Desiya Bible
ଆଦି 14
ଅବ୍ରାମ୍ ଲତକେ ଉଦାର୍ନା
ତାର୍ପଚେ ସିନିୟରର୍ ଅମ୍ରାପଲ୍ ରାଜା ଆରି ଇଲାସରର୍ ଅରିୟକ୍ ରାଜା ଆରି ଏଲମର୍ କଦର୍ଲାୟମର୍ ରାଜା ଆରି ଗୟିମର୍ ତିଦିଅଲ୍ ରାଜାର୍ ଅଦିକାର୍ ବେଲେ , ଏମନ୍ ସଦମର୍ ରାଜା ବିରା ଆରି ଅମରାର୍ ରାଜା ବିର୍ସା ଆରି ଅଦ୍ମାର୍ ରାଜା ସିନାବ୍ ଆରି ସୟରର୍ ରାଜା ସବଇବ୍ର୍ ରାଜା ସିମେବର୍ ଆରି ବିଲାର୍, ସଙ୍ଗ୍ ଜୁଇଦ୍ କଲାଇ । ଏ ସବୁ ଲକ୍ ସିଦମର୍ ପଦାଇ, ନୁନ୍ ସମ୍ଦୁର୍ ଲଗେ ମିସି ରଇଲାଇ । କାଇକେ ବଇଲେ ସେମନ୍ ବାର ବରସ୍ ଜାକ କଦର୍ଲାଅମର୍ ରାଜାର୍ ତଲିଆ ରଇ ତେର ବରସ୍ ଜାକ ତାକର୍ ସଙ୍ଗେ ବିରଦ୍ ଅଇ ରଇଲାଇ , ତାର୍ପଚେ ଚଉଦ ବରସେ କଦର୍ଲାୟମର୍ ରାଜା ଆରି ତାକର୍ ସଙ୍ଗର୍ ରାଜାମନ୍ ଆସି ଅସ୍ଟରତ୍ କର୍ନ୍ୟିମ ତେଇ ରପାଇଅ ଲକ୍ମନ୍କେ ଆରି ଆମର୍ ସୁସିଅ ଲକ୍ମନ୍କେ ସାବିକିରିଅ ତମିଅ ତେଇ ଏମିୟ ଲକ୍ମନ୍କେ , ଆରି ଡଙ୍ଗର୍ ପାକର୍ ଏଲ୍ପାରଣ ଜାକ ସେଇର ଡଙ୍ଗର୍ ତେଇ ରଇବା ଅରିୟ ଲକ୍ମନ୍କେ ଜିତାଇ ଲାଇ । ଆରି ସେମନ୍ ସେ ଜାଗାଇ ଅନି ବାଉଡି ଏନ୍ପିସ୍ପଟ୍, କଇବାକେ ଗାଲେ, କାଦେସକେ ଜାଇ ଆମାଲେକିଅ ଲକ୍ମନର୍ ସବୁ ଦେସ୍ ଆରି ଅତ୍ ସସନ୍ ତାମର୍ ତେଇ ବାସାଅଇ ରଇବା ଇମରିୟ ଲକ୍ମନ୍କେ ଆରାଇ ଦେଲାଇ । ସେଟାର୍ ପାଇ ସଦମର୍ ରାଜା ଆରି ଅମରାର୍ ରାଜା ଆରି ଅଦ୍ମାର୍ ରାଜା ଆରି ସବଇମର୍ ରାଜା ଆରି ବିଲାର୍ ଆରି ସୟରର୍ ରାଜା, ଏ ପାଞ୍ଚ୍ଟା ରାଜାମନ୍ ମିସି କରି, ଏଲମର୍ କଦର୍ଲାଇମର୍ ରାଜା ଆରି ଗଇମର୍ ତିଦିଅଲ୍ ରାଜା ଆରି ସିନିଅରର୍ ଅମ୍ରାପଲ୍ ରାଜା ଆରି ଇଲାସରର୍ ଅରିଅକ୍ ରାଜା, ଏ ଚାର୍ଟା ରାଜାର୍ ସଙ୍ଗ୍ ସିଦିମ୍ ପଦାଇ ଜୁଇଦ୍ କର୍ବାକେ ଲାଗ୍ଲାଇ । ସେ ସିଦିମ୍ ପଦାର୍ ଚିକଟ୍ ମାଟି ରୁଣ୍ଡାଇ ନେଇ ରଇଲା କାଲ୍ ରଇଲା? ସଦମ୍ ଆରି ଅମରାର୍ ରାଜାମନ୍ ପାଲାଇ ଜାଉଁ ଜାଉଁ ସେ କାଲେ ଅଦର୍ ଲାଇ, ଆରି ଜେତେକ୍ ଲକ୍ମନ୍ ତେଇ ରଇଲାଇ, ସେମନ୍ ଡଙ୍ଗର୍ ଉପ୍ରେ ପାଲାଇ ଲାଇ । ତାର୍ପଚେ ସେମନ୍ ସଦମ୍ ଆରି ଅମରାର୍ ସର୍ତେ ଦନ୍ସଁପତି ଆରି କାଦିକଣ୍ଡା ଚାଡାଇ ବଇ ନେଲାଇ। ଆରି ଅବ୍ରାମର୍ ପୁତ୍ରା ସଦମ୍ ତେଇ ବାସା ଅଇ ରଇଲା, ଲତକେ ଆରି ତାକର୍ ସବୁ ଦନ୍ସଁପତିକେ ଦାରିଉଟି ଗାଲାଇ । ସେଡ୍କିବେଲେ ଗଟେକ୍ ପଲାତକ୍ ଆସି ଏବ୍ରିଅ ଅବ୍ରାମ୍କେ କବର୍ ଦେଲା, ସେ ବେଲେ ଅବ୍ରାମ୍ ଆରି ଇସ୍କଲର୍ ଆରି ଆନେରର୍ ବାଇ ଇମରିଅ ମମରିର୍ ଅଲନ୍ ଗଚ୍ବୁନ୍ଦେ ବାସା ଅଇ ରଇଲାଇ ଆରି ସେମନ୍ ଅବ୍ରାମର୍ ସଙ୍ଗାରି ମନ୍ ରଇଲାଇ । ସେଡ୍କିବେଲେ ଅବ୍ରାମ୍ ନିଜର୍ ଜାତିର୍ ଲକ୍ ଦାରାଇ ଅଇ ଜିବାଟା କବର୍ ସୁନ୍ଲା ଦାପ୍ରେ ସିକ୍ଲା ନିଜର୍ ଗରେ ଜାତ୍ ଅଇଲା ତିନ୍ସଅ ଅଟ୍ର ଲକ୍କେ ସଙ୍ଗେ ଡାକି ସତ୍ରୁ ମନର୍ ପଚ୍ପଚ୍ ପାଲାଇ ଦାନ୍ ନଅଁର୍ ଜାକ ଗାଲାଇ । ତାର୍ପଚେ ସେ ନିଜର୍ ଦାସ୍ମନ୍କେ ଦୁଇଦଲ୍ କରି ରାତିଆ ବେଲେ ସତ୍ରୁ ମନ୍କେ ମାର୍ବାକେ ଗାଲାଇ, ସେମନ୍ ସେମନ୍କେ ଆରାଇ କରି ଦମେସ୍କର୍ ଉତର୍ବାଟେ ଆଇବା ଜାକ ସେମନର୍ ପଚ୍ପଚ୍ କେଦ୍ଲାଇ । ଚାଡାଇ ନେଇ ରଇଲା ସବୁ ଦନ୍ସଁପତି ଆରି ନିଜର୍ ଜାତି ଲତ ଆରି ତାର୍ ଦନ୍ସଁପତି, ଆରି ମାଇଜିମନ୍ ଆରି ଲକ୍ମନ୍କେ ବାଉଡାଇ ଆନ୍ଲାଇ ।
ମଲ୍କିସେଦକ ଅବ୍ରାମ୍କେ ଆସିର୍ବାଦ୍
ଏନ୍ତାରି ଅବ୍ରାମ୍ କଦର୍ଲାୟମର୍କେ ଆରି ତାକର୍ ସାଇଜ କଲା ରାଜାମନ୍କେ ଜିତାଇ କରି ବାଅଡ୍ଲା ପଚେ ସଦମର୍ ରାଜା ତାକର୍ ସଙ୍ଗେ ବେଟ୍ ଅଇବାକେ ସାବି ପଦାଇ ଇଣ୍ଡି ଗାଲାଇ । ଆରି ସାଲମର୍ ରାଜା ମଲ୍କିସେଦକ୍ ରୁଟି ଆରି ଅଙ୍ଗୁର୍ ରସ୍ ଦାରି ଆଇଲାଇ, ସେ ସବୁର୍ ତେଇ ଅନି ବଡ୍ ପର୍ମେସରର୍ ପୁଜାରି, ସେ ଅବ୍ରାମ୍କେ ଆସିର୍ବାଦ୍ କରି କଇଲା, ଅବ୍ରାମ୍ ସରଗ୍ ଆରି ପୁର୍ତିବିର୍ ଅଦିକାରି ସବୁର୍ ତେଇଅନି ବଡ୍ ପର୍ମେସରର୍ ଆସିର୍ ବାଦର୍ ଲକ୍ ଅଅ, ସବୁର୍ ତେଇଅନି ବଡ୍ ପର୍ମେସର୍ କରମ୍ ଅଅ, ସେ ତମର୍ ସତ୍ରୁ ମନ୍କେ ତମର୍ ଆତେ ସର୍ପିଦେଲା । ସେଡ୍କିବେଲେ ଅବ୍ରାମ୍ ସବୁ ଲକର୍ ଦସମାସ ତେଇ ଅନି ବାଗେକ୍ ମଲ୍କିସାଦକ୍କେ ଦେଲାଇ । ତାର୍ପଚେ ସଦମର୍ ରାଜା ଅବ୍ରାମ୍କେ କଇଲା, ତମେ ସବୁ ଦନ୍ସଁପତି ନିଆ, ମାତର୍ ଆମର୍ ଲକ୍ମନ୍କେ ଆମ୍କେ ଦିଆ । ତାର୍ପଚେ ଅବ୍ରାମ୍ ସଦମର୍ ରାଜାକେ ଉତର୍ ଦେଲା, ମୁଇଁ ସରଗ୍ ଆରି ପୁର୍ତିବିର୍ ଅଦିକାରି ସବୁବେଲର୍ ମାପ୍ରୁ ବଡ୍ ପର୍ମେସରର୍ ଆଦେସ୍ ଇସାବେ ସପତ୍ କରି କଇଆଚି ଜେ, ମୁଇଁ ତମର୍ କାଇଟା ନ ନେଇ, କଣ୍ଡେକ୍ ସୁତାକି ପାଣ୍ଡଇର୍ ପିତା ମିସା ନ ନେଇ, ପଚେ ଆରି ତମେ କାଇକେ କଇସା, ଆମେ ଅବ୍ରାମ୍କେ ସାଉକାର୍ କରିଆଚୁ । ଏତ୍କି ଜେ ମର୍ ଦାଙ୍ଗ୍ଡାମନ୍ ଜାଇଟା କାଇ ଆଚତ୍, ସେଟା ନେବି, ଆରି ମର୍ ଜନ୍ ସାଇଜକଲା ଲକ୍ ମର୍ ସଙ୍ଗେ ଜାଇ ରଇଲାଇ, ସେମନ୍ ଅଇଲାଇନି , ଆନେର ଆରି ଇସ୍କଲ୍ ଆରି ମମ୍ରି ନିଜର୍ ନିଜର୍ ପାଇବା ବାଗ୍ ପାଅତ୍ ।
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.