Desiya Bible
ଜାତ୍ରା 1
ମିସର୍ଦେସେ ଇସ୍ରାଏଲ୍ ଲକର୍ ଦୁକ୍
ଜାକୁବର୍ ଜନ୍ ପିଲାମନ୍ ନିଜର୍ ନିଜର୍ ଜିନିସ୍ ପତର୍ ଦାରି ଜାକୁବର୍ ସଙ୍ଗ୍ ମିସର୍ ଦେସେ ଆସି ରଲାଇ, ଆରି ସେ ମନର୍ ନାଅ ଅଇଲାନି; ରୁବେନ୍, ସିମିଅନ୍, ଲେବି ଆରି ଜିଉଦା; ଇସାକର୍,ସବୁଲୁନ୍ ଆରି ବିନିଆମିନ୍; ଦାନ ଆରି ନପ୍ତାଲି; ଗାଦ୍ ଅରି ଆସେର୍ ସେବେଲେ ସବୁ ଲକ୍ ମିସି ଜାକୁବର୍ କୁଟୁମ୍ ଲଗେ ଅନି ସତୁରି ଲକ ରଇଲାଇ, ମାତର୍ ଜସେପ୍ ଆଗ୍ତୁ ଅନି ମିସର୍ ଦେସେ ରଇଲା । ତାର୍ପଚେ ଜସେପ୍ ଆରି ତାର୍ ବାଇମନ୍ ଆରି ତାର୍ ସଙ୍ଗେ ରଇଲା ପିଡିର୍ ସର୍ତେ ଲକ୍ ମଲାଇ । ଅଇଲେମିସା ଇସ୍ରାଏଲର୍ ଲକର୍ ବଁସ୍ ଅଦିକ୍ ବଡ୍ତେ ଗାଲା, ଆରି ଜାତିଜାତି ଅଇ ଦେସ୍ ସାରା ବର୍ତି ଅଇଗାଲାଇ । ସେ ଦେସେ ଗଟେକ୍ ନୁଆ ରାଜା ସାସନ୍ କର୍ବାକେ ଆଇଲା ଜେ, ସେ ଜସେପ୍କେ ମିସା ନାଜାନି ରଇଲା । ସେ ରାଜା ତାର୍ ଲକ୍ମନ୍କେ କଇଲା ଜେ, ଦେକା, ଇସ୍ରାଏଲର୍ ଲକ୍ ଆମର୍ ଲକର୍ ତେଇ ଅନି ଅଦିକ୍ ଲକ୍ ଆଚତ୍ ଆରି ବେସି ବପୁଟାମନ୍ । ସେମନର୍ ଲକ୍ ଜେନ୍ତାର୍କି ନ ବଡତ୍, ଆରି ଜୁଇଦ୍ ଅଇଲେ ଆମର୍ ବିରୁଦେ ଜୁଇଦ୍ ନ କରତ୍ କି, ଏ ଦେସେ ଅନି ବାଉଡି ନ ଜାଅତ୍, ସେଟାର୍ପାଇଁ ଆସା, ଆମେ ସେମନର୍ ସଙ୍ଗେ ବଲ୍ରେ ରଉଁ ।
ତାର୍ପଚେ ସେମନ୍ ଇସ୍ରାଏଲର୍ ଲକ୍କେ ବେସି କାମ୍ କରାଇ କସ୍ଟ ଦେବାକେ ତାକର୍ ତାକର୍ ବିତ୍ରେ ମୁକିଆ ବାଚ୍ଲାଇ, ଆରି ପାର ରାଜାର୍ ପାଇ କାଦିକଣ୍ଡା ସଙ୍ଗଇବା ବାଣ୍ଡାର୍ ଗର୍ ତିଆର୍ କଲାଇ, ସେ ଜାଗାର୍ ନାଉଁ ଅଇଲାନି ପିତମ୍ ଆରି ରାମିସେସ୍ । ମାତର୍ ଇସ୍ରାଏଲର୍ ଲକ୍ମନ୍କେ ଜେତ୍କି ଦୁକ୍ ଦେଲେ ମିସା, ସେତ୍କି ବଡ୍ତେ ଗାଲାଇ, ଆରି ଅଦିକ୍ ଦେସ୍ଜାକ ଅଇଗାଲାଇ, ସେଟାର୍ପାଇଁ ଇସ୍ରାଏଲର୍ ପିଲାମନର୍ ପାଇ ଅଦିକ୍ ଡରି ଗାଲାଇ । ତାର୍ପଚେ ମିସରର୍ ଲକ୍ମନ୍ ଇସ୍ରାଏଲର୍ ଲକ୍ମନ୍କେ ନ କରି ସେମନ୍କେ ଗତିଦାଙ୍ଗ୍ଡା କାମ୍ କରାଇଲାଇ। ମାଟିକେ କାମାଇ କରି ଇଟା ଜିକାଇବାର୍ ଆରି ଗର୍ ତିଆର୍ କର୍ବାର୍ ଆରି ଚାସ୍ କାମ୍ କରାଇ କରି ସେ ମନର୍ ଜିବନ୍କେ କାନ୍ଦାଇ ଦେଇତେ ରଇଲାଇ। ଆରି ସେମନ୍କେ ଜନ୍ କାମ୍ କରାଇଲେ ମିସା; ଆଲୁଆଲାଦ୍ରେ କାମ୍ ନ କରାଇତେ ରଇଲାଇ। ମିସରର ରାଜା ଦୁଇଟା ଏବ୍ରି ବଣ୍ଡ୍କି ଡକ୍ରିମନ୍କେ ସିପରା ଆରି ପୁଇଆକେ ଏ କାତା କଇ ପାଟାଇଲା, ତମେ ସେମନର୍ ଲଗେ ବଣ୍ଡ୍କି ଡକ୍ରି କାମ୍ କର୍ସା ଆରି ଜେଡେବଲ୍ ଏବ୍ରିଅ ମାଇଜି ମନ୍ ପିଲା ଜନମ୍ କର୍ବାଟା ଦେକ୍ସା; ସେଡ୍କିବେଲେ ପିଲା ଜନମ୍ କଲେ ସେଡ୍କିବେଲେ ମାରି ଦେଇସା; ଆରି ଟକି ଜନମ୍ କଲେ ଚାଡି ଦେଇସା ମାତର୍ ସେ ଦୁଇଟା ବଣ୍ଡ୍କି ଡକ୍ରିମନ୍ ପର୍ମେସର୍କେ ଡରି କରି ମିସରର ରାଜାର୍ କାତା ନ ମାନିକରି ସବୁ ପିଲା ମନ୍କେ ଜିଆଇଲାଇ। ପିଲା ଟକି ମନ୍କେ ଜିଆଇବାଟା ଜାନି ମିସରର ରାଜା ସେ ଦୁଇଟା ବଣ୍ଡ୍କି ଡକ୍ରିମନକେ ଡାକାଇକରି କଇଲା, ତମେ ଏନ୍ତାର୍ କାମ୍ କାଇକେ କଲାସ୍ନି ଆରି ସବୁ ପିଲାମନ୍କେ ଜିଆଇଲାସ୍ନି ସେଟାର୍ପାଇ ସେ ମାଇଜିମନ୍ ପାର ରାଜାକେ କଇଲାଇ,ଏବ୍ରିଅ ମାଇଜିମନ୍ ମିସର୍ ଦେସର୍ ମାଇଜି ମନର୍ ପାରା ନାଇ, ସେମନ୍ ବେସି ଚାଲାକି ଆରି ବେସି ଚତୁର୍, ତାକର୍ ଲଗେ ଆମେ କେଟ୍ବା ଆଗତୁ ଜନମ୍ କରି ସାରାଇ ରଇବାଇ । ତାର୍ପଚେ ପର୍ମେସର୍ ସେ ମାଇଜି ମନ୍କେ ଦୟା କଲା,ଆରି ଇସ୍ରାଇଲ୍ ଦେସେ ବେସି ଲକ୍ ଅଇଲାଇ ଆରି ବେସି ବପୁ ଅଇଲାଇ ସେ ଦୁଇଟା ମାଇଜି ପର୍ମେସର୍କେ ଡର୍ତେ ରଇଲାଇ ସେଟାର୍ ପାଇ, ସେମନର୍ ବଁସ୍କେ ବଡାଇଲାଇ। ତାର୍ପଚେ ପାର ରାଜା ମିସର୍ ଦେସର ସରତେ ଲକକେ ଡାକି କଇଲା, “ତମେ ଜନମ୍ ଅଇଲା ସରତେ କଅଁଲା ପିଲାମନ୍କେ ମାରି ନିଲିଆ ନାଉଁର୍ ବଡ୍ ଗାଡ୍ ତେଇ ପିଙ୍ଗି ଦିଆସ୍, ଆରି ଟକିମନ୍କେ ଜିଆଇ ରୁଆ ।”
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.