Mazimuriyaa 103

S'oossaa Siik'uwaa

Daawite s'aafeeddawaa

1Ta shemppattee, Med'inaa Godaa galataa!

Ta kumentsaa asatetsaw, Aa geeshsha suntsaa galataa.

2Ta shemppattee, Med'inaa Godaa galataa!

I new ootseedda keekkatetsaa ubbaa dogoppa.

3I ne nagaraa ubbaa atto gee;

I ne harggiyaa ubbaappe neena patsee.

4I neena duufuwaan gelennaadan ashshee;

aggena siik'uwaaninne maarotaan neena anjjee.

5Arggantsaadan neeni yalagana mala,

I ne de'uwaa ubbaan neena lo"obaa kalissee.

6Med'inaa Goday naak'etteeddawanttoo

s'illobaa ootseenne suuriyaan pirddee.

7I bare ogiyaa Musa,

bare oosuwaa Israa'eeliyaa asaw erisseedda.

8Med'inaa Goday k'arettiyaawaanne maariyaawaa;1

I hank'k'ettanaw elleellennawaanne

aggena siik'uu daruwaa.

9I ubbaa gede seerenna; med'inaw hank'k'ettenna.

10I nuuna nu nagaraadan ootsibeenna;

nu iitatetsaadan nuw zaaribeenna.

11Saluu sa'aappe d'ok'k'iyaawaadan,

Med'inaa Godaw yayyiyaawanttoo aggena Aa siik'uu dara.

12Away doliyaasaappe away wulliyaasay haakkiyaawaadan,

Med'inaa Goday nu bayzzuwaa nuuppe haassee.

13Aawuu bare naanaatoo k'arettiyaawaadan,

Med'inaa Goday barew yayyiyaawanttoo k'arettee.

14Ayaw gooppe, nuuni ayaappe med'etteeddentto I eree;

nuuni biittaa gidiyaawaa I akeekee.

15Asaa gidooppe, Aa de'uu maataa mala;

I bazzuwaa c'iishshaadan c'iishshee;

16c'arkkuu Aa bolla c'arkkina d'ayeedda;

I doleedda sa'ay erettenna.

17Shin Med'inaa Godaw yayyiyaawanttoo,

aggena Aa siik'uu med'inaappe med'inaa gakkanaassa.

Aa s'illotetsaykka na'aa na'aw gakkanaassa.

18Aa c'aak'uwaa naagiyaawanttussanne

Aa azazuwaa polanaw hassayiyaawanttussa.

19Med'inaa Goday salotuwaan bare kawutetsaa araataa esseedda;

Aa kawutetsay ubbaa mooddee.

20Hinttenoo, Aa kiitanchchatoo,

Aa azazuwaa poliyaa wolk'k'aamatoo,

I giyaawaa sisisiyaawantto,

Med'inaa Godaa galatite!

21Hinttenoo saluwaan de'iyaa minotoo,

Aa sheniyaa ootsiyaa k'oomatoo,

Med'inaa Godaa galatite!

22Hinttenoo,

I mooddiyaa sa'aa ubbaa med'etatoo,

ubbaykka Med'inaa Godaa galatite!

Ta shemppattee, Med'inaa Godaa galataa!