Mazimuriyaa 33

Maariyaa S'oossaa Sabussaa

1Hinttenoo, s'illotoo Med'inaa Godaw nashshechchan yes's'ite;

suure asatuu Aa galatanaw bessee.

2Maasink'k'uwaa diis's'iidde,

Med'inaa Godaa galatite;

tammu bak'etsaan waas'etteedda diitsaakka aw diis's'ite.

3Ooratsa yetsaa yes's'ite;

loytsi diis's'iidde, k'aalaa d'ok'k'issiide yes's'ite.

4Med'inaa Godaa k'aalay suuriyaa;

I ootsiyaa oosuwaa ubbay ammanettiyaawaa.

5Med'inaa Goday s'illotetsaanne tumu pirddaa dosee;

aggena Aa siik'uu sa'aa kumeedda.

6Med'inaa Godaa k'aalan salotuu med'etteeddino.

Aa doonaappe kesiyaa shemppuwaan

unttunttun de'iyaa med'etatuukka oosetteeddino.

7Wolk'k'aama abbaa haatsaa I ittisaan eelisseedda;

he c'iimmo haatsaa minjjaa sa'aan zeereedda.

8Sa'aa ubbay Med'inaa Godaa yayyo;

sa'aan de'iyaa Asay ubbay Aa bonchcho.

9Ayaw gooppe, I haasayina haneedda;

I azazina, minniide ek'k'eedda.

10Med'inaa Godaa erenna kawutetsatuwaa zoretaa S'oossay laalee;

unttunttu halchchuwaakka mela kesee.

11Med'inaa Godaa halchchuu med'inaw ek'k'iide de'ee;

Aa wozanaa k'ofaykka yeletaa ubbaa gakkanaw de'ee.

12S'oossay Med'inaa Godaa gideedda kawutetsay,

I baressa ootsiide dooreedda Asay anjjetteedawaa.

13Med'inaa Goday saluwaana duge s'eelliide,

asaa ubbaa be'ee.

14S'oossay bare de'iyaasaappe sa'aan de'iyaa ubbaa s'eellee.

15I unttunttu ubbaa wozanaa med'd'eedda;

unttunttu ootsiyaawaa ubbaa eree.

16Kaatii bare wotaadaraa c'oratetsan attena;

olanchchay bare wolk'k'aa minotetsan kessi akkena.

17Olaa paray s'oonissana giide naagiyaawe mela;

I bare wolk'k'aa minotetsan ashshanaw danddayenna.

18Med'inaa Godaa ayifetuu aw yayyiyaanne

aggena Aa siik'uwaan hidootaa ootsiyaa asatuwaa bollaanna.

19Hewenne, unttuntta hayk'k'uwaappe ashshanaassanne

koshaa wodiyaan pas'a wotsanaassa.

20Nuuni Med'inaa Godaan hidootaa ootseetto;

I nuuna maaddiyaawaanne nu gonddalliyaa.

21Nuuni Aa geeshsha suntsan ammanettiyaa diraw,

nu wozanay an nashettee.

22Abeet Med'inaa Godaw,

nuuni neenan hidootaa ootsiyaawaadan,

aggena ne siik'uu nuunanna gido.