ዮሃንሳ ሳፃ 22

1ሄዋፐ ጉይያን፥ ኪታንቻይ ታና ጾሳ ካዉተ ኦይድያፐነ ዶርሳ ካዉተ ኦይድያፐ ጎግያ ብርሊያዳን ጶልያ ደኡዋ ሃ ሻፋ በሴዳ።1 2ሄ ሻፋይ ካታማ ኦግያ ግዱዋና ዱገ ጎጌ። ሻፋፐ ሄፍን ባጋናነ ሀፍን ባጋና አገናን እት ገደነ ላይን ታማነ ላኡ ገደ አይፍያ ደኡዋ ምይ ደኤ። ሄ ም ቦንቹ ደእያዌ፥ ዛርያ ኡባ ሀርግያፐ ፓናሳ።2

3ሄ ካታማን ጾሳ ሸቃይ አይነ ባዋ። ጾሳ ካዉተ ኦይዲነ ዶርሳ ካዉተ ኦይዲ ሄ ካታማን ደአና። ጾሳ ኦሳንቻቱ ጾሳዉ ጎይናና።3 4ኡንቱንቱ አ ዴሙዋ በአና፤ አ ሱንይ ኡንቱንቱ ዴሙዋን ጻፈታና። 5ሄዋፐ ስንዉ ሀራ ቃማይ ባዋ። ኡንቱንቶ ጾምፕያ ዎይ አዋ ፖኡዋ ኮሸና፤ አያዉ ጎፐ፥ ጎዳይ ጾሳይ ኡንቱንቶ ጾምፕያ ግዳናዋ። ኡንቱንቱ መ መናዉ ካተታና።4

የሱሳ ዩሳ

6ሄዋፐ ጉይያን፥ ኪታንቻይ ታና ሀዋዳን ያጌዳ፤ “ሀ ታን ሃሳይያዌ ቱሙዋነ አማነትያዋ። ናባቶ ባረ ጌሻ አያና እምያ ጎዳይ ጾሳይ፥ ማታን ሀናናዉ በስያዋ ባረ ኦሳንቻቱዋ በሳናዉ ባረ ኪታንቻ ኪቴዳ” ያጌዳ።

7የሱስ፥ “በአ! ታን ኤለካ ያና። ሀ ማጻፋን ደእያ ትምቢትያ ናግያዋንቱ አንጀቴዳዋንታ” ያጌዳ።

8ታን ዮሃንስ፥ ሀ ኡባባ ስሳድነ በኣድ። ታን ሀዋ ስሴዳ ዎደነ በኤዳ ዎደ፥ ሄዋ ታና በሴዳ ኪታንቻዉ ጎይናናዉ፥ አ ገድያን ኩንዳድ። 9ሽን ኪታንቻይ ታና፥ “ሄዋ ኦፓ። ታን ኔናዳንነ ናበ ግዴዳ ነ እሻቱዋዳን፥ ቃይ ማጻፋን ደእያባዉ አዛዘትያ ኡባቱዋዳን አይልያ። ጾሳዉ ጎይና” ያጌዳ።

10ሄዋፐ ጉይያን፥ ኪታንቻይ ታና፥ “ሀናና ጌዳ ሀ ማጻፋ ቃላ ማታፋን ጎርዶፓ። አያዉ ጎፐ፥ ሀ ኡባባይ ፖለትያ ዎዲ ማታቴዳ። 11ኢታባ ኦያዌ ጉጂደካ ኢታባ ኦ፤ ቱናይ ጉጂደካ ቱኖ። ሎኦባ ኦያዌ ጉጂደካ ሎኦባ ኦ፤ ጌሻይነ ጉጂደካ ጌሻ ግዶ” ያጌዳ።5

12የሱስ፥ “በአ! ታን ኤለካ ያና። አሳ ኡባዉ አ ኦሱዋዳን እማናዉ፥ ታ ዎይታ አካ ያና።6 13ታን አልፋነ ኦሜጋ፤ ኮይሩዋነ ዉርሰ፤ ዶመነ ፖሉዋ” ያጌዳ።7

14ባረንቱ ማዩዋ ጌሽ ሜጭያዋንቱ አንጀቴዳዋንታ። ደኡዋ ም አይፍያ ማናዉነ ካታማ ፐንግያና ገላናዉ ኡንቱንቶ ማታይ እመቴዳ።8 15ሽን ካናቱ፥ ብትያዋንቱ፥ ዎሹምያዋንቱ፥ ሸምፑዋ ዎያዋንቱ፥ ኤቃዉ ጎይንያዋንቱነ ባረንቱ ሃሳያንነ ባረንቱ ኪታን ዎርዶትያዋንቱ ካረና ደኢኖ።

16“ታን የሱስ፥ ሀ የዉዋ ህንተንቶ ዎሳ ጎለቱዋን ማርካታና ማላ፥ ታ ኪታንቻ ኪታድ። ታን ዳዊታ ጎልያ የለታ። ታን ፖእስያ ዎንታ ባካልያ” ያጌዳ።9

17ጌሻ አያናይነ ገለዉና፥ “ሃያ” ያጊኖ። ቃይ ሀዋ ስስያዌ ኦንነ፥ “ሃያ” ያጎ። ሳመቴዳ አሳይ ኦንነ ሃ ዮ። ደኡዋ ሃ ኮይያ አሳይ ኦንነ ጮ አኮ።10

18ታን ሀ ማጻፋን ጻፈቴዳ ሀናና ጌዳ ቃላ ስስያ ኦናነ ዞራይ። ኦንነ ሀ ቃላ ቦላ እትባ ጉጆፐ፥ ጾሳይ ሀ ማጻፋን ጻፈቴዳ ቦሻ አ ቦላ ጉጃና። 19ኦንነ ማጻፋን ደእያ ትምቢትያ ቃላፐ አያነ ፓጭሶፐ፥ ሀ ማጻፋ ግዶን ቆንጭሴዳ ደኡዋ ም አይፍያፐነ ጌሻ ካታማፐ አ ጋክያ ግሹዋ ጾሳይ ፓጭሳና።11

20ሀ ኡባባዉ ማርካትያዌ፥ “ቱማ! ታን ኤለካ ያና” ያጌ።

አመንእ። ጎዳ የሱሳ፥ ኔን ሃያ።

21ጎዳ የሱስ ክርስቶሳ አ ኬካተይ ህንተናና12 ኡባና ግዶ። አመንእ።