परमेश्वरन सत्य वचन
1 थिस्सलुनीकियो 3
तीमुथियुस क मुकल्यो जाने
एरकरीन जव हामु छे आरू नी रया गया, तो हामु ने यो ठेराया कि एथेंस शहर मा एखलो रया जाय। आरू हामु ने तीमुथियुस क, जो मसीह क खुश खबर मा आमरो भाईस आरू यहोवा–भगवान क सेवक छे, एरकरीन मुकल्या कि वो तुमू स्थिर कर्या आरू तुमरे विश्वास क विषय मा तुमू समझाय। कि काही इन तकलीद क कारण डगमगा नी जाय। काहकि तुमू आप जानता होय कि हामु यो सताव यहोवा–भगवान की मरजी छे ही हामरे करता छे। काहकि पेहल ही जव हामु तुमरे याहा हुता तो तुमू छे कयो करता हुता कि हामु तकलीद झेलनो पड़्यो, आरू ओसो ही हुयो छे, जोसो कि तुमू जानता भी होय। इनीये कारण जव मखे छे आरू नी रया गया, तो तुमरे विश्वास क हाल जानने क करता तीमुथियुस मुकल्या, कि काही ओसो नी होय कि परीक्षा करनेवावा ने तुमरी परीक्षा करी होय, आरू हामरा मेहनत व्यर्थ होय गयो होयस।
तीमुथियुस द्वारा खबर मिवने
पर हिमी तीमुथियुस ने जो तुमरे साथे छे हामरे याहा आयो छे, तुमरे विश्वास खबर आरू मोंग क खबर सोमवाया आरू इनीये वात क भी सोमवाया कि तुमू सदा प्रेम क साथे हामु स्मरण करता होय, आरू हामरे देखने कि लालस राखता होय, जोसो हामु भी तुमू देखने की। एरकरीन हे भाईस, हामु ने आपने सब दुःख क आरू तकलीद मा तुमरे विश्वास छे तुमरे विषय मा बढ़ावु मिवी। काहकि हिमी यदि तुमू पोरबु मा स्थिर रया तो हामु जीवता छे। आरू जोसो हामु खुश तुमरे कारण आपने यहोवा–भगवान क सामने छे, ओका बदले तुमरे विषय मा हामु काही रीति छे यहोवा–भगवान क धन्यवाद कर्या? हामु रात दहाडू खुप ही प्रार्थना करता रयता छे कि तुमरे आमने सामने देखने आरू तुमरे विश्वास कि घटी पुरी कर्या।
हिमी हामरा यहोवा–भगवान आरू बास आप ही आरू हामरा पोरबु ईशु, तुमरे याहा आवने मा हामरी रस्तो उघाड्यो छे। आरू पोरबु ओसो कर्यो कि जोसो हामु तुमू छे मोंग राखता छे, ओसो हिय तुमरो प्रेम भी आपस मा आरू सब मानुस क साथे बढ़े, आरू बढ़ती करता जाय। ताकि वो तुमरो मनो क ओसो स्थिर कर्यो कि जव हामु हामरा पोरबु ईशु आपने सब चुखलो मानसे क साथे आयो, तो आप हामरे यहोवा–भगवान आरू बास क सामने निर्दोष ठराय।
Source notes (1)
- Cross-reference प्रेरितन 17:15
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.