Dawro Full Bible Ethiopic
ሮመ 16
ሳሮታ
ክንክርያ ጌተትያ ካታማን ደእያ አማንያ አሳና ኦያ ኑ ምቻታ ፔባ ሎኦ ማጫ አሳ ግድያዋ ታን ህንተንታ ኤርሳይ። ህንተንቱ እዞ ጌሻቱ ጎዳ ሱንን ሞክያዋዳን ሞክተ፤ ቃይ እዛ ህንተንቱፐ ኮይያዌ አያ ግዶፐካ፥ እዞ ማድተ፤ አያዉ ጎፐ፥ እዛ ባረ ሁጰዉ ጮራ አሳ ማዳዉ፤ ቃይ ታና ታ ሁጰዉካ ዳርሳ ማዳዉ።
ክርስቶሳ የሱሳ ኦሱዋ ታናና እትፐ ኦያ ጵርስቂልዉነ እዝ አስና አቂላስ ታ ሳሮቶዋ ኦድተ። ኡንቱንቱ ታ ሸምፑዋ ድራዉ፥ ባረንቱ ሸምፑዋ አ እሜድኖ። ኡንቱንታ ታ ጻላላ ግደናን፥ አይሁዳ ግደና አሳ አማንያ አሳይ ኡባይካ ጋላቴ። ቃይ ኡንቱንቱ ጎልያ አማንያ አሳይ ሺቅያሳ ኦደ ጋከትያ አሳ ኡባ ሳሮ ጊተ። ኢስያ ጋድያን ክርስቶሳ ኮይሮ አማኔዳ ታ ሲቅያ ኤፓነቶሳዉ፥ ታ ሳሮቶዋ ኦድተ። ህንተንቶ ሎይ ዳቡሬዳ ማይራሞ ሳሮትተ። ታናና ቃሾ ጎለን ደኤዳ ታ ዳቦ ግዴዳ አይሁዳቱዋ፥ አንድሮንቆሳነ ዩንያሳ ሳሮትተ። የሱስ ኪቴዳዋንቱ ግዶን ኡንቱንቱ ሎይ ኤረቴዳዋንታ። ቃይ ኡንቱንቱ ክርስቶሳ ታፐ ካሰና አማኔድኖ።
ጎዳና እትፐተን ደእያ ታ ሲቆ ላግያ አምፕልያቶሳዉ ታ ሳሮቶዋ ኦድተ። ክርስቶሳ ኦሱዋ ኑናና እትፐ ኦያ ኡርባኖሳነ ታን ሲቅያ እስጻኩሳ ሳሮትተ። ክርስቶሳና እ ደእያዌ ኤረትና ፓጭያ ጾኔዳ አጰሊሳዉ ታ ሳሮቶዋ ኦድተ፤ አርስጾብሎሳ ሶይ አሳዉካ ታ ሳሮቶዋ ኦድተ። ታ ዳቦ ግዴዳ አይሁዳዊያ ሄሮድዮናነ ክርስቶሳ አማንያ ናርሲሰሳ ሶይ አሳ ሳሮትተ።
ጎዳ ኦሱዋን ዳቡርያ ትሩፋይናነ ትሩፎሶ ጌተትያ ማጫዋንታ ሳሮትተ፤ ቃይ ጎዳዉ ዳሮ ዳቡራደ ኦያ ሲቅያ ፐርሲሶ ሳሮትተ። ጎዳ ኦሱዋን ሎይ ኤረቴዳ ሩፎሳየዉነ ታና ባረ ናኣዳን ማዴዳ አ ዳይዉ ታ ሳሮቶዋ ኦድተ። ታ ሳሮቶዋ አስንክሪቶሳዉ፥ ፕሌጎናዉ፥ ሄርሜሳዉ፥ ፓትሮባሳዉነ ኡንቱንቱና ደእያ አማንያ እሻቱዋ ኡባዉ ኦድተ። ፕሌጎና፥ ዩሎ፥ ኔርያ፥ አ ምቻቶ፥ ኦሉምፖሳነ ኡንቱንቱና ደእያ ጾሳ አሳቱዋ ኡባ ሳሮትተ።
ጌሻ አሳዉ በስያ የረታ የረቲደ፥ እቱ እቱዋ ሳሮትተ፤ ክርስቶሳን አማንያዋንቱ ኡባቱ ህንተንታ ሳሮ ያጌድኖ።
ዉርሰ ዞርያ
ታናዳን አማንያዋንቶ፥ አሳ ግዶን ሻኮተ መያዋንታ፥ አሳ አማኖ ቦ ግድያዋንታነ ህንተ ታማሬዳ ትምርትያና ጋከተናዋ ታማርስያዋንታ አኬካናዳን፥ ታን ህንተንታ ዎሳይ። ኡንቱንቱኮ ሺቆፕተ። አያዉ ጎፐ፥ ሄዋ ማላባ ኦያዋንቱ ባረንቱ ኡሎ ኦኖፐ አትን፥ ኑ ጎዳ የሱስ ክርስቶሳዉ ኦክኖ፤ ባረንቱ ላብያ ሃሳያንነ ቅያን ኢታባ ቆፐና አሳ ዎዛና ባለኖ። ዎንጋላዉ ህንተ አዛዘቴዳዋ አሳይ ኡባይ ስሴዳ። ሄዋ ድራዉ፥ ታን ህንተባን ናሸታይ፤ ሽን ሎኦተዉ ህንተ አዳ ኤራንቻ ግዳናዳንነ ቃይ ኢታባዉ አሽከ ግዳናዳን ኮያይ። ሳሮተ ጾሳይ ሴጻና ህንተ ገድያፐ ጋርሳና ሃከና ማታ ዎደ ጋጫና።
ኑ ጎዳ የሱስ ክርስቶሳ አ ኬካተይ ህንተንቱና ግዶ።
ታናና ኦያ ጽሞቶሰ ህንተንታ ሳሮ ያጌ፤ ቃይ ሀዋዳንካ፥ ታ ዳባቱ ሉቅዮስ፥ ያሶንነ ሶሲጳጽሮስ ህንተንታ ሳሮ ያጊኖ።
ታን፥ ጻርጽዮስ፥ ሀ ዳብዳቢያ ጻፌዳዌ፥ ህንተንቶ ጎዳ ሱንን ሳሮታ ኪታይ።
አማንያ አሳይ ኡባይ አ ሶይን ሺቅያ ታ ሲራ ጋዮስ ህንተንታ ሳሮ ያጌ፤ ካታማ ሚሻ ኦይቂያ ኤራስጾስነ ኑ እሻይ ቁዋርጾስ ህንተንታ ሳሮ ያጊኖ። ኑ ጎዳ የሱስ ክርስቶሳ አ ኬካተይ ህንተንቱና ኡባና ግዶ። አመንእ።
ኑን ጾሳ ጋላቴቶ። ታን ዎንጋላ ባጋና የሱስ ክርስቶሳባ ኦዴዳዋዳንነ ዳሮ ዎድያፐ ጌሚደ፥ ሀእ ቆንጬዳ ቱማተዳን፥ ህንተ አማኑዋን ህንተንታ ጾሳይ ምንሳናዉ ዳንዳዬ። ሽን ሀእ ናባቱ ጻፌዳዋ ባጋና ቱማተይ ቆንጭያን ኤረታናዳን ኦዳ፤ ቃይ አሳ ኡባይ ጾሳ አማኒደ አዛዘታናዳን፥ መና ጾሳ አዛዙዋን፥ ሀ አላምያን ደእያ አሳ ዘረ ኡባዉ ቆንጬዳ።
አዳ ኤራተይ አ ጻላላዉ ደእያ እት ጾሳዉ የሱስ ክርስቶሳ ባጋና መናዉ ቦንቹ ግዶ። አመንእ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.