ሮመ

ጳዉሎስ

ሮመ አሳዉ

ጻፌዳ ኪታ

ገሉዋ

የሱስ ኪቴዳ ጳዉሎስ ሮመ አሳዉ ጻፌዳ ኪታይ፥ ጳዉሎስ ሮመን ደእያ ዎሳ ጎልያ ጾሞሳናዉ ቆፔዳ ድራዉ፥ እ ባናዉ ኡንቱንቱ ጊጊደ ናጋናዳን ኦናሳ። ጳዉሎሳ ቆፋይ ሮመን ደእያ አማንያዋንቱና ጉ ዎድያ ኦዳዋፐ ጉይያን፥ ኡንቱንቱ ማድና እስፔነ ባናሳ። ክርስትና አማኑዋባ ባረ ኤሬዳዋነ ሄዋ ቃይ አማንያ አሳይ ኦሱዋን ፔሻና ሀኖታ ቆንጭሲደ ጻፌዳ። ጳዉሎሳ ቆፋይ ኩመን ሀኖታን ቤትያዌ ሀ ኪታና።

ጳዉሎስ ሮመን ደእያ አማንያዋንቶ ሳሮታ አዋፐነ ኡንቱንቶ ዎሳናዋካ ህዶታ እሞዋፐ ጉይያን፥ ኪታዉ ግዶ ቆፋይ “ምሽራቹዋ ቃላይ ጾሳይ አሳ ጽልስያዌ፥ ኮይሩዋፐ ዉርሰ ጋካናዉ አማኑዋና ግድያዋ ኦዴ” (1:17)

ሄዋፐ ጉይያን ጳዉሎስ ሀ ቆፋ አሲደ ጻፌ። አይሁዳቱዋ ግድናካ አይሁዳ ግደና አሳ ግድናካ ኡባይ ናጋራዉ ሞደትያዋንታ ግድያ ድራዉ፥ ኡንቱንቱ ጾሳና ስገታናዉ ኮሼ። አሳይ ጾሳና ስገታናዉ ዳንዳይያዌ የሱስ ክርስቶሳን አማንያዋና። ጾሳና መያ ኦራ እትፐተ አይፊ ኦራ ደኡዋ ግድያዋ ጳዉሎስ አሲደ ኦዴዳ። አማንያ አሳይ ጾሳና ሳሮ ደኤ። ቃይ ጾሳ አያና ባጋና ናጋራነ ሀይቁዋ ዎልቃፐ ብለቴ። ጳዉሎስ ጾሳ ቆፋይነ አማንያ አሳ ደኡዋ ግዶን ኦያ ጾሳ አያና ዎልቃ ቆፋይ አየንቶ ኦዴ (5-8)። ሄዋፐ ካሊደ ቃይ ጳዉሎስ፥ “ጾሳይ አሳ ናናዉ ቆፔዳ ቆፋ ግዶን አይሁዳቱነ አይሁዳ ግደና አሳቱ ዋኒደ እትፐ ዋጸታናዉ ዳንዳያናዋንቴሻ?” ያግያ ኦሻ ዛራናዉ ባጸቲደ ደኤ።

ቃይካ ጳዉሎስ፥ አይሁዳቱ የሱሳ አከናን አጌዳዌ ጾሳ ቆፋ ግድያዋ ኦዴ። አያዉ ጎፐ፥ ሀዋ ማላ ሀኖታን አሳ ዘረይ ኡባይ ጾሳይ የሱሳ ባጋና ቆንጭሴዳ አ ኬካተን እትፐተ ኦናሳ። ግዶ ሽን፥ አይሁዳቱ የሱሳ አካናዉ ዎዲ ያናዋ ጳዉሎስ አማኔ። ዉርሰን ጳዉሎስ ክርስትና ደኡዋ ዋኒደ ደአናዉ በስንቶ ኦዴ። ጾሳዉ ኦናባ፥ አማንያ አሳቱ ባረንቱ ጋድያስነ ባረንቱ ግዶን እቱ እቶ ሲቁዋንነ ማታን ኦናባነ ቆፋ ጋሱዋን ደንድያ ኦሻቱዋባ ቆንጭሲደ ኦዴ።

ሸምፓቱዋ ኡባቶ እመቴዳ ቃን ቆፋቱዋ

ሮመ ኪታ ሁጰ ቆፋ ገሉዋ

አቶተይ አሳዉ ኮሽያዋ ግድያዋ

ጾሳ አሹዋ ኦግያ

የሱሳን ቤትያ ኦራ ደኡዋ

እስራኤልያ አሳዉ ደእያ ጾሳ ቆፋ

ክርስትናዉ በስያ ኦሱዋ

ዉርሰ ቆፋነ ሳሮታ