ዮሃንሳ ሳፃ 5

ማጻፋነ ዶርሳ

1እት ጻጸቶ ማጻፋይ1 ካዉተ ኦይድያን ኡቴዳዋ ኡሸቻ ኩሽያን ደእያዋ በኣድ፤ ሄ ጻጸቶ ማጻፋይ ላኡ ባጋናካ ጻፈት ኡቴዳ፤ ቃይ ላፑ ማታፋይ አ ቦላ አታመቴዳ።2 2ታን እት ዎልቃማ ኪታንቻይ ባረ ቃላ ቁ ኦደ፥ “ማታፋ ዶዪደ፥ ጻጸቶ ማጻፋ ብላናዉ በስያ ኡራይ ኦኔ?” ያጊደ፥ አዋይያዋ በኣድ። 3ሳሉዋን ግድና ዎይ ሳኣን ግድና፥ ዎይ ሳኣፐ ጋርሳን3 ግድና፥ ሄ ጻጸቶ ማጻፋ ብላናዉ ዎይ አ ግዱዋ ጼላናዉ ኦንነ በስያዌ ባዋ።

4ጻ ማጻፋ ብላናዉ ዎይ አ ግዱዋ ጼላናዉ በስያ ኡራይ ባይና ድራዉ፥ ታን ዳሮ ዬካድ። 5ጭማቱዋፐ እቱ ታና፥ “ዬኮፓ፤ በአ፥ ይሁዳ ዛርያ ግዴዳ ጋሙ፥ ዳዊተ ዛሪ ጾኔዳ። እ ማታፋ ዶያናዉነ ጻጸቶ ማጻፋ ብላናዉ በሴ” ያጌዳ።4

6ታን ካዉተ ኦይድያፐ፥ ደኡዋን ደእያ ኦይዱ መታቱዋፐነ ቃይ ጭማቱዋፐ ግዱዋን፥ ሹከቴዳ ዶርሳ ማላቲደ ኤቄዳዋ በኣድ፤ አዉ ላፑ ካጨቱነ ላፑ አይፈቱ ደኢኖ። ሄዋንቱ አላምያ ኡባ ኪተቴዳ ጾሳ ላፑ አያናቱዋ።5 7ሄ ዶርሳይ ቢደ፥ ካዉተ ኦይድያ ቦላ ኡቴዳዋ ኡሸቻ ኩሽያፐ ጻጸቶ ማጻፋ አኬዳ። 8እ ሄ ጻጸቶ ማጻፋ አኬዳ ዎደ፥ ደኡዋን ደእያ ኦይዱ መታቱነ ላታማነ ኦይዱ ጭማቱ አ ስንን ኩንዴድኖ። ኡንቱንቱ ሁጲያን ሁጲያን ዲነ እጻናይ ኩሜዳ ዎርቃ ሚሻ ኦይቄድኖ። ሄ እጻናይ ጌሻቱ ጾሳ ዎስያዋ።6 9ኡንቱንቱ፥

“ጻ ማጻፋ አካናዉነ፥

ማታፋ ዶያደ፥

ጼላናዉ ነዉ በሴ።

አያዉ ጎፐ፥ ኔን ሹከታዳ።

ኔን ቆሙዋ ኡባፐ፥

ዱማ ዱማ ጋድያ ቃላ ኡባፐ፥

ያራ ኡባፐነ፥ ዛርያ ኡባፐ፥

ነ ሱን፥ ጾሳዉ አሳ ዎዛዳ።7

10ኑ ጾሳዉ ኦና ማላ፥

ኡንቱንታ ኔን፥ ካታቱዋነ፥

ቄሳቱዋ ኦዳ።

ቃይ ኡንቱንቱ ሳአንካ ሞዳና”

ያጊደ ኦራ ማዝሙርያ የጺኖ።8

11ሄዋፐ ጉይያን፥ ታን ጼላደ፥ ካዉተ ኦይድያ፥ ደኡዋን ደእያ ኦይዱ መታቱዋነ ጭማቱዋ ዩይ አደ ኤቄዳ ዳሮ ኪታንቻቱዋ ኮሻ ስሳድ፤ ኡንቱንቱ ሻኣንነ ሚሎንያን ፓይደቴድኖ።9 12ሄ ኪታንቻቱ ባረንቱ ቃላ ቁ ኦደ፥

“ሹከቴዳ ዶርሳይ

ዎልቃ፥ ዱረተ፥

አዳ ኤራ፥

ምኖተ፥

ቦንቹዋ፥ ሳባ፥

ጋላታ አካናዉ በሴ!”

ያጌድኖ።

13ሄዋፐ ጉይያን፥ ሳኣን፥ ሳሉዋን፥ ሳኣፐ ጋርሳንነ አባ ግዱዋን ደእያ መታ ኡባይነ ቃይ ሄዋንቱን ደእያ መታ ኡባይ፥

“ካዉተ ኦይድያ ቦላ፥

ኡቴዳዎነ ዶርሳዉ፥

ጋላታይ፥ ቦንቹ፥

ሳባይነ ዎልቃይ፥

መ መናዉ ግዶ!”

ያጊደ የጽሽን ስሳድ።

14ደኡዋን ደእያ ኦይዱ መታቱ፥ “አመንእ” ያግና፥ ጭማቱ ጉፋኒደ ጎይኔድኖ።