Nɔɔneŋ 119

Degbeŋgyoo mmaraa keŋ

1Baŋ be gbɛɛneŋ tenɛɛ,

te bee di Degbeŋgyoo mmaraase ŋan dɔɔ nɛ baŋna nyeebam.

2Baŋ bɛɛ yɛɛ ɔ kegyaebii,

te bɛɛ mo be konɔɔ pou kɛo e nɛ, baŋna nyeebam.

3Bɔɔ ne yɛɛ kolokum ya,

mɔna bɛɛ tɛɛ ɔ gbɛɛneŋ man.

4Nyaŋ wolana n gbɛɛneŋ,

ŋan dee di ŋe dɔɔ nideli.

5Ao, me lookegyakaa yɛna nyi me gbɛɛneŋ dɛɛ tenee,

lee n kawolase dɔɔ kedi man.

6Akpaa ma gyene nyaŋ mmaraase pou nideli nɛ,

nafɔ desɛŋ be gyae ke kyaŋ maŋ ya.

7Maa mo konɔɔ kpaakpaa lese n yele,

debaŋ keŋ mɛɛ kasee nyaŋ mmaraase ŋan tenɛɛ nɛ.

8Maa di n kawolase dɔɔ,

naa bɛɛ maŋ korakora ya.

9Sena te tobaale waa tale kyaa fereŋkyeŋ man?

Lee n nombia ŋan dɔɔ kedi man.

10Me ta mo me konɔɔ pou mɛɛ kɛo neŋ,

na yele maa yo gbɛɛ lee nyaŋ mmaraase ŋan wɔle ya.

11Me ta mo n nombia ŋan weese me konɔɔ man,

na mɔɔ nyiŋ yɛɛ dukum tia neŋ ya.

12Degbeŋgyoo, mɛɛ lese n yele,

wola maŋ n kawolase ŋan.

13Maa bese toro yako,

mmaraase ŋan pou ba lee n nɔɔman nɛ.

14Mɛɛ nyaŋee lee n kegyaebii keyɛɛ man,

kela kenyaŋee lee wosekenyiŋ nideli man.

15Mɛɛ gyoo n kawolase ŋan man,

te me sia gyakaa n gbɛɛneŋ dɔɔ.

16N kawolase na gyoo me sia,

mɔɔ gyae maa wolee n nombia ŋan ya.

17Yɛɛ deeli fa n tobaale ma kekyaabii man,

na maa di n nombia dɔɔ.

18Gyuusu me sia na maa naa,

gyakoloŋ nombia ŋan doo nyaŋ mmaraa man.

19Me yɛɛ ŋɔɔle e tɛɛle dɔɔ,

na weese maŋ nyaŋ mmaraase ya.

20Ne gyɔ maŋ loo nideli me konɔɔ man,

lee nyaŋ mmaraase dɔɔ debaŋ kamasɛ.

21N ne kalena agaŋtaŋtena, baŋ n be falaa wɔ,

baŋ yoona gbɛɛ lee nyaŋ mmaraase ŋan man.

22Lese tuubia na desɛŋ lee me dɔɔ,

nawolo nyi mee di nya mmaraase ŋan dɔɔ.

23Doo nyi kegyiise ne yilaa bake ma nyeeman koraŋ nɛ,

n tobaale waa gyoo n kebakesee man.

24Nya adansɛɛ nombia na gyoo me sia,

ŋan ne kolosila fa maŋ.

25Be te tisina ma woo do tɛɛle man,

yela maa nyiŋ nyeedoŋ lee n nombia ŋan dɔɔ.

26Ma toro ŋan pou mɔɔ yɛɛ nɛ yako, te n tiranɔɔ fa maŋ,

wola maŋ n kawolase.

27Yela maa nyii n gbɛɛneŋ man,

na maa gyoo n gyakoloŋ nombia man.

28Ma woo ne mutii,

do maŋ doŋ ŋgba mena keŋ n nombii keŋ doo nɛ.

29Lese maŋ lee akɛrɛɛ gbɛɛneŋ man,

boele maŋ na n ka wola maŋ nyaŋ mmaraa.

30Me ta lese anokoare kedi gbɛɛ,

me ta mo me konɔɔ gyakaa nyaŋ mmaraase dɔɔ.

31Degbeŋgyoo, me dana nya mmaraase ŋan man keŋkeŋ,

naa yele desɛŋ ke kyaŋ maŋ ya.

32Maa barasena nyaŋ mmaraase ŋan dɔɔ kedi man,

nawolo nyi n te yele mee nyii nombia man nideli.

33Degbeŋgyoo, wola maŋ n kebakesee,

na maa sila ŋa kelii ɔto.

34Fa maŋ nombia man kenyii, na maa di nyaŋ mmaraase dɔɔ.

na maa mo me konɔɔ pou di ŋe dɔɔ.

35Mo maŋ ta nyaŋ mmaraase gbɛɛneŋ man,

nawolo nyi ŋan na gyoona me sia.

36Yela nya mmaraase nombia ke gyɔ maŋ loo,

mɔna na wose kenyiŋ ya.

37Lese me sia lee abɔɔ ŋan taŋ tɔnɔɔ ya nɛ dɔɔ,

yela maa nyiŋ nyeedoŋ lee n nombii keŋ dɔɔ.

38Seŋ n keyakosee dɔɔ fa n tobaale,

na baa nyiŋ yee neŋ.

39Lese desɛŋ keŋ mee yee nɛ,

nawolo nyi nyaŋ mmaraase dei.

40N gbɛɛneŋ kesila ne gyɔ maŋ loo.

N katenee dɔɔ gyee ma nyeedoŋ.

41Degbeŋgyoo yela n kegyae keŋ taŋ ɔto ya nɛ ke kɔŋ me dɔɔ,

n nyeekelɛɛ ŋgba mena keŋ n be yakosee nɛ.

42Kenaŋ na maa nyiŋ nombii yako baŋ bee kulu maŋ nɛ,

nawolo nyi mɛɛ mo ma wose lɔ n nombii dɔɔ.

43Naa lese nya anokoare nombii keŋ lee me nɔɔman korakora ya,

nawolo nyi me loo gyakaa nyaŋ mmaraase ŋan dɔɔ.

44Maa di nyaŋ mmaraase dɔɔ,

kekpaakekpaa.

45Maa ta wosekelɛɛ man,

nawolo nyi mee di n gbɛɛneŋ dɔɔ.

46Maa kolosi nya mmaraase ŋan gyooneŋ siaman,

keŋ desɛŋ be kyaŋ maŋ ya.

47Nyaŋ mmaraase ŋan na gyoo me sia,

nawolo nyi mɛɛ gyae ŋa.

48Mee bu nyaŋ mmaraase ŋan te mɛɛ gyae ŋa,

na maa gyoo n kebakesee ŋan man.

49Tɔɔse n nombii keŋ n be yako n tobaale,

ke man te n faa maŋ loo kegyakaa.

50Kei ne fɛɛna me wɔe me kaale man,

n keyakosee ne gyee ma nyee.

51Agaŋtaŋtena ne kulu maŋ nideli,

mɔna me ta lee nyaŋ mmaraa wɔle ya.

52Degbeŋgyoo, me tɔɔse n beneŋ mmaraase ŋan na,

me wɔe te fɛɛ maŋ.

53Me baŋ na koro nideli lee akpanyanyaŋtena,

baŋ bɔɔ bɛɛ nyaŋ mmaraase ŋan dɔɔ.

54N kebakesee yɛna me nɔɔneŋ,

me dasoe kamasɛ man.

55Degbeŋgyoo, mɛɛ tɔɔse n yele nelim,

nyi maa di nyaŋ mmaraa dɔɔ.

56Ke ta bese kpene keŋ mɛɛ yɛɛ,

nyi maa di n gbɛɛneŋ dɔɔ.

57Degbeŋgyoo, nyaŋ yɛna me wui dedii,

ma te yakosee nyi maa di n nombia dɔɔ.

58Me ta mo me konɔɔ pou mɛɛ kɛɛ n siaman,

boele maŋ ŋgba mena keŋ n be yakosee nɛ.

59Ma te kɛɛ ma keta man,

te me kyɛɛkee ma naawɔ kekulu man nyi maa di nya mmaraase dɔɔ.

60Maa yɛɛ ɔsaa te mɔɔ dɔɔ wɔle ya,

nyi maa di nyaŋ mmaraase dɔɔ.

61Nyi akpanyanyaŋtena da mo ŋmeeseŋ bake maŋ koraŋ nɛ,

mɔɔ gyae maa wolee nyaŋ mmaraa ya.

62Tɛɛ nsana maa koro fa neŋ karaŋ,

lee nyaŋ mmaraase ŋan tenɛɛ nɛ dɔɔ.

63Me gyoona yɛna baŋ pou bee yee neŋ,

baŋ pou bɛɛ tɛɛ n gbɛɛneŋ man nɛ.

64Degbeŋgyoo, n kegyae te lɛɛ tɛɛle pou,

wola maŋ n kebakesee ŋan.

65Degbeŋgyoo, yɛɛ deeli fa n tobaale,

ŋgba mena keŋ n nombii doo nɛ.

66Wola maŋ nombia kagyeŋ na nombia kedi kpaakpaa,

nawolo nyi me ta mo ma wose lɔ nyaŋ mmaraase dɔɔ.

67Pɛ n ke wɔŋ ma deŋele na me kpase gbɛɛ,

mɔna nɛnɛɛ dɔɔ mee di n nombii keŋ dɔɔ.

68N dei, te ŋan n ne yɛɛ mɔ dei,

wola maŋ n kebakesee ŋan.

69Doo nyi agaŋtaŋtena ne ta mo akɛrɛɛ sɔ maŋ,

mɔna maa mo me konɔɔ pou di n gbɛɛneŋ dɔɔ.

70Be konɔɔ dana yuŋ te bɔɔ ne wii walaŋ ya,

mɔna maŋ dɔɔ nyaŋ mmaraa na gyoo me sia.

71Dei fa maŋ ŋgba n be wɔŋ ma deŋele nɛ,

na maa nyiŋ kasee n kebakesee ŋan.

72Mmaraa keŋ ba lee n nɔɔman na lee koya fa maŋ,

kela kɔba wolom na kɔba yayam bia kakpoŋse.

73N nyiŋmaase yɛɛna maŋ te n desina maŋ,

fa maŋ nombia man kenyii na maa kasee nyaŋ mmaraase,

74Baŋ bee yee neŋ baa naa maŋ na baa nyaŋee,

nawolo nyi me ta mo me loo gyakaa n nombii keŋ dɔɔ.

75Degbeŋgyoo, ma gyeŋ nyi nyaŋ mmaraase tenɛɛ,

te n moo anokoare kedi wɔŋ ma deŋele.

76Yela n kegyae keŋ taŋ ɔto ya nɛ ke yako do maŋ,

ŋgba mena keŋ n be yakosee fa n tobaale nɛ.

77Yela n kewii kekɔŋ me dɔɔ na maa nyiŋ nyeedoŋ,

nawolo nyi nyaŋ mmaraa na gyoo me sia.

78Yela desɛŋ ke kyaŋ agaŋtaŋtena nawolo nyi ba te kɛrɛɛ me nɔɔse keŋ ma te yɛɛ kolo ya,

mɔna maŋ maa gyoo n gbɛɛneŋ man.

79Yela baŋ bee yee neŋ ka bese kɔŋ me gyaŋ,

baŋ bee nyii nya mmaraase nɛ.

80Yela me konɔɔ pou ke sila n kebakesee ŋan,

na desɛŋ be nyiŋ kyaŋ maŋ ya.

81N nyeekelɛɛ ne gyɔ ma woo loo nideli,

me ta mo me loo gyakaa n nombii dɔɔ.

82Me sia te kɛɛ n keyakosee gbɛɛ kina,

Me kpa, <<Woromɔ te nyaŋ ke yakodo maŋ?>>

83Me yɛɛ ŋgba wonembu tɔne ogele keŋ doo nyɔɔse man,

mɔna mɔɔ gyae maa wolee n kebakesee ya.

84N tobaale waa daa kelii woromɔ?

Woromɔ yaa n ke di baŋ bɛɛ naase maŋ diyem nɛ nombia?

85Agaŋtaŋtena te wula dowokom fa maŋ,

keŋ bɛɛ kyaana nyaŋ mmaraase ya.

86Nyaŋ mmaraase pou doona ŋe gbɛɛ,

kyɔ maŋ, nawolo nyi bɛɛ naase maŋ diyem yakaa.

87Kaa kyomii nafɔ be ta lese maŋ lee tɛɛle dɔɔ,

mɔna ma te bɛɛ n gbɛɛneŋ ya.

88Lee n kegyae keŋ taŋ ɔto ya dɔɔ yela maa nyiŋ nyeedoŋ,

na maa di n nɔɔman adansɛɛ nombia dɔɔ.

89Degbeŋgyoo, n nombii keŋ doo kekpaakekpaa,

ka seŋɛɛ adido keŋkeŋ.

90Nya anokoare kedi doo kelii kalola kegyakaarese pou man,

nyaŋ seena tɛɛle mokɔɔ te ka seŋɛɛ nideli.

91Nyaŋ mmaraase seŋɛɛ kaalii gyɛŋ,

nawolo nyi abɔɔ pou na som neŋ.

92Nyi nyaŋ mmaraase deŋ ta gyoo me sia ya nɛ,

nafɔ meŋ wɔlɛɛwɔ ma diyem kena man.

93Mɔɔ gyae maa wolee n gbɛɛneŋ korakora ya,

nawolo nyi ŋe dɔɔ te n tɛɛwɔ yela me nyiŋa nyeedoŋ.

94Lɛɛ ma nyee, nawolo nyi me yɛɛ n wui,

me te di n gbɛɛneŋ dɔɔ.

95Akpanyanyaŋtena na deke maŋ baa wɔlɛɛ,

mɔna maŋ maa gyoo nya mmaraase man.

96Ma te naa nyi abɔɔ kpaakpaa pou dana ɔto,

mɔna nyaŋ mmaraase be dana ɔto ya.

97Ao, mena keŋ mɛɛ gyae nyaŋ mmaraa keŋ,

mɛɛ gyoo ke man wee dibiliŋ pou.

98Nyaŋ mmaraase doo me gyaŋ debaŋ kamasɛ,

ŋa te yele me ta gyeŋ nombia kela me kɔlara.

99Ma gyeŋ nombia kela ma wolara pou,

nawolo nyi mɛɛ gyoo nya mmaraase man,

100Mee nyii nombia man nideli kela kegyiise,

nawolo nyi mee di n gbɛɛneŋ dɔɔ.

101Ma te wɔŋ ma wose lee dukum kamasɛ keyɛɛ man,

na maa di n nombia dɔɔ.

102Me ta lee nyaŋ mmaraase ŋan wɔle ya,

nawolo nyi nyaŋ wolana maŋ.

103N nombia dana maŋ gyoŋ nideli,

gyoŋ kela teebɔɔ doola me nɔɔman.

104N gbɛɛneŋ yelela mee nyii nombia man,

mena dɔɔ mɛɛ kɔla gbɛɛkum kamasɛ.

105N nombii yɛɛ kanea fa me nawɔɔ,

na keŋmaŋee me gbɛɛnaa man.

106Ma te kaŋ ntam te me lɛɛ ke do,

nyi maa di nyaŋ mmaraase ŋan tenɛɛ nɛ dɔɔ.

107Ma te naa diyem nideli,

Degbeŋgyoo, fa maŋ nyeedoŋ lee n nombii keŋ dɔɔ.

108Degbeŋgyoo, lɛɛ me nɔɔman yele kalese kedeesa,

na n ka wola maŋ nyaŋ mmaraase.

109Doo nyi ma nyeedoŋ doo me nyiŋmaa man debaŋ kamasɛ,

mɔɔ gyae maa wolee nyaŋ mmaraase ya.

110Akpanyanyaŋtena te nyɔɔ maŋ kɔta,

mɔna ma te kpase lee n gbɛɛneŋ man ya.

111Nyaŋ mmaraase yɛna me dedii kekpaakekpaa,

ŋan yɛna kenyaŋee me konɔɔ man.

112Ma te yɛɛ ma nyeempɔ nyi maa di n kebakesee dɔɔ,

kelii ɔto.

113Mɛɛ kɔla baŋ ba nyeempɔse yɛɛ ala ala nɛ,

mɔna mɛɛ gyae nyaŋ mmaraa.

114Nyaŋ yɛna ma keyeu kagyoo na ma yoo nyeele pampasaŋ,

me loo gyakaa n nombii dɔɔ.

115Ɛmɛɛ nombiakumɛɛ yɛɛra, ɛ lee me gyaŋ

na maa nyiŋ di me Wurubuarɛ mmaraase dɔɔ.

116Tela maŋ ŋgba mena keŋ n be yakosee nɛ, na maa nyiŋ nyeedoŋ,

naa yele me loo kegyakaa ke yɛɛ yakaa ya.

117Kyaŋ maŋ na maa nyiŋ kelɛɛ,

maa mo obuo fa n kebakesee debaŋ kamasɛ.

118N te bɛɛ baŋ pou bɔɔ kpase lee n kebakesee ŋan wɔle nɛ,

nawolo nyi ba adao gbɛɛneŋ pou te yɛɛ yakaa.

119N te bɛɛ tɛɛle kei dɔɔ akpanyanyaŋtena pou ŋgba woŋsila nɛ,

mena dɔɔ mɛɛ gyae nya mmaraase.

120N keyee te yele ma wose ne seree maŋ,

mee yee nyaŋ mmaraase.

121Ma te yɛɛ keŋ tenɛɛ na keŋ doona ke gbɛɛ,

naa tina maŋ yela fa baŋ bɛɛ ŋere maŋ do nɛ ya.

122Kɛɛ nyi n tobaale te nyiŋ ɔ wose,

na yele agaŋtaŋtena ka ŋere maŋ do ya.

123Me sia te kɛɛ n nyeekelɛɛ,

na n keyakosee keŋ tenɛɛ nɛ gbɛɛ kina.

124Yɛɛ deeli fa n tobaale lee n kegyae man,

na n ka wola maŋ n kebakesee.

125Me yɛɛ n tobaale e, fa maŋ nombia man kenyii,

na maa gyeŋ nya mmaraase

126Degbeŋgyoo, debaŋ te lii keŋ nya yɛɛ kolo,

nawolo nyi ba te yala nyaŋ mmaraa keŋ dɔɔ.

127Nawolo nyi mɛɛ gyae nyaŋ mmaraase,

kela kɔba yayam, kela kɔba yayam kpaakpaate,

128te keŋ mɛɛ kɛɛ n gbɛɛneŋ pou nyi ŋe dei dɔɔ,

mɛɛ kɔla gbɛɛkum kamasɛ.

129Nyaŋ mmaraase dana gyakoloŋ,

mena dɔɔ mee di ŋe dɔɔ.

130N nombia man kalese wola ne fa keŋmaŋee,

ne yele ŋon ɔ ba gyeŋ kolo ya na gyeŋ nombia.

131Ma te wola me nɔɔ mee lilii nɔɔloŋ,

nawolo nyi nyaŋ mmaraase ne gyɔ maŋ loo.

132Besena kɛɛ maŋ na n ke wii me waraŋase,

ŋgba mena keŋ debaŋ kamasɛ n ne yɛɛ fa baŋ bɛɛ gyae n yele nɛ.

133Gyee me nawɔɔ kekulu ŋgba mena keŋ n nombii doo nɛ,

naa yele dukum kamasɛ ke di me dɔɔ ya.

134Lɛɛ maŋ lee denibalaŋ kaŋeredo man,

na maa nyiŋ ta n gbɛɛneŋ dɔɔ.

135Booli n sia fa n tobaale,

na n ka wola maŋ n kebakesee.

136Siasaraŋ ne laŋ me sia ŋgba boo nɛ,

nawolo nyi bɔɔ ne di nyaŋ mmaraase dɔɔ ya.

137Degbeŋgyoo, n tenɛɛ,

te nyaŋ mmaraase doona ŋe gbɛɛ.

138Nyaŋ mmaraa keŋ n be yako see nɛ tenɛɛ,

baa tale mo wose lɔ ŋe dɔɔ nideli.

139Ne yɛɛ maŋ baŋ nideli,

nawolo nyi me kɔlara te bɛɛ n nombia.

140Me ta gyoo n keyakosee ŋan man nideli,

te n tobaale ne gyae ŋa.

141Doo nyi mɔɔ doo daale man ya te bee kulu maŋ koraŋ nɛ,

mɔɔ ne wolee n gbɛɛneŋ ŋan ya.

142N gbɛɛneŋ katenee doo kekpaakekpaa,

te nyaŋ mmaraa yɛɛ anokoare.

143Kayeyɛɛ na kaale te yala maŋ,

mɔna nyaŋ mmaraase ne yele mɛɛ nyaŋee.

144Nyaŋ mmaraase tenɛɛ debaŋ kamasɛ,

fa maŋ nombia man kenyii na maa nyiŋ nyeedoŋ.

145Mɛɛ baake neŋ lee me konɔɔ pou man, kpa maŋ Degbeŋgyoo,

na maa di n kebakesee dɔɔ.

146Mee wii baake neŋ, lɛɛ maŋ

na maa di nya mmaraase dɔɔ.

147Mɛɛ karatɛɛ wii baake neŋ nyi nya kyɔ maŋ,

me ta mo me loo gyakaa n nombii dɔɔ.

148Me sia bee wuu nelim pou ya,

na maa nyiŋ gyoo n keyakosee ŋan man.

149Nyii ma woya lee n kegyae keŋ taŋ ɔto ya nɛ dɔɔ,

gyee ma nyee, Degbeŋgyoo, lee nyaŋ mmaraase dɔɔ.

150Baŋ bɛɛ yɛɛ akpanyanyaŋ nombia ta benaa,

mɔna baŋ na nyaŋ mmaraase nsana dana lem.

151Mɔna Degbeŋgyoo, nyaŋ benaa,

te nyaŋ mmaraase pou yɛɛ anokoare.

152Lee gyaŋgba gyaŋgba te ma gyeŋa nya mmaraase,

nyi nyaŋ seena ŋa mokɔɔ nyi ŋe dee doo kekpaakekpaa.

153Kɛɛ me kaale na n ka lese maŋ,

nawolo nyi ma te wolee nyaŋ mmaraa ya.

154Di me nombia fa maŋ na n ke yoo lɛɛ maŋ,

yela maa nyiŋ nyeedoŋ lee n keyakosee keŋ dɔɔ.

155Nyeekelɛɛ na akpanyanyaŋtena nsana dana lem,

nawolo nyi bɔɔ ne kɛo n kebakesee ya.

156Degbeŋgyoo, n waraŋase kewii boe,

gyee ma nyee lee nyaŋ mmaraase ŋan dɔɔ.

157Me kɔlara baŋ bɛɛ naase maŋ diyem nɛ boe,

mɔna me ta lee nya mmaraa wɔle ya.

158Me naa baŋ bɔɔ ne di anokoare ya na, be dana maŋ ahiŋ,

nawolo nyi bɔɔ ne di n nombii dɔɔ ya.

159Kɛɛ mena keŋ mɛɛ gyae n gbɛɛneŋ ŋan,

gyee ma nyee, Degbeŋgyoo, lee n kegyae keŋ taŋ ɔto ya dɔɔ.

160N nombia pou yɛɛ anokoare,

nyaŋ mmaraase ŋan tenɛɛ nɛ taŋ ɔto ya.

161Kegyiise ne naase maŋ diyem yakaa,

mɔna n nombii te mɛɛ mo obuo fa.

162Mɛɛ nyaŋee lee n keyakosee dɔɔ,

ŋgba ŋon ɔ be nyiŋ yooman abɔɔ burum nɛ.

163Mɛɛ kɔla dekara te ke dana maŋ duwaare,

mɔna mɛɛ gyae nyaŋ mmaraa.

164Mɛɛ lese n yele betabo nyetooro wee dokoloŋ,

lee nyaŋ mmaraase ŋan tenɛɛ nɛ dɔɔ.

165Wosefɛɛreŋ gbagba doo fa baŋ bɛɛ gyae nyaŋ mmaraa keŋ,

te kolo be tale yela baa gyɔ be nae ya.

166Mɛɛ daa n nyeekelɛɛ, Degbeŋgyoo,

te mee di nyaŋ mmaraase dɔɔ.

167Mee di n gbɛɛneŋ na nya adansɛɛ nombia dɔɔ,

nawolo nyi mɛɛ gyae ŋa nideli.

168Mee di n gbɛɛneŋ na nya adansɛɛ nombia dɔɔ,

nawolo nyi n gyeŋ me gbɛɛneŋ pou.

169Degbeŋgyoo, yela me kewii kelii n gyaŋ,

fa maŋ nombia man kenyii lee n nombii keŋ dɔɔ.

170Yela me kasola kelii n gyaŋ,

lɛɛ maŋ lee n keyakosee keŋ dɔɔ.

171Maa gyuusu me nɔɔ lese n yele,

nawolo nyi n wola maŋ n kebakesee.

172Me laakem gyae ka mo n nombii kpee nɔɔneŋ,

nawolo nyi nyaŋ mmaraase pou tenɛɛ.

173Yela n nyiŋmaa kaa kyɔ maŋ,

nawolo nyi mɛɛ tɛɛ n gbɛɛneŋ dɔɔ.

174Degbeŋgyoo, n nyeekelɛɛ ne gyɔ maŋ loo,

te nyaŋ mmaraa ne yele mɛɛ nyaŋee.

175Yela maa nyiŋ nyeedoŋ na maa lese n yele,

na n ke yela nyaŋ mmaraase ke kyɔ maŋ.

176Ma te kpase ŋgba nam ŋon ɔ ba yoo nɛ,

kɛo n tobaale,

nawolo nyi ma te wolee nyaŋ mmaraase ya.