Desiya Bible
ଆଦି 32
ଜାକୁବ ଏସକେ ବେଟ୍ ଅଇବାକେ ତିଆର୍
ତାର୍ପଚେ ଜାକୁବ୍ ବାଟ୍, ଇଣ୍ଡ୍ଲା ବେଲେ, ପର୍ମେସରର୍ ଦୁତ୍ ମନ୍ ତାର୍ସଙ୍ଗେ ବେଟ୍ ଅଇଲାଇ । ସେଡ୍କିବେଲେ ଜାକୁବ୍ ସେମନ୍କେ ଦେକି କଇଲା, ଏମନ୍ ପର୍ମେସରର୍ ଦଲ୍, ସେଟାର୍ ପାଇଁ ସେଜାଗାର୍ ନାଉଁ ମଅନିୟମ୍ ଦୁଇ ଦଲ୍1 ସଙ୍ଗଇଲା । ତାର୍ପଚେ ଜାକୁବ୍ ନିଜର୍ ଆଗେ ସେଇର୍ ଦେସର୍ ଇଦମ୍ ଏରିଆ ଲଗେ ବାଇ ଏସର୍ ଲଗେ ଦୁତ୍ମନ୍କେ ପାଟାଇଲା । ଆରି ସେ ସେମନ୍କେ ଏ ଆଦେସ୍ ଦେଲା, ତମେମନ୍ ଆମର୍ ମାପ୍ରୁ ଏସକେ କଇସା, ତମର୍ ଦାସ୍ ଜାକୁବ୍ ତମ୍କେ ଜାନାଇଲା, ମୁଇଁ ଲାବନର୍ ପାକେ ବାସ୍ କର୍ତେ ରଇଲି, ଆଜି ପତେକ୍ ମର୍ ଲେଟ୍ ଅଇଲା । ମର୍ ବଲଦ୍, ଗଦ, ଚେଲି ମେଣ୍ଡା ଆରି ଦାସ୍ ଦାସି ଆଚତ୍, ଆରି ମୁଇଁ ମର୍ ମାପ୍ରୁର୍ ଆଁକି ଲଗେ ଆସିର୍ବାଦ୍ ପାଇବାକେ ତମର୍ ପାକେ କବର୍ ପାଟାଇଲି ।
ତାର୍ପଚେ ଦୁତ୍ମନ୍ ବାଉଡି ଆସି ଜାକୁବ୍କେ କଇଲାଇ, ଆମେମନ୍ ତମର୍ ବାଇ ଏସର୍ ପାକେ ଜାଇରଇଲୁ, ସେ ଚାର୍ସ ଲକର୍ ସଙ୍ଗେ ମିସି ତମର୍ ସଙ୍ଗ୍ ବେଟ୍ ଅଇବାକେ ଆଇଲାଇନି । ତାର୍ପଚେ ଜାକୁବ୍ ପୁରା ଡରି ଗାଲା ଆରି ଚିନ୍ତା କଲା, ଆରି ତାର୍ ସଙ୍ଗେ ଗାଲା ଲକ୍ ମନ୍କେ ଆରି ଜେତ୍କି ରଇଲା ଗାଇ ଗରୁ ଆରି ଉଁଟ୍ ମନ୍କେ ଦୁଇ ଦଲ୍ କରି କଇଲା, ଏସ ଆସି କରି ଜଦି ଗଟେକ୍ ଦଲ୍କେ ମାର୍ସି, ମିସା ଅଇଲେ ଅଲ୍ଗା ଦଲର୍ ଲକ୍ ବଞ୍ଚିକରି ପାଲାଇବାଇ, ସେଡ୍କିବେଲେ ଜାକୁବ୍ କଇଲା, ଏ ମର୍ ବାବା ଅବ୍ରାମର୍ ପର୍ମେସର୍, ଏ ମର୍ ବାବା ଇସାକର୍ ପର୍ମେସର୍, ଏ ସବୁବେଲର୍ ମାପ୍ରୁ ତମେ ନିଜେ ମକେ କଇ ରଇଲାସ୍, ତମେ ନିଜର୍ ଦେସେ ଆରି ତମର୍ କୁଟୁମର୍ ଲଗେ ବାଉଡି ଜା, ତାର୍ପଚେ ଆମେ ତମର୍ ମଙ୍ଗଲ୍ କର୍ବୁ । ତମେ ଏ ଦାସର୍ ପାଇଁ ସବୁ ଦୟା ଆରି ସବୁ ମାନ୍ମର୍ଜିତା ଜାନାଇ ଲାସ୍ନି , ମୁଇଁ ସେ ଲଗର୍ କାଇଟା ମିସା ପାଇବାର୍ ଜଗିଅ ନାଇଁ କାଇକେ ବଇଲେ ମୁଇଁ ନିଜର୍ ଦାର୍ଲା ଡାଙ୍ଗ୍ ସେ ଦାରି ଏ ଜର୍ଦନ୍କେ ଡେଇକରି ଜାଇ ରଇଲି, ମାତର୍ ଏବେ ମୁଇଁ ଦୁଇ ଦଲ୍ ଅଇଆଚି । ବାବୁଜିଆ କଲିନି, ମର୍ ବାଇର୍ ଆତେ ଅନି, ଏସର୍ ଆତେ ଅନି ରକିଆ କରା, କାଇକେ ବଇଲେ ମୁଇଁ ତାକେ ଡର୍ଲିନି, କେ ଜାନେ କେଡେ ବେଲେ ସେ ଆସି କରି ମକେ ଆରି ମାକେ ଆରି ପିଲାଟକି ମନ୍କେ ମର୍ତେ ମାରି ଦେଇସି । ତମେ ତ କଇଆଚାସ୍, ଆମେ ଜେନ୍ତି ଅଇଲେ ମିସା ତମର୍ ମଙ୍ଗଲ୍ କର୍ବୁ, ଆରି ସମ୍ଦୁରେ ବାଲି ବେସି ରଇସି ସେଟାର୍ ପାଇଁ ଇସାବ୍ କରି ନ ଅଏ, ତାର୍ପାରା ତମର୍ କୁଲ୍କେ ମିସା ବଡାଇବି ।
ଆରି ଜାକୁବ୍ ସେ ରାତି ସେ ଜାଗା ଲଗେ ସଇଲା, ଆରି ତାର୍ଲଗେ ଜାଇଟା ରଇଲା, ସିତି ଅନି ନିଜର୍ ବାଇ ଏସର୍ ପାଇଁ ଦାନ୍ ଦେବାକେ ତିଆର୍ କଲା। ଆରି, ଦୁଇସଟା ମାଇଚେଲି ଆରି କଡେଟା ଗାଡ୍ରା ଚେଲି, ଦୁଇସଟା ମାଇ ମେଣ୍ଡା ଆରି କଡେଟା ଗାଡ୍ରା ମେଣ୍ଡା, ଆରି ତିରିସ୍ଟା ପାକାଇଲା ଉଁଟ୍ ଚାଲିସ୍ଟା ଗାଇ ଆରି ଦସ୍ଟା ବଲଦ୍, ଆରି କଡେଟା ମାଇ ଗଦ ଆରି ଦସ୍ଟା ଗଦପିଲା ମନ୍ ଦେବାକେ ଇଚା କଲା । ତାର୍ପଚେ ସବୁ ଗାଇ ଗରୁ ଚେଲି ମେଣ୍ଡା ଅଲ୍ଗା ଅଲ୍ଗା କରି ନିଜର୍ ଦାସ୍ ମନର୍ ଆତେ ଗଟେକ୍ ରାସି ସର୍ପି ଦେଇକରି ସେମନ୍କେ ଆଦେସ୍ ଦେଲା, ତମେ ମର୍ ଆଗେ ଆଗେ ଜା, ଆରି ମଜାଇମଜାଇ ଜାଗା ଚାଡିକରି ସେ ସବୁ ରାସିକେ ଅଲ୍ଗା ଅଲ୍ଗା କରା । ଆରି ସେ ସବୁ ଇଣ୍ଡ୍ବା ଦାସ୍ ମନ୍କେ ଏ ଆଦେସ୍ ଦେଲା, ମର୍ ବାଇ ଏସଉ ସଙ୍ଗେ ଜଦି ବେଟ୍ ଅଇଲେ, ସେ ଜଦି ପାଚାର୍ଲେ ପାଚାରି ପାରେ , ତମେ କାର୍ ଦାସ୍ ? କେନେ ଗାଲାସ୍ନି ? ଆରି ତମର୍ ଏ ସବୁଜାକ କାର୍ଟା ? ତେବେ ତୁଇ ଉତର୍ ଦେଇସୁ, ଏ ସବୁ ତର୍ ଦାସ୍ ଜାକୁବର୍, ଏ ସବୁ ଦିନ୍ସୁ ଆମର୍ ମାଲିକ୍ ଏସଉ ପାଇଁ ପାଟାଇ ଆଚେ; ଦେକା ସେ ମିସା ପଚେ ପଚେ ଆଇଲାନି । ଏ ପର୍କାର୍ ସେ ଦୁଇଟା ଆରି ତିନିଟା ରାସିର୍ ପଚର୍ ସବୁ ଦାସ୍ ମନ୍କେ ଆଦେସ୍ ଦେଇ କଇଲା, ଏସଉ ସଙ୍ଗ୍ ବେଟ୍ ଅଇଲେ, ତମେମନ୍ ଏନ୍ତି ବଲିକରି କଇସା । ଆରି କଇସା, ଦେକା, ତମର୍ ଦାସ୍ ଜାକୁବ୍ ଆମର୍ ପଚେ ଆଇଲାନି, କାଇକେ ବଇଲେ ଏତାଇଲା, ଆଗେ ଏସବୁ ଜିନିସ୍ ପତର୍ ପାଟାଇ ତାକେ ସାନ୍ତି କରି ପଚେ ତାର୍ ସଙ୍ଗେ ବେଟ୍ ଅଇବି, ତାର୍ପଚେ ସେ ଆମର୍ ପାଇଁ ନିଜର୍ କଲେ କର୍ସି କାଇକି । ଏ ରକାମ୍ ତାର୍ ଆଗେ ଚାନ୍ଦା ପାଟାଇଲା । ମାତର୍ ସେ ନିଜେ ସେ ରାତି ନିଜର୍ ଦଲ୍ ସଙ୍ଗେ ରଇଲା ।
ପର୍ମେସରର୍ ସଙ୍ଗେ ଜାକୁବର ମଲ୍ ଜୁଇଦ୍
ତାର୍ପଚେ ସେ ରାତି ଉଟି ନିଜର୍ ଦୁଇଟା ମାଇଜିକେ ଆରି ଦୁଇଟା ଦାସି ଆରି ଏଗାରଟା ପିଲା ମନ୍କେ ଜବକ୍ ଗାଡ୍ ଲଗେ ଲଙ୍ଗାଇବାକେ ସଙ୍ଗେ ଗାଲା । ଆରି ସେମନ୍କେ ଗାଡ୍ ଲଙ୍ଗାଇ କରି ନିଜର୍ ସବୁ ସାମାନ୍ ସେପାଟେ ପାଟାଇ ଦେଲୁ । ସେଡ୍କିବେଲେ ଜାକୁବ୍ ସିତି ଗଟେ ଲକ୍ ରଇଲା, ତାର୍ପଚେ ଗଟେକ୍ ମୁନୁସ୍ ପିଲା ସାକାଲ୍ ପାଇବା ଜାକ ତାର୍ ମଲ୍ ଜୁଇଦ୍ କଲା । ମାତର୍ ତାର୍ ସଙ୍ଗେ ଜିତି ନାପାର୍ଲାଟା ଦେକି ସେ ଜାକୁବର୍ ଜଙ୍ଗ୍କେ ଚିରି ପାକାଇଲା, ତାର୍ ସଙ୍ଗ୍ ଏ ରକାମ୍ ମଲ୍ଜୁଇଦ୍ କଲାକେ ଜାକୁବର୍ ଜଙ୍ଗ୍ର୍ ସନ୍ଦିଆଡ୍ ପିଟ୍କି ଗାଲା। ତାର୍ପଚେ ସେ ମୁନୁସ୍ ପିଲା କଇଲା, ମକେ ଚାଡ୍, କାଇକେ ବଇଲେ ସାକାଲ୍ ପାଇଲା । ତାର୍ପଚେ ଜାକୁବ୍ କଇଲା, ତୁଇ ମକେ ଆସିର୍ବାଦ୍ ନ କଲେ, ମୁଇଁ ତକେ ନ ଚାଡି । ଆରି ତରେକ୍ ସେ ମୁନୁସ୍ ପିଲା କଇଲା, ତର୍ନାଉଁ କାଇ ନାଉଁ ? ସେ କଇଲା ଜାକୁବ୍ । ସେ କଇଲା, ତୁଇ ଜାକୁବ୍ ନାଉଁ ଆରି ଡାକ୍ପୁଟା ନ ଅଏ, ମାତର୍ ଇସ୍ରାଏଲ୍ ନାଉଁରେ ଡାକ୍ପୁଟା ଅଇସି; କାଇକେ ବଇଲେ , ତମର୍ ପରମେସର୍ ଆରି ମୁନୁସ୍ ସଙ୍ଗ୍ ଜୁଇଦ୍ କରି ଜିତ୍ଲାସ୍ ଆଚେ।
ସେଡ୍କିବେଲେ ଜାକୁବ୍ ପାଚାରି କଇଲା, ମୁଇଁ ବାବୁଜିଆ କଲିନି, ତମର୍ ନାଉଁ କେ ସେ କଇଲା, ତୁଇ କାଇକେ ମର୍ ନାଉଁ ପାଚାର୍ଲୁସ୍ନି ? ତାର୍ପଚେ ସେ ସିତି ଜାକୁବ୍ କେ ଆସିର୍ବାଦ୍ କଲା ।
ସେଡ୍କିବେଲେ ସେ ଜାଗାର୍ ନାଉଁ ପେନିଏଲ୍2 ବଲି ସଙ୍ଗ୍ଇଲା, ସେଟାର୍ ପାଇଁ ସେ କଇଲା, ମୁଇଁ ପର୍ମେସର୍ କେ ମୁଆଁ ମୁଇଁ ଦେକ୍ଲେ ମିସା ମର୍ ଜିବନ୍ ବଁଚିଆଚେ । ତାର୍ପଚେ ଜାକୁବ ପନୁଏଲ୍ ଡେଇକରି ଗାଲା ବେଲେ , ବେଲ୍ ଉଦ୍ଲା , ମାତର୍ ତାର୍ ଜଙ୍ଗର୍ ଆଡ୍ ପିଟ୍କି ରଇଲାକେ ଚଟା ଚାଟା ଅଇ ଇଣ୍ଡ୍ଲା । ସେଟାର୍ ପାଇଁ ଇସ୍ରାଏଲର୍ ପିଲାମନ୍ କନ୍ମିସା ଉର୍ଦେସର୍ ଉପ୍ରର୍ ଜଙ୍ଗର୍ ମାଉଁସ୍ ନ କାଅତ୍, କାଇକେ ବଇଲେ ଉର୍ଦେସର୍ ଜାକୁବର୍ ଜଙ୍ଗ୍କେ ପର୍ମେସର୍ ଚିରି ରଇଲା ।
Source notes (2)
- Footnote ଦୁଇ ଦଲ୍
- Footnote ପର୍ବୁର୍ ମୁଁ
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.