतानन सतायो हुयो होतो, वारला करे, काहकि यहोवा–भगवान इन्दरे साथे होतो। 39हामु इन कामन गवा सी; जो यहूदि यान देश आरू यरूशलेम मा भी कर्‍या, आरू तीनुक ओको कुरूसन काठ पर लटकाड़ीन 40तेरो यहोवा–भगवान ने तीसरे दाहड़े जीवाड्यो, आरू प्रगट भी कर दिया सी। 41आखा मानसो पर नी वरना इन गवा पर जीनुक यहोवा–भगवान ने पेहल सी त्योन लेदो होतो, एणे हामु पर जे अतरान करीन मरला होया मा सी जीवन उठने ओतेन अतरान करीन साथे खाय पीय। 42आरू त्यो हामु हुकुम आपी कि मानसो मा खबर करू आरू गवा देवु, कि यो चो सी जिन यहोवा–भगवान ने जीवतलान आरू मरला होयाक न्यायी ठेरायो सी। 43तारी सब भविष्यवक्ता गवाय देता सी कि जो काही ओको पर विश्वास करसी, अतरान करीन ऐरेत नावन द्वारा पापन माफी क मिवसी।

गैर यहूदि लोगहन पर चुखली आत्मा क उतरनो

44पतरस यी वात कय ही रीयो होतो कि चुखलो आत्मा वचन क आखा सोमवनेवावा पर उतर आयो। 45आरू जोतरा खतना कर्‍या होया विश्वास पतरसन साथे आश हुता, वो आखा चकित होया कि गैरयहुदी पर भी चुखलो आत्मान दान रेड़ गय सी। 46काहकि चे तीनुक भाति भातिन भाषा बुलता आरू यहोवा–भगवानन बढ़ाई करता सोमव्या इन पर पतरस ने कयो। 47“काय काही पानीन रूकी सकता सी कि यो बपतिस्मा नी देखे, चे हामरे समान चुखलो आत्मा देख्या सी।” 48आरू त्यो हुकुम देदी कि तीनुक ईशु मसीहन नावन बपतिस्मा देतु जाय। तव चे त्या ओका सी रावन्या करी कि काही दाहड़ा आरू अतरान करीन साथे रवु।