Desiya Bible
ଆଦି 10
ନଅର୍ ପିଲାମନର୍ ବଁସ୍
(୧ ମ ବଁସାବଲି ୧:୫-୨୩)
ସେମ୍, ଆମ୍, ଜେପତ୍ ନାଉଁର୍ ନଅର୍ ପିଲା ମନର୍ କୁଲର୍ ତାଲିକା ଏଟା। ବଡ୍ ବାଉପବନ୍ ଆଇଲା ପଚେ, ଏ ସବୁ ପିଲାମନ୍ ଜନମ୍ ଅଇ ରଇଲାଇ । ଗମର୍ ଆରି ମାଗଗ୍ ଆରି ମାଦଅ ଆରି ଜବନ ଆରି ତୁବଲ୍ ଆରି ସେମକ୍ ଆରି ତିରସ୍, ଏମନ୍ ଅଇଲାଇନି ଜେପତର୍ ପିଲାମନ୍ । ଅସ୍କିନସ୍ ଆରି ରିପତ୍ ଆରି ତଗର୍ମା, ଏମନ୍ ଅଇଲାଇନି ଗମରର୍ ପିଲାମନ୍ । ଆରି ଇଲିସା ଆରି ତର୍ସିସ୍ ଆରି କିତିମ୍ ଆରି ଦଦାନିମ୍, ଏମନ୍ ଅଇଲାଇନି ଜବନର୍ ପିଲାମନ୍ । ଏମନର୍ତେଇ ଅନି ଅଲ୍ଗା ଦେସର୍ ଲକ୍ମନର୍ ମଜାଇ ବାସାଅଇ ରଇଲା ଲକ୍ମନ୍ ନିଜର୍ ନିଜର୍ ବାସା ଇସାବର୍ ଲାଗି ରଇକରି ନିଜର୍ ନିଜର୍ ଜାତି କୁଟୁମ୍ ଇସାବ୍ରେ ବାଗ୍ବାଟା ଅଇଲାଇ । କୁସ୍ ଆରି ମିସର୍ ପୁଟ୍ ଆରି କିଣାନ୍, ଏମନ୍ ଅଇଲାଇନି ଆମରର୍ ପିଲାମନ୍ । ସିବା ଆରି ଅବିଲା ଆରି ସପ୍ତା ଆରି ରଅମା ଆରି ସପ୍ତକା, ଏମନ୍ ଅଇଲାଇନି କୁସରର୍ ପିଲାମନ୍ । ସିବା ଆରି ଦଦାନ୍,ଏମନ୍ ଅଇଲାଇନି ରଆମାରର୍ ପିଲାମନ୍ । ନିମ୍ରଦ୍ କୁସରର୍ ପିଲା, ସେ ପୁର୍ତିବି ଲଗେ ବଡ୍ ବପୁ ଅଇବାକେ ଆରାମ୍ କଲା। ସେ ସବୁବେଲର୍ ମାପ୍ରୁର୍ ମୁଆଟେ ବଡ୍ ଡାକ୍ ପୁଟା ବାନୁଆଁ ଅଇ ରଇଲା, ସେଟାର୍ପାଇଁ ଲକ୍ମନ୍ ଏବ୍କେ ଜାକ ଏ କାତାକେ କଇବାଇ, ସବୁବେଲର୍ ମାପ୍ରୁର୍ ମୁଆଟେ ନିମ୍ରଦ୍ ବଡ୍ ଡାକ୍ପୁଟା ବାନୁଆଁ ପାରା ଅଇସି। ଆରି ସିନିଅର୍ ଦେସେ ବାବିଲ ଆରି ଏରକ୍ ଆରି ଅକ୍କଦ୍ ଆରି କଲନି, ଏସବୁ ନଅଁର୍ ତାର୍ ପର୍ତୁମ୍ ରାଇଜ୍ ଅଇଲା । ସେ ଦେସେ ଅନି ଅସୁର୍ ବାରଇ ଆସି ନିନିବି ଆରି ରଅବତ୍ ପୁରି ଆରି କେଲଅ, ଆରି,ନିନିବି ଆରି କେଲର୍ ମଜାଇ ରେସନ୍ ନଅଁର୍ ତିଆର୍କଲା, ଏ ରେସନ୍ ଅଇଲାନି ବଡ୍ ନଅଁର୍ । ଆରି, ଲୁଦିଅ ଆରି ଅନାମିଅ ଆରି ଲଆବିଅ ଆରି ନସ୍ତୁଇଅ,ଏମନ୍ ଅଇଲାଇନି ମିସରର୍ ପିଲାମନ୍ ଆରି ପତ୍ରସିଅ ଆରି ପଲେସ୍ଟିଅ ମନର୍ ଆନିଦାଦିମନ୍ କସ୍ଲୁଇଅ ଆରି କପ୍ତରିଅ, ଏମନ୍ ଅଇଲାଇନି ମିସରର୍ ପିଲାମନ୍ । ଆରି କିଣାନର୍ ବଡ୍ପିଲା ଅଇଲାନି ସିଦନ୍, ଜେ କି ସିଦନିଅ ମନର୍ ବାବା ରଇଲା ଆରି ତାର୍ ଦୁଇନମର୍ ପିଲା ଏତ ଇତିଅ ମନର୍ ବାବା ରଇଲା। ଆରି ଜିବୁସିଅ ଆରି ଇମରିଅ ଆରି ଗିର୍ଗାସିଅ, ଆରି ଇଦିଅ ଆରି ଅର୍କିଅ ଆରି ସିନିଅ ଆରି ଅର୍ବଦିଅ ଆରି ସମାରିଅ ଆରି ଅମାତିଅ, ତାର୍ପଚେ କିଣାନିଅ ମନର୍ କୁଟୁମ୍ ସବୁବାଟେ ଅଇଲାଇ । ତାର୍ପଚେ ସିଦନ୍ ଲଗେ ଅନି ଗରାର୍ ଦିଗେ ଗସା ଜାକ, ଆରି, ସଦମ୍ ଆରି ଅମରା ଆରି ଅଦ୍ମା ଆରି ସବଇମ୍ ଦିଗେ ଲେସା ଜାକ କିଣାନିଅ ମନର୍ ସନ୍ଦି ରଇଲା । ନିଜର୍ ନିଜର୍ ଦେସ୍ ଆରି କୁଲେ ସେମନର୍ କୁଟୁମ୍ ଆରି ବାସା ଅନୁସାରେ ଏ ସବୁଲକ୍ ଆମରର୍ ପିଲାମନ୍ । ଜେପତର୍ ବଡ୍ବାଇ ସେମର୍ ମିସା ପିଲାଟକି ମନ୍ ରଇଲାଇ, ଆରି ସେ ଏବରର୍ ପିଲାମନର୍ ଆନିଦାଦି ଅଇ ରଇଲାଇ । ସେମରର୍ ପିଲାମନ୍ ଅଇଲାଇନି , ଏଲମ୍ ଆରି ଅସୁର୍ ଆରି ଅର୍ପକ୍ସଦ୍ ଆରି ଲୁଦ୍ ଆରି ଅରାମ୍ । ଅରାମର୍ ପିଲାମନ୍ ଅଇଲାଇନି ଉସ୍ ଆରି ଉଲ୍ ଆରି ଗେତର୍ ଆରି ମସ୍ । ଆରି ଅର୍ପକ୍ସଦ୍ର୍ ପିଲା ମନ୍ ଅଇଲାଇନି ସେଲଅ ଆରି ସେଲଅର୍ ପିଲା ଅଇଲାନି ଏବର୍ । ଏବରର୍ ଦୁଇଟା ପିଲା ରଇଲାଇ, ଗଟେକ୍ ଲକର୍ ନାଉଁ ଅଇଲାନି ପେଲଗ୍,କାଇକେ ବଇଲେ ସେବେଲେ ପୁର୍ତିବି ଦୁଇବାଟା ଅଇଲା; ତାର୍ ବାଇର୍ ନାଉଁ ଅଇଲାନି ଜକ୍ତନ୍ । ଆରି ଜକ୍ତନର୍ ପିଲା ଅଇଲାନି ଅଲମାଦଦ୍ ଆରି ସେଲପ୍ ଆରି ଅତ୍ସର୍ମାବତ୍ ଆରି ଜେରଅ ଆରି ଅଦରାମ୍ ଆରି ଉସଲ୍ ଆରି ଦିକ୍ଲା ଆରି ଅବଲ ଆରି ଅବିମାଏଲ୍ ଆରି ସିବା ଆରି ଅପିର୍ ଆରି ଅବିଲା ଆରି ଜବବ୍, ଏ ମନ୍ ଅଇଲାଇନି ଜକ୍ତନର୍ ପିଲାମନ୍ । ମେସା ତେଇଅନି ପୁରୁବ୍ ଦିଗର୍ ସପାର୍ ଡଙ୍ଗର୍ଜାକ ସେ ମନର୍ ବସ୍ତି ରଇଲା । ନିଜର୍ ନିଜର୍ ଦେସେ ସେମନର୍ କୁଲର୍ ଆରି ବାସା ଆରି କୁଟୁମ୍ ଇସାବ୍ରେ ଏ ସବୁଜାକ ସେମର୍ ପିଲା । ନିଜର୍ ନିଜର୍ କୁଟୁମେ ସେମନର୍ କୁଲ୍ ଇସାବ୍ରେ ଏମନ୍ ଅଇଲାଇନି ନଅର୍ ପିଲାମନର୍ କୁଟୁମ୍ ରଇଲାଇ; ଆରି ବଡ୍ ବାଉପବନ୍ ଆଇଲା ପଚେ ଏମନର୍ ଲଗେ ଅନି ଜନମ୍ ଅଇଲା ସବୁ କୁଟୁମ୍ ପୁର୍ତିବି ତେଇ ବାଟା ଅଇଲାଇ ।
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.