Desiya Bible
ଉପଦେସକ 6
ଆକାସ୍ ତଲେ ମୁଇଁ ଗଟେକ୍ ଦୁକର୍ ବିସୟ୍ ଦେକ୍ଲି ଆଚି, ଆରି ସେଟା ଲକ୍ମନର୍ ପାଇଁ ବେସି ବଜ୍ । ପର୍ମେସର୍ କାକେ କାକେ ଏ ଦନ୍ସପତି ଦେଇସି ଜେ, ସେ କାଇପିଇକରି ସାର୍ଦା କଲେ ମିସା କାଇଟା ମିସା ଅବାବ୍ ନ ଅଏ, ଅଇଲେ ମିସା ସେଟାକେ କାଇପିଇ କରି ସାର୍ଦା କର୍ବାଟାକେ ଦଣ୍ଡ୍ ନ ଦେଏ, ମାତର୍ କାରାପ୍ ଲକ୍ ସେନ୍ତାରି କାଇପିଇ କରି ଉଡାଇସି; ଏଟା ବେକାର୍ସେ; କରାପ୍ କାମ୍ ପାରା । ଜେବେ ଗଟେକ୍ ଲକ୍ ସଏଟା ପିଲା ଜନମ୍ କରି ବେସିଦିନ୍ ବଞ୍ଚିକରି ରଇସି, ମାତର୍ ତାର୍ ଜିବନ୍ କେବେ ମିସା ସୁକ୍ସାନ୍ତି ନାଇଁ, ଆରି ସେ ଜେବେ ମଲେ ଜଦି ମସ୍ନେ ତପା ନ ଜାଏ, ତେବେ ମୁଇଁ କଇଲିନି, ତାର୍ଟାନେ ଅନି ପିଲାଟକି ନ ପାଇବାଟା ବଲ୍; କାଇକେବଇଲେ ସେଟା ପବନ୍ ପାରା ଅଇକରି ଆଇସି ଆରି ଆନ୍ଦାର୍ ବାଟେ ଜାଇସି, ଆରି ତେଇର୍ ନାଉଁ ଆନ୍ଦାରେ ଡାବିଅଇ ଦେଇସି; ଆରି, ସେଟାକେ ବେଲ୍ ନ ଦେକେ କି ନାଜାନେ ମିସା, ସେ ଲକ୍ ଜାଗିକରି ସୁକ୍ପାଇସି; ଆରି ସେ ଲକ୍ କାଇ ବଲ୍କାମ୍ ନ କରି ଦୁଇ ଅଜାର୍ ବରସ୍ ବଁଞ୍ଚ୍ଲେ ମିସା ସବୁଲକ୍ଜାକ ଗଟେକ୍ ଟାନେ ନ ଜାଅତ୍? ଲକ୍ମନର୍ ସବୁଜାକ କସ୍ଟ ପେଟର୍ ପାଇଁସେ, ଅଇଲେ ମିସା କାଇବା ଆସା କେବେ ନ ଚାଡେ। ସେଟାର୍ପାଇଁ କାରାପ୍ଲକ୍ ବାଦୁଲେ ଗିଆନି ଲକର୍ କାଇ ଲାବ୍? ଆରି, ଜନ୍ ଲକ୍ ଜିଇ ରଇଲା ଲକ୍ମନର୍ ସଙ୍ଗେ ମିଲିମିସି କରି ଚଲାଚଲ୍ତି କର୍ବାଟା ଜାନ୍ସି, ତାର୍ପାଇଁ କାଇ ଲାବ୍? ମନର୍ ଲାଲ୍ସା ବାଦୁଲେ ଆକିଲଗେ ଦେକବାଟା ନିକ; ଏଟା ମାତର୍ ବେକାର୍ ଆରି ପବନ୍ ପଚେ ଜିବାଲକ୍ ମାତର୍। ଜନ୍ ଗଟ୍ନା ଗଟ୍ଲା ଆଚେ, ସେଟା ବେସିଦିନ୍ ଅଇଗାଲା ତାର୍ ନାଉଁ ଦିଆଜାଇ ରଇଲା। ଆରି ସେଟା ନର୍ଲକ୍ ବଲିକରି ଜାନେ; ଆରି, ସେ ନିଜର୍ ବଲ୍ବପୁସଙ୍ଗେ ଲାଗାଜଡା କରି ନାପାରେ । ବେକାର କାତା କଇବାଟାବେସି କାତା ଆଚେ, ସେ କାତା କଇକରି ଲକ୍ମନ୍କେ କାଇ ଲାବ୍? କାଇକେବଇଲେ ନର୍ଲକ୍ ଚାଇଁପାରା ନିଜର୍ ଜିବନ୍କେ ନସ୍ଟ କର୍ସି, ସେ ଜିଇକରି କାଇ ଲାବ୍, ଏଟା କାଇ ସେ ଜାନେ କି? ନର୍ଲକ୍ ମରନ୍ ପୁର୍ତିବିତେଇ ଏଟା ଗଟ୍ସି, ଏଟା କାଇ ତାକେ ଜାନାକି?
Desiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.