Desiya Bible
ନିଆମିଆଁ 10
ସିଲ୍ ମାର୍ଲା ନିଅମର୍ ସାକି
ସିଲ୍ ମାରୁମନର୍ ନାଉଁର୍ ତାଲିକା ଏ ମନ୍ ଅଇଲାନି, ଅକଲିଅର୍ ପିଲା ନିଇମିଆ ସାସନ୍କାରିଆ ଆରି ସିଦିକିଅ; ସରାଅ, ଅସ୍ରିଅ, ଜିରିମିଅ; ପସ୍ଉର, ଅମରିଅ, ମଲ୍କିଅ; ଅଟୁସ୍, ସବନିଅ, ମଲୁକ୍; ଆରିମ୍ , ମରେମତ୍, ଅବଦିଅ; ଦାନିଏଲ୍, ଗିନ୍ତନ୍, ବାରୁକ୍; ମସୁଲମ୍, ଅବିଅ, ମିଆମିନ। ମାସିଅ ବିଲ୍ଗଇ, ସମରିଅ, ଏମନ୍ ବଡ୍ ପୁଜାରିମନ୍ ରଇଲାଇ। ଆରି ଲେବିଅମନ୍,କଇବାକେ ଗାଲେ ଅସନିଅର୍ ପିଲା ଜେସୁଅ; ଏନାଦଦର୍ ପଲା ବିତ୍ରେ ବିନୁଇ ଆରି କଦ୍ମିଏଲ୍। ଆରି , ସେମନର୍ ବାଇମନ୍ ସବନିଅ, ଅଦିଅ, କଲିଟ, ପଲାଅ, ଆନନ୍; ମିକା, ରଅବ, ଅସବିଅ; ସକୁର୍, ସେରେବିଅ,ସବନିଅ; ଅଦିଅ, ବାନି, ବନିନୁ। ଲକ୍ମନର୍ ମୁକିଆ, ପରିଅସ୍, ପଅତ୍ ମଆବ,ଏଲମ୍; ସତୁ, ବାନି; ବୁନି, ଅସଗବଦ୍, ବେବଇ; ଆଦନିଅ ବିଗ୍ବଇ,ଆଦିନ; ଆଟେର, ଇଜକିଅ, ଅସୁର; ଅଦିଅ, ଅସୁମ, ବେତ୍ସଅର୍, ଆରିପ୍, ଅନାତତ୍, ନବଅ; ମଗିଅସ୍, ମସୁଲମ୍, ଏସିର; ମସେସବେଲ୍,ସାଦକ୍, ଜଦୁଅ; ପଲାଟିୟ, ଆନନ୍, ଅନାଇଅ; ଅସେଅ, ଅନାନିଅ, ଅସୁବ୍; ଅଲ୍ଏସ୍, ପିଲଅ, ସବେକ; ରଉମ୍, ଅସବାନା, ମାସେଅ, ଆରି ଅଇୟ, ଆନନ୍, ଅନାନ୍; ମଲୁକ୍, ଆରିମ୍, ବାନା ।
ନିଅମର୍ ଦାଇତ୍
ଆରି ଲକ୍ମନର୍ ବିତ୍ରେ ଅନି ଜେତ୍କି ଲକ୍ ରଇଲାଇ କେତେଟା ମୁକିଅ ଜାଜକ୍ମନ୍, ଲେବିଅମନ୍, ବାଟ୍ଜାଗୁଆଲ୍ମନ୍, ଗିତ୍ଗାଇବା ଲକ୍,ମନ୍ଦିର୍ ସେବା କାମ୍ କରୁମନ୍ ଆରି ଜେନ୍ତି ଲକ୍ମନ୍ମିସା ବିନ୍ବିନ୍ ଦେସର୍ କୁଟୁମ୍ଟାନେ ଅନି ତମ୍କେ ଅଲ୍ଗା ବାଚିକରି ପର୍ମେସରର୍ ନିଅମ୍ ମାନି ଚଲ୍ତେ ରଇଲାଇ, ସେମନ୍ ସେମନର୍ ମାଇଜିମନ୍ ପିଲାଟକି ଆରି ବୁଦି ଗିଆନ୍ ରଇଲା ଲକ୍; ସେମନ୍ ନିଜର୍ ବାଇମନ୍କେ, ନିଜର୍ ନେତା ଲାଗି ଲାଲାଇ ଅଇ ପର୍ମେସରର୍ ଦାସ୍ ମସାର୍ ଲାଗି କରା ଅଇରଇବା ପର୍ମେସରର୍ ନିଅମ୍ ଅନୁସାରେ ଜିଇବା କାଇବାକେ ଆରି ଆମର୍ ସବୁବେଲର୍ ମାପ୍ରୁର୍ ସବୁ ଆଦେସ୍ ଆରି ସାସନ୍ ଆରି ରିତିନିତି ତେଇ ମନ୍ଦେଇ କରି ପାଲ୍ବାକେ, ପର୍ମାନ୍ କରି କାତା ଦେଇରଇଲା। ଆରି ସେମନ୍ କଇଲାଇ, ଆମେ ଅଲ୍ଗା ଦେସର୍ ଲକ୍ମନ୍କେ ଆମର୍ ଟକିମନ୍କେ ନ ଦେଉଁ, କି ଆମର୍ ପିଲାମନର୍ ପାଇ ସେମନର୍ ଟକିମନ୍କେ ନ ଆନୁ।
ଆରି ସେ ଦେସର୍ ଲକ୍ମନ୍ ବିସ୍ରାମ୍ବାରେ କାଇ ଜିନିସ୍ ମିସା ବିକ୍ବାକେ ଆନ୍ଲେ, ଆମେ ବିସ୍ରାମ୍ ଦିନେ କି ଅଲ୍ଗା କନ୍ ସୁକଲ୍ ଦିନେ ସେମନର୍ ତେଇଅନି ସେଟା ନ ଗେନୁ; ଆରି ସାତ୍ ବରସ୍କେ ତରେକ୍ ସବୁ ରକାମର୍ ରୁନ୍ ଆଦାଇ କର୍ବାକେ ଚାଡି ଦେବୁ ଆରି ସେ ବରସେ ତାସ୍ କର୍ବାଟା ମିସା ଚାଡି ଦେବୁ । ଆରି, ଆମେ ତମର୍ ନିଜର୍ ପର୍ମେସରର୍ ସେବା କାମ୍ କର୍ବାକେ, ଆରି, ଦର୍ସନିଅ ରୁଟିର୍ ଆରି ସବୁ ଦିନର୍ କାଇବା ନଇବେଦିଅ ଆରି ସବୁ ଦିନର୍ ଅମ୍ବଲିର୍, ବିସ୍ରାମ୍ ବାରର୍, ଉଆଁସ୍ ରାତିର୍ ଟିକ୍ ବେଲାଇ ଆରି ସୁକଲ୍ ଜିନିସର୍ ଆରି ଇସ୍ରାଏଲର୍ ପାପ୍ କେମା ବଲି ଆରି ଆମର୍ ପର୍ମେରର୍ ଗରର୍ ସବୁ କାମର୍ ପାଇ ସବୁ ବର୍ସେ ଗଟେ ଗଟେ ସେକଲର୍ ତିନ୍ ବାଗ୍ ଦାନ୍ କର୍ବା ବଜ୍ ନିଜର୍ ଉପ୍ରେ ନେବାକେ ନିଅମ୍ କଲୁ ।
ଆରି, ବେବସ୍ତାର୍ ଲେକ୍ବା ଇସାବେ ସବୁବେଲର୍ ମାପ୍ରୁ ଆମର୍ ପର୍ମେସରର୍ ଜଗିଅ ବେଦି ଉପ୍ରେ ଜଇ ଡସାଇଲାକେ ଆମର୍ ବାବାର୍ ବଁସ୍ ଇସାବେ ବରସ୍କେ ବରସ୍ ସମାନ୍ ବେଲାଇ ଆମର୍ ପର୍ମେସର୍ ଗରେ ଦାରୁ ଆନ୍ବାକେ ଆମେ, ଆରି ଜାଜକମନ୍, ଲେବିଅମନ୍ ଆରି ଲକ୍ମନ୍ ଦାରୁଦେବା ବିସଇରେ କେଡ୍ ପୁଟାଇଲୁ ।
ଆରି, ଆମର୍ ଜମିର୍ ପର୍ତୁମ୍ ଅଇଲା ପସଲ୍ ଆରି ବିନ୍ ବିନ୍ ରକାମର୍ ଗଚର୍ ପର୍ତୁମର୍ ପଲ୍ ବରସ୍କେ ବରସ୍ ସବୁବେଲର୍ ମାପ୍ରୁର୍ ପାର୍ତନା ଗରେ ଆନ୍ବାକେ,
ଅଇଲେମିସା ବେବସ୍ତା ଲେକ୍ବା ଇସାବେ ଆମର୍ ପିଲାମନର୍ ଆରି ପସୁମନର୍ ପର୍ତୁମ୍ ଜାତ୍ ଅଇଲାଟା ଆରି ଆମର୍ ଗରୁ ରାସିର୍ ଆରି ମେଣ୍ଡା ରାସିର୍ ପର୍ତୁମ୍ ପାକାଇଲାଟାମନ୍କେ ଆମର୍ ପର୍ମେସରର୍ ଗରର୍ ପାଇ, ଆମର୍ ପର୍ମେସରର୍ ପାର୍ତନା ଗରେ କାମ୍ କର୍ବା ଲକ୍ମନ୍ ଜାଜକ୍ମନର୍ ଲଗେ ଆନ୍ବାକେ, ଆରି, ଆମର୍ ଚକଟ୍ଲା ମଇଦାର୍ ଦସମାଉସ୍ ଆରି ଆମର୍ ନିଜର୍ ଇଚାର୍ ପୁରୁସ୍କାର୍ ଆରି ସବୁ ରକାମର୍ ଗଚର୍ ପଲ୍, ଅଙ୍ଗୁର୍ ରସ୍ ଆରି ଚିକନ୍ ଜାଜକ୍ମନର୍ ଲଗେ ଆମର୍ ପର୍ମେସରର୍ ଗର୍ ବିତ୍ରେ ଆନ୍ବାକେ, ଆରି ଜମି ଅନି ପାଚ୍ଲା ପସଲର୍ ଦସମାଉସ୍ ଲେବିଅମନର୍ ଲଗେ ଆନ୍ବାକେ ବିଚାର୍ କଲୁ; କାଇକେବଇଲେ ସେ ଲେବିଅମନ୍ ଆମର୍ ସବୁ ତାସ୍ ନଅଁରର୍ ଦସ୍ମାଉଁସ୍ ଆଦାଇ କର୍ବାଇ । ମାତର୍ ଲେବିଅମନ୍ ଦସମାଉସ୍ ଆଦାଇ କର୍ବାବେଲେ ଆରଣର୍ ପିଲାମନ୍ ଜାଜକ୍ ଲେବିଅମନର୍ ସଙ୍ଗେ ରଇସି; ଆରି ଲେବିଅମନ୍ ପର୍ମେସରର୍ ପାର୍ତନା ଗରର୍ ଗୁଦାମ୍ ଗରେ ଦସ ମାଉସ୍ ଆନ୍ବାଇ । କାଇକେବଇଲେ ସୁକଲ୍ ଜାଗାର୍ ସର୍ତେ ଗିନା ଆରି ସେବା କାମ୍ କରୁ ଜାଜକମନ୍, ଆରି ଦୁଆର୍ ଜାଗୁମନ୍ ଆରି ଗିତ୍ ଗାଇବା ଲକ୍ମନ୍ ଜନ୍ ସବୁ ଗରେ ରଇସି, ତେଇ ଇସ୍ରାଏଲ୍ ପିଲାଟକିମନ୍ ଆରି ଲେବିଅ ପିଲାଟକିମନ୍ ତାସର୍, ଅଙ୍ଗୁର୍ ରସର୍ ଆରି ନିଜର୍ ଇଚାର୍ ଚିକନର୍ ଚାନ୍ଦା ଆନ୍ବାଇ; ଆରି ଆମେ ଆମର୍ ନିଜର୍ ପର୍ମେସରର୍ ପାର୍ତନା ଗର୍ ନ ଚାଡୁ ।
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.