Mazimuriyaa 104

S'oossaw Shiik'iyaa Galataa

1Ta shemppattee, Med'inaa Godaa galataa!

Abeet Med'inaa Godaw ta S'oossaw, neeni ay keeshshaa gitee!

Neeni bonchchuwaanne anggaa mayyaadda.

2Poo'uwaa afilaadan gullotaadda.

Neeni saluwaa dunkkaaniyaadan tolaadda.

3Ne golliyaa saluwaa guufantsuwaa bollan kees's'aasa.

Shaariyaa paraa gaariyaa kessaasa;

c'arkkuwaa k'efiyaan toggaasa.

4Neeni c'arkkotuwaa ne kiitanchchaa,1

tamaa lac'uwaakka ne k'ooma kessaasa.

5Neeni sa'aa Aa baasuwaa bolla essaadda;

I med'i med'inawukka k'aas's'enna.

6Wolk'k'aama abbay biittaa bollan afilaadan mic'etteedda;

haatsay wolk'k'aama deretuwaa kammeedda.

7Shin ne godetina haatsatuu bak'ateeddino;

ne azazuwaa sisiide, elleelleeddino.

8Unttunttu wogga deretuwaappe duge zanggaaraa,

neeni unttunttoo giigiseedda sa'aa goggeeddino.

9Haatsatuu simmiide biittaa kammennaadan,

unttunttu aad'd'anaw danddayenna zawaa essaadda.

10Neeni pulttotuwaa zanggaaraan pulttissaasa;

unttunttu haatsay deretuwaa gidduwaana goggee.

11Goggiyaawaappe bazzuwaa do'atuu ubbay ushiino;

denbbaa haretuu barenttu saamuwaa aappe aliino.

12Saluwaa kafotuu he haatsaa matan barenttu golliyaa kees's'iide,

tashiyaa giddon yes's'iino.

13Neeni wolk'k'aama deretuwaa bollan

saluwaappe iraa bukissaasa;

biittakka ne kushiyaa oosuwaa ayifiyaan kalissaasa.

14Neeni mehiyaw maataa,

asaw katsaa mokissaasa.

Hewenne, Asay biittaa ootsiide,

biittaappe katsaa demanaassa.

15Asaa wozanaa nashechchiyaa woyniyaa,

som"uwaa shic'issiyaa zayitiyaanne

wolk'k'aa kuntsiyaa k'umaa mokissaassa.

16Med'inaa Godaa mitsatuu,

I tokkeedda Liibaanoosa zigatuu,

daro iraa ushiino.

17Unttunttun kafotuu barenttu golliyaa kees's'iino;

k'oolletuukka s'iidaa bolla kees's'iide de'iino.

18D'ok'k'a deretuwaa bollan gaaratuu de'iino;

k'ay guppalletuu Shuchchaa gonggoluwaan k'osettiino.

19Wodiyaa payduwaa erissana mala,

neeni aginaa med'd'aadda.

Away bare wulliyaa wodiyaa eree.

20Neeni k'ammaa med'd'aadda;

d'uman do'ay ubbay kesee.

21Wodalla gaammotuu shankkatiidde gudiino;

unttunttu barenttoo miyaawaa S'oossaappe koyiino.

22Away kesiyaa wode,

guyye simmiide barenttu geessuwaan gisiino.

23He wode Asay bare oosoo kesee;

sa'ay k'ammana gakkanaw ootsee.

24Abeet Med'inaa Godaw, ne oosuu ay keeshshaa daree!

Ne aad'd'eeda eratetsan neeni unttunttu ubbaa med'd'aadda;

sa'ay neeni med'd'eeddawan kumeedda.

25Abbay hinin hewesh; I wolk'k'aamanne aakko;

payduu bayinna k'aas's'iyaa med'etatuwaan,

gitatuwaaninne guutsatuwaan kumiide de'ee.

26Hewaa bollan markkabatuu biino;2

k'ay neeni med'd'eedda Leewaataana giyaa dawii an kaa'ee.

27Neeni unttuntta koshshiyaa wodiyaan

unttunttoo k'umaa immana mala,

unttunttu ubbay neena s'eelliino.

28Neeni unttunttoo immina, unttunttu mas'iino;

neeni ne kushiyaappe yeggina,

unttunttu lo"obaa kalliino.

29Neeni ne som"uwaa gentsiyaa wode dagammiino.

Ne shemppuwaa neeni akkiyaa wode hayk'k'iide,

barenttu biittaw simmiino.

30Shin neeni ne shemppuwaa kiittiyaa wode,

haratuu med'ettiino; biittaakka ooratsaasa.

31Med'inaa Godaa bonchchuu med'inaw de'o;

Med'inaa Goday bare oosuwaan nashetto.

32I biittaa s'eellina, biittay k'aas's'ee;

k'ay I deretuwaa bochchina, deretuu c'uwattiino.

33Taani ta de'uwaa ubbaan Med'inaa Godaw yes's'ana;

taani de'eedda laytsaa ubbaan ta S'oossaa sabbana.

34Taani Med'inaa Godaan nashettiyaa diraw,

ta k'ofay Aa nashechcho.

35Nagaranchchatuu biittaappe d'ayino;

hawaappe sintsaw iitatuu de'oppino.

Ta shemppattee, Med'inaa Godaa galataa! Med'inaa Godaa galatite!