Desiya Bible
ଜାତ୍ରା 23
ବଲ୍ ବିଚାର୍
ତମେ ମିଚ୍ କାତାରେ ପଡା ନାଇ, ଅନିଆଇ କରି ଦୁସ୍ଟକେ ସାଇଜ କରା ନାଇ । ତମେ ପାଦ୍ରା କାମ୍ କର୍ବାକେ ବେସି ଲକ୍ର୍ ସଙ୍ଗ୍ ଜାଆ ନାଇ, ଆରି ବଲ୍ ବିଚାର୍ କର୍ବାତେଇ ନସାଇବା ଲକର୍ ସଙ୍ଗ୍ ଜାଆନାଇ । ବିଚାର୍ ତେଇ ଗରିବ୍ ଲକ୍କେ ନିଚ୍ ଦେକା ନାଇ । ତମର୍ ବିରଦି ଲକର୍ ଗରୁ କି ଗଦ କେନେ ଜିବାଟା ଦେକ୍ଲେ ତାକେ ତାର୍ ମାଲିକ୍ ପାକେ କେଦିଆନା । ଜଦି ତମର୍ ବିରଦିର୍ ଗଦ ବଜ୍ ବଇ ନାପାରି ଅଦର୍ଲାଟା ଦେକ୍ଲେ, ତାକେ ଚାଡି ଜାଆନାଇ, ତମେ ତାକେ ତେଇ ସାଇଜ କର୍ସା । ଗରିବ୍ ଲକ୍କେ ତମେ ବୁଲ୍ ବିଚାର୍ କରା ନାଇ । ମିଚ୍କାତା ତେଇ ଅନି ନିଜ୍କେ ଦୁରିକେ ରୁଆ, ଦସ୍ ନ କଲା ଲକ୍କେ ଆରି ଦରମ୍ କର୍ବା ଲକ୍କେ ନସ୍ଟ କରାନାଇ, କାଇକେବଇଲେ କରାପ୍ ଲକ୍କେ ବଲ୍ ବିଚାର୍ ନ କରୁ । ତମେ ଜାଲାରି ଉଆ ନାଇ, କାଇକେବଇଲେ ଜାଲାରି କାମ୍ ତମ୍କେ କାଣା ଲକ୍ କର୍ସି ଆରି ଦରମ୍ ଲକର୍ ବାକିଅକେ ବେକାର୍ କର୍ବାଇ । ତମେ ବିଦେସି ଲକ୍କେ ଅନିଆଇ କାମ୍ କରାନାଇ, କାଇକେବଇଲେ ବିଦେସ୍ ରଇଲା ଲକର୍ ମନ୍ ତମେ ଜାନି ଆଚାସ୍, କାଇକେବଇଲେ ତମେ ମିସର୍ ଦେସେ ବିଦେସ୍ ଅଇ ରଇଲାସ୍ ।
ସାତ୍ ବରସ୍ ସାତ୍ଦିନ୍
ତମେ ଚଅ ବରସ୍ ଜାକ ପଦାଇ ବିଅନ୍ ବୁନ୍ସା ଆରି ତେଇର୍ ଚାସ୍ ପାଚାଆଇ ସଙ୍ଗଆ । ମାତର୍ ସାତ୍ ବର୍ସେ ବିସ୍ରାମ୍ କରି ପଡିଆ ଚାଡ୍ସା,ଏଲେ ଦରିଦ୍ର ଲକ୍କେ କାଇବାକେ ମିଲ୍ସି ଆରି ସେମନ୍ ଟୁଲିଆଇ ସଙ୍ଗଇ ରଇବାଇ ସେଟା ବନର୍ ପସୁମନ୍ କାଇବାଇ। ଆରି, ତମେ ଅଙ୍ଗୁର୍ ବାଡେ ଆରି ଜିତ୍ ଗଚ୍କେ ମିସା ସେ ରକାମ୍ କର୍ସା । ତମେ ଚଅ ଦିନ୍ କାମ୍ କରି ସାତ୍ ଦିନେ ବିସ୍ରାମ୍ କର୍ସା, ଅଇଲେ ତମର୍ ଗରୁ ଆରି ଗଦ ବିସ୍ରାମ୍ ପାଇବାଇ, ଆରି ତମର୍ ଗତି ଦାଙ୍ଗ୍ଡାମନ୍ ଆରି ବିନ୍ ଦେସର୍ ଲକ୍ ଉସାସ୍ ଅଇବାଇ ।
ଆମେ ତମ୍କେ ଜାଇ ଜାଇଟା କଇଆଚୁ, ସେ ସବୁ ବିସଇରେ ଜାଗର୍ତା ରୁଆ; ବିନ୍ ଦେବ୍ତା ମନ୍କେ ଏତାଆ ନାଇ, କି ତମର୍ ଟଣ୍ଡେଅନି ନ ବାରଅ ।
ତିନ୍ଟା ବଡ୍ ପରବ୍
ତମେ ବରସ୍କେ ତିନ୍ ତର୍ ମର୍ ନାଅଁରେ ପରବ୍ କର୍ସା ତାଡି ନ ମିସ୍ଲା ରୁଟିର୍ ପରବ୍ କର୍ସା, ଆମର୍ ଆଦେସ୍ ଇସାବେ ଆବିବ୍ ମାସେ ସାତ୍ ଦିନ୍ ତାଡି ନମିସ୍ଲା ରୁଟି କାଇସା, କାଇକେବଇଲେ ତମେ ସେ ମାସେ ମିସର୍ ଦେସେ ଅନି ବାରଇ ଆସିଆଚାସ୍, ଆରି କେମିସା ଚୁଚା ଆତେ ମର୍ ଲଗେ ଆସା ନାଇ ।
ଆରି ପଦାଇବାଟାଇ ଚାସ୍ କାଟ୍କା ପରବ୍, ଆରି, କଲା ନୁଆ ଜିନିସ୍ ଟୁଲିଆଇବା ପରବ୍ କର୍ସା; ଆରି ବରସର୍ ସାରାସାରି ଟୁଲିଆଇବା ପରବ୍ କର୍ସା । ବରସ୍କେ ତିନ୍ତର୍ ମନୁସ୍ମନ୍ ସବୁବଲର୍ ମାପ୍ରୁର୍ ଲଗେ ଆଇସା ।
ତମେ ସଡା ନ ମିସ୍ଲା ଜିନିସ୍ ସଙ୍ଗ୍ ବଲି ମେଣ୍ଡାର୍ ବନି ମିସାଇ ଉଚର୍ଗ କରା ନାଇ; ଆମର୍ ନାଉଁରେ ମାରି ରଇଲାଟା ଉଚର୍ଗ ବସ୍ ସଞ୍ଜ୍ ଅନି ସାକାଲ୍ ପାଇବା ଜାକ ନ ରଅ । ତମର୍ ବାଡର୍ ପର୍ତୁମ୍ ପଲ୍ ସବୁବେଲର୍ ମାପ୍ରୁର୍ ଗରେ ଆନ୍ସା, ପାକାଇଲା ଚେଲିର୍ ପିଲାର୍ ଦୁଦ୍କେ ତପାଆ ନାଇ ।
ଆଦେସ୍ ଆରି ମର୍ମାନ୍
ଦେକା, ଆମେ ତମ୍କେ ବାଟେ ଉଦାର୍ କର୍ବାକେ ଆରି ମୁଇ ତିଆର୍ କଲା ଜାଗାଇ ନେବାକେ ତମର୍ ଆଗ୍ତୁ ଗଟେକ୍ ଦୁତ୍କେ ପାଟାଇବି ତାର୍ କାତାରେ ଜାଗ୍ରତ୍ ଅଇ ରୁଆ ଆରି ସେ କଇଲା କାତା ସୁନା; ତାକେ ରିସା କରା ନାଇ; କାଇକେବଇଲେ ସେ ତମର୍ ବୁଲ୍କେ କେମା ନ କରେ; କାଇକେବଇଲେ ତାର୍ ଲଗେ ଆମର୍ ନାଉଁ ଆଚେ । ଜଦି ତମେ ସତ୍ରେ ତାର୍ କାତା ମାନ୍ସା ଆରି ଆମେ ଜାଇଟା କଇଲେ ସେଟା କର୍ସା, ତେବେ ତମର୍ ସତ୍ରୁ ମନର୍ ସତ୍ରୁ ଆରି ତମର୍ ବିରଦି ମନର୍ ବିରଦି ଅଇବୁ । କାଇକେବଇଲେ ଆମର୍ ଦୁତ୍ ତମର୍ ଆଗ୍ତୁ ଆଗ୍ତୁ ଜାଇ ତମ୍କେ ଇମରିଅ, ଇତିଅ, ପରିସିଅ, କିଣାନିଅ, ଇଦିଅ ଆରି ଜିବୁସିଅ ମନର୍ ଦେସ୍ ଆନ୍ସି, ଆରି ଆମେ ସେମନ୍କେ ବିନାସ୍ କର୍ବୁ । ତମେ ସେମନର୍ ଦେବ୍ତା ମନ୍କେ ଜୁଆର୍ କର୍ ନାଇ, କି ତାକର୍ ସେବା କରାନାଇ, ଆରି ସେମନର୍ ବିଦି ଇସାବେ ବିଦି ମାନାନାଇ, ମାତର୍ ସେମନ୍କେ ପର୍ତୁମ୍ସେ ବିନାସ୍ କରିଦେଇସା, ଆରି ତାକର୍ ଗାଡ୍ଲା ଦେପତା ପାକ୍ନାକେ ବାଙ୍ଗାଇ ନସ୍ଟ କରି ଦେଇସା । ତମେ ଆମର୍ ସବୁବେଲର୍ ମାପ୍ରୁ ପର୍ମେସରର୍ ସେବା କର୍ସା, ତେବେ ସେ ତମ୍କେ କାଇବା ପିଇବାକେ ଆସିର୍ବାଦ୍ କର୍ସି, ଆରି ତମର୍ ରଗ୍ ଦୁର୍ କର୍ସି । ତମର୍ ଦେସେ କେ ମିସା ପିଲାଜନମ୍ ନ କରି ନ ରୁଆସ୍, କି ବାଞ୍ଜି ନ ରୁଆସ୍, ଆମେ ତମର୍ ଜିଇବାଟା ବେସି ଦିନ୍ ବଡାଇବୁ ।
ମୁଇ ତମର୍ ଆଗେ ଆଗେ ଡର୍ ପାଟାଇବି, ଆରି ଜନ୍ ଲକ୍ମନର୍ ମଜାଇ ତୁଇ ଜାଇସୁ, ତାକର୍ ମନେ ପର୍ତୁମ୍ ଡର୍ ଦେକାଇ ବାୟାବିକଲ୍ କର୍ବି, ଆରି ମୁଇ ତର୍ ସର୍ତେ ଲକ୍କେ ପାଦ୍ତଲେ ଆନ୍ବି । ମୁଇଁ ତମର୍ ଆଗେ ଆଗେ ଟେକର୍ ମଚିମନ୍କେ ପାଟାଇବି; ସେମନ୍ ଇଦିଅ, କିଣାନିଅ ଆରି ଇତିଅ ମନ୍କେ ତମର୍ ଲଗେ ଅନି କେଦ୍ବାଇ । ମାତର୍ ଗଟେକ୍ ବରସ୍ ବିତ୍ରେ ସେମନ୍କେ ନ କେଦି, କେଦି ଦେଲେ ସେ ଦେସେ ଉନାଲକ୍ ଅଇବାଇ, ବନର୍ ପସୁ ମନ୍ ବେସି ଅଇବାଇ । ତମେ ସବୁଲକ୍ ଜବର୍ ଲକ୍ ବଡି ଦେସ୍ ଜାକ ଅଇଲା ପଚେ,ସେମନ୍କେ ଦିରେ ଦିରେ କେଦି ଦେବି । ଆରି ତମେ ସୁପ୍ ସାଗର୍ ତେଇ ଅନି ପଲେସ୍ଟିଅ ମନର୍ ଗାଡେ ଜାକ ଆରି ମରୁବାଲି ଅନି ପରାତ୍ ଗାଡ୍ ଜାକ ତମର୍ ସନ୍ଦି କର୍ବି, କାଇକେବଇଲେ ଦେସେ ବାସା ଅଇଲା ଲକ୍ମନ୍କେ ତମର୍ ଲଗେ ସର୍ପି ଦେବି, ତମେ ତମର୍ ମୁଆଟେ ସେମନ୍କେ କେଦ୍ସା । ତମେ ସେମନର୍ ସଙ୍ଗ୍ କି ସେମନର୍ ଦେବ୍ତା ସଙ୍ଗ୍ କାଇ ନିଅମ୍ ନ କରାସ୍ । ସେମନ୍ ତମର୍ ଦେସେ ବାସା ନ ଅଅତ୍, ବାସା କଲେ ଆମର୍ ବିରୁଦେ ତମର୍ ସଙ୍ଗ୍ ପାପ୍ କର୍ବାଇ, କାଇକେବଇଲେ ତମେ ଜଦି ସେମନର୍ ଦେବ୍ତାକେ ପୁଜା କଲେ, ତମର୍ ଉପ୍ରେ ସେଟା ବିପଦ୍ ଆନ୍ବାଇ ।
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.