Mazimuriyaa 101

Kaatii S'oossaw Geliyaa K'aalaa C'aak'uwaa

Daawita mazamuriyaa

1Taani aggena siik'uwaabaanne s'illo pirddaabaa yes's'ana;

abeet Med'inaa Godaw, taani new yes's'ana.

2Taani suure ogiyaabaa k'oppana.

Neeni taakko awude yaan?

Taani ta golliyaan suuretetsan hamettana.

3Taani ta ayifiyaan pokkobaa s'eellikke.

S'oossaappe wora simmeedda asatuwaa oosuwaa is's'ay;

unttunttu mulekka taananna gidikkino.

4Wozanaa geellatetsay taappe haakko;

iitatetsaa taani erikke.

5Geeman bare shooruwaa zigiriyaawaa,

taani sirp'p'i ootsana.

Otorettiyaanne ayyiyaa asaa taani danddaykke.

6Unttunttu taananna de'ana mala,

biittaa bolla de'iyaa ammanettiyaawantta,

taani keeka ayifiyaan s'eellay.

Suuretetsan hamettiyaa Asay taw kiitettana.

7C'immiyaawe ta golliyaan de'enna;

wordduwaa haasayiyaawe ta sintsan gam"enna.

8Biittan de'iyaa iita asaa ubbaa,

taani gallassi gallassi d'ayissana;

iitaa ootsiyaawantta ubbaa,

taani Med'inaa Godaa katamaappe d'ok'ollana.