ዮሃንሳ ሳፃ 7

እስራኤልያ አሳፐ 144,000 አሳቱዋ ሶምእያን ማታፋይ ዎዳ

1ሄዋፐ ጉይያን፥ ታን ኦይዱ ኪታንቻቱ ኦይዱ ባጋ ሳኣ ጋጻን ኤቄዳዋንታ በኣድ። ሄ ኪታንቻቱ ሳኣ ቦላን፥ ዎይ አባ ቦላን፥ ዎይ አይ ም ቦላን፥ ጫርኩ ጫርከናዳን ተኤድኖ።1 2ቃይካ ደኡዋ ጾሳ ማታፋ ኦይቂደ ሀራ ኪታንቻይ አዋይ ሞክያሳፐ ከስያዋ ታን በኣድ። ሄ ኪታንቻይ ባረ ኮሻ ቁ ኦደ፥ ሳኣነ አባ ቆሀናዉ ዎልቃይ እመቴዳ ኦይዱ ኪታንቻቱዋ 3ጼሲደ፥ “ኑ ጾሳ ኦሳንቻቱዋ ዴሙዋን ኑን ማታፋ ዎና ጋካናዉ፥ ሳኣ ግድና ዎይ አባ ግድና፥ ዎይ ም ግድናካ ቆሆፕተ” ያጌዳ።2

4ታን ጾሳ ማታፋ ዴሙዋን ዎዳዋንቱ ፓይዱዋ ስሳድ። እስራኤልያ ዛርያ ኡባፐ እት ጼታነ ኦይታማነ ኦይዱ ሻአ አሳቱዋ ዴሙዋን ማታፋይ ዎዳ።

5ይሁዳ ዛርያፐ፥

ታማነ ላኡ ሻኣ ዴሙዋን ማታፋይ፥

ዎዳ።

ሮቤላ ዛርያፐ፥

ታማነ ላኡ ሻኣ።

ጋደ ዛርያፐ፥

ታማነ ላኡ ሻኣ።

6አሴራ ዛርያፐ፥

ታማነ ላኡ ሻኣ።

ንፍታሌመ ዛርያፐ፥

ታማነ ላኡ ሻኣ።

ምናሰ ዛርያፐ፥

ታማነ ላኡ ሻኣ።

7ስሞና ዛርያፐ

ታማነ ላኡ ሻኣ።

ሌዊያ ዛርያፐ

ታማነ ላኡ ሻኣ።

ይሳኮራ ዛርያፐ

ታማነ ላኡ ሻኣ።

8ዛብሎና ዛርያፐ፥

ታማነ ላኡ ሻኣ።

ዮሴፎ ዛርያፐ፥

ታማነ ላኡ ሻኣ።

ቢንያማ ዛርያፐ፥

ታማነ ላኡ ሻኣ

ዴሙዋን ማታፋይ፥

ዎዳ።

ቦ ማዩዋ ማዬዳ ጮራ አሳቱዋ

9ሄዋፐ ጉይያን፥ ዛርያ ኡባፐ፥ ቆሙዋ ኡባፐ፥ ያራ ኡባፐነ ዱማ ዱማ ጋድያ ቃላ ኡባፐ ኦንነ ፓይዳናዉ ዳንዳየና ዛዋይ ባይና ጮራ አሳ ታን በኣድ። ሄ አሳይ ቦ ማዩዋ ማዪደ፥ ዛምባ ሀይ ባረንቱ ኩሽያን ኦይቂደ፥ ካዉተ ኦይድያ ስንንነ ዶርሳ ስንን ኤቄዳ። 10ኡንቱንቱ ባረንቱ ቃላ ቁ ኦደ፥

“ኑ አቶተይካ፥

ካዉተ ኦይድያን ኡቴዳ፥

ኑ ጾሳፐነ ዶርሳፐ ዬ”

ያጌድኖ።

11ኪታንቻቱ ኡባይ ካዉተ ኦይድያ፥ ጭማቱዋነ ደኡዋን ደእያ ኦይዱ መታ ዩይ አደ ኤቄድኖ። ኡንቱንቱ ካዉተ ኦይድያ ስንን ባረንቱ ዴሙዋን ጉፋኒደ ጾሳዉ ጎይኒደ፥

12“አመንእ!

አንጁ፥ ቦንቹ፥

አዳ ኤራተይ፥

ጋላታይ፥ ሳባይ፥

ዎልቃይ፥ ምኖተይ፥

መናፐ መና ጋካናዉ ኑ ጾሳዉ ግዶ።

አመንእ!”

ያጌድኖ።

13ጭማቱዋፐ እቱ ታና፥ “ሀ ቦ ማዩዋ ማዬዳ አሳቱ ኦኔ? ኡንቱንቱ ሀቃፐ ዬድኖ?” ያጊደ ኦቼዳ።

14ታን፥ “ታ ጎዳዉ፥ ኔን ኤራሳ” ያጋድ። እ ታና ሀዋዳን ያጌዳ፦

“ሀዋንቱ ዳሮ ዋይያ ዋየቲደ ዬዳዋንታ።

ኡንቱንቱ ባረንቱ ማዩዋ ዶርሳ ሱን ሜጪደ፥

ቦጼዳዋንታ።3

15ሄዋ ድራዉ፥

ኡንቱንቱ ጾሳ ካዉተ ኦይድያ ስንን ኤቂደ፥

ቃማነ ጋላስ፥ አ ጌሻ ጎልያን፥

አዉ ኦኖ።

ቃይ እ ባረ ካዉተ ኦይድያን ኡቴዳዌ፥

ኡንቱንቱ ግዱዋን ደአና።

16ሀዋፐ ስንናዉ ኡባካ፥

ኡንቱንቱ ኮሻትክኖ፤

ዎይ ሳመትክኖ።

አዋይ ኡንቱንታ ሜና፤

ቃይ አይ ሴላይካ ኡንቱንታ ጉደና።4

17አያዉ ጎፐ፥ ካዉተ ኦይደዉ፥

ግዱዋን ኡቴዳ ዶርሳይ፥

ኡንቱንታ ሄማና።

ደኡዋ ሃ ፑልቱዋኮካ፥

ኡንቱንታ ካለና።

ጾሳይካ ኡንቱንቱ አይፍያ አፎ ኡባ ቁጭ ድጋና”

ያጌዳ።5