Nɔɔneŋ 30:5

Karaŋ kefa nɔɔneŋ

1Degbeŋgyoo, maa gyina neŋ adido,

nawolo nyi nyaŋ wɔŋana maŋ lese lee bɔɔ man,

n te yele me kɔlara ke nyaŋee lee me dɔɔ ya.

2Degbeŋgyoo me Wurubuarɛ, me baake neŋ nyi nyaa kyɔ maŋ,

te n kyɔɔ maŋ me kawee.

3Degbeŋgyoo, nyaŋ lesena maŋ lee woyadɛɛ,

n lɛɛ ma nyee keŋ me ta gyoo yebɔɔ man ya.

4Ɛmɛɛ ɔ balaŋ baŋ ɛ ne di anokoare nɛ, ɛ kpee nɔɔneŋ fa Degbeŋgyoo,

ɛ lese ɔ yele fereŋkyeŋ keŋ.

5Nawolo nyi ɔ baŋ bɛɛ kyare ya,

mɔna ɔ bɛrɛɛ ne doo kekpaakekpaa.

Kewii gyae ke tale kyaa nelim,

mɔna kenyaŋee gyae ke kɔŋ nebo.

6Debaŋ keŋ ma wose be fɛɛ maŋ nɛ me yakowɔ nyiaa,

<<Mɔɔ gyae maa wosi korakora ya,>>

7Degbeŋgyoo, n moo n bɛrɛɛ boele maŋ,

n yelaa ma seŋawɔ keŋkeŋ ŋgba bula nɛ.

Mɔna n ka mo n sia weese nɛ,

ma wose yeŋa maŋ.

8Degbeŋgyoo, nyaŋ te me baakewɔ,

Degbeŋgyoo te ma solawɔ nyi waa wii maŋ.

9<<Nyi akpaa me nɔɔ de wuu,

yaa ma yem na woŋ tɔnɔɔ doola ke man?

Woya baa tale lese n yele?

Baa tale kolosi lee nya anokoare keŋ man?

10Degbeŋgyoo, tei na n ke wii me waraŋase,

Degbeŋgyoo, kyɔ maŋ.>>

11N te yele me kewii ta bese sɔɔre,

n ta kpee me titire, te n moo kenyaŋee do man.

12Na maa kpee nɔɔneŋ lee me konɔɔ man lese n yele keŋ mɔɔ wuu me nɔɔ ya.

Degbeŋgyoo me Wurubuarɛ, maa lese n yele kekpaakekpaa.