परमेश्वरन सत्य वचन
2 थिस्सलुनीकियो 2
दुष्ट मानुस
हे भाईस, आरू बहनीस हिमी हामु आपसा पोरबु ईशु मसीह क आवने, आरू ओका साथे आपने एखठा हुयने क विषय मा तुमू छे रावन्या करता छे। कि काही आत्मा, या पत्री क द्वारा, जो कि मानु हामरी तरफ छे होय, यो समझीन कि पोरबु क दहाडू आय गयु छे, तुमर मन उचकाळुन कमजोर नी होय जाय आरू नी तुमू घबरायो। काही रीति छे काही क धोखा मा नी आवने, काहकि पोरबु क दहाडू नी आवसे जव तक हड़ताळ चालसे, आरू दुष्ट मानुस प्रगट होयछे आरू ओको नरक नाखछे। जो विरोध करता छे, आरू हर छे एक जो भगवान या पूज्य कवाये छे। आपने आप क मोटा ठेराया छे, याहा तक कि वो यहोवा–भगवान क मंदिर मा बठीन तुमरा आप क भगवान ठेराया छे।
काय तुमू स्मरण नी कि जव हाव तुमरे साथे हुता, तो तुमू छे यो वाद कयता करता हुता? तुमू उना वात क जानता होय, जो उको हिमी रूक रया छे की दुष्ट मानुस तुमरा हिय टेहाव मा प्रगट होय। काहकि अन्याय क भेद हिमी भी काम करता जाता छे, पर हिमी भी एक रूकनेवावा छे, आरू जव तक वो दूर नी जाय वो रूकने रवछे। तव वो दुष्ट मानुस प्रगट होयछे, जिनाक पोरबु ईशु तुमरा मुय कि फूक छे मार देसे, आरू तुमरा आवनो क तेज छे भस्म करसे। 2उना दुष्ट मनुष्य क आवने शैतान क काम क लारे सब प्रकार कि झूठी शक्ति, आरू सहलानी, आरू घण मोटा काम क साथे नी होयछे। आरू नाश हुयने वालान करता अन्याय क सब भातिन क धोखा क साथ मा हुयसे; काहकि त्या सच्चाई छे मोंग नी कर्या एरसे इन्दरो उध्दार हुये। इनीये कारण यहोवा–भगवान उनमा एक भटका देनेवावा शक्ति क मुकल्यो की वो झुठ कि भुरसो कर्या। ताकि मानसे सच्चाई कि भुरसो नी करता, वरना अनैतिकता छे खुश हुयसे छे वो सब दंड मिवछे।
दृढ बन रया
हे भाईस, आरू पोरबु क मोंगावु मानछे, जुवे कि हामु तुमरे विषय मा सदा यहोवा–भगवान क धन्यावाद करता रया, काहकि यहोवा–भगवान ने शुरू छे तुमू चुन लेदा कि चुखलो आत्मा क द्वारा चुखलो बने, आरू सच्चाई कि भुरसो करीन उध्दार देख्या। जिना क करता उनछे तुमू क जव खुश खबर सोमवाया क द्वारा बुलाया, कि तुमू हामरे पोरबु ईशु मसीह कि महिमा क सहभागी होय सके। एरकरीन हे भाईस, आरू बहनीस स्थिर रयो; आरू जो जो शिक्षा तुमू ने जूवे वचन या पत्री क द्वारा हामु छे सिख्या छे, तीनुक थाम रयो।
आमरो पोरबु ईशु मसीह आप ही, आरू हामरा बास यहोवा–भगवान, जो हामु छे मोंग राख्यो आरू फोकटन दया छे अमरकाय बढ़ावु आरू खरी आश देदी छे। तुमरे मन मा शांती देय आरू तुमरे हर एक वारला काम आरू वचन मा दृढ कर्या।
Source notes (2)
- Cross-reference 1 थिस्सलुनीकियो 4:15-17
- Cross-reference मत्ती 24:24
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.