ዮሃንሳ ሳፃ 16

ጾሳ ሀንቁ ኩሜዳ ከረቱዋ

1ሄዋፐ ጉይያን፥ ላፑ ኪታንቻቶ፥ “ቢደ ጾሳ ሀንቁዋ ላፑ ከርያፐ ሳኣን ጉስተ” ያጊደ፥ ጌሻ ጎልያፐ ሃሳይያ ዎልቃማ ኮሻ ታን ስሳድ።

2ኮይሮ ኪታንቻይ ቢደ፥ ባረ ከርያን ደእያዋ ሳኣን ጉስና፥ ዶኣ ማላይ ደእያዋንቱ ቦላነ ሄ ዶኣ ምስለዉ ጎይንያዋንቱ ቦላ ሎይ ሳክያ ማይ ከሴዳ።1

3ላኤን ኪታንቻይ ባረ ከርያን ደእያዋ አባን ጉስና አባ ሃይ ሀይቄዳ አሳ ሱ ማላቴዳ። ቃይ አባን ደእያ መታ ኡባይካ ሀይቂ አጌዳ።

4ሄዘን ኪታንቻይ ባረ ከርያን ደእያዋ ሻፋቱዋንነ ፑልታቱዋን ጉስና ኡንቱንቱ ሱ ግዴድኖ።2 5ሃዉ አዎትያ ኪታንቻይ ሀዋዳን ያግያዋ፥ ታን ስሳድ፤

“ካሰካ ሀእካ ደእያ ጎዳዉ፥

ጌሻዉ፥ ሀ ፕርዳ ፕርዴዳ ድራዉ፥

ኔን ጽሉዋ።

6ኡንቱንቱ ጌሻቱዋ ሱነ፥

ናባቱዋ ሱ ጉሴዳ ድራዉ፥

ኔን ኡንቱንታ ኡሻናዉ፥

ሱ ኡንቱንቶ እማዳ።

ኡንቱንቱ ባረንቶ፥

በስያዋ አኬድኖ”

ያጌዳ።

7ያርሹዋ ያርሽያ ሳፐ፥

“ጎዳዉ፥ ኡባፐ ዎልቃማ ጾሳዉ፥

ነ ፕርዳይ ቱሙዋነ ጽሉዋ!”

ያግያ ኮሻ ታን ስሳድ።

8ኦይደን ኪታንቻይ ባረ ከርያን ደእያዋ አዋይፍያ ቦላን ጉስና ባረ ታማ ሴላን አሳ ጉዳናዉ፥ አዋይፈዉ ማታይ እመቴዳ። 9አሳይ ዎልቃማ ሴላን ጉደቲደ ሀ ቦሻቱዋ ቦላን ማታይ ደእያ ጾሳ ሱን ቦሬዳ። ሽን ባረ ናጋራፐ ስምቤናነ ጾሳ ግታተካ ቦንችቤና።

10እቼሸን ኪታንቻይ ባረ ከርያን ደእያዋ ዶኣ ካዉተ ኦይድያ ቦላ ጉስና፥ ሄ ዶኣ ካዉተይ ሜዳ። አሳይ ባረ ሴላ ድራዉ፥ ባረ እንጻርሳ ሳኤዳ።3 11ቃይ አሳይ ባረ ሴላ ድራዉነ ባረ ማይ ድራዉ ሳሉዋ ጾሳ ሸቄዳ። ሽን ባረ ኦዳ ናጋራፐ ስምቤና።

12ኡሱፑን ኪታንቻይ ባረ ከርያን ደእያዋ ዎጋ ኤፍራጺሳ ጌተትያ ሻፋን ጉስና አዋይ ዶልያ ባጋፐ ያና ካታቶ ኦጊ ጊጋናዳን፥ ሃይ መሌዳ።4 13ሄዋፐ ጉይያን፥ ታን ሼያ ማላትያ ሄዙ ቱና አያናቱ ዳዊያ ዶናፐ፥ ዱኣ ዶናፐነ ዎርዱዋ ትምቢትያ ኦድያዋ ዶናፐ ከስሽን በኣድ። 14ኡንቱንቱ ማላቱዋ ኦያ ጻላሀቱዋ አያናቱዋ። ሄ ሄዙ ኢታ አያናቱ ኡባፐ ዎልቃማ ጾሳ ዎልቃማ ጋላሳን፥ ሳኣ ካታቱዋ ኡባ ኦላዉ ሺሻናዉ ባና።

15“በአ፥ ታን ካይሱዋዳን ያና። አሳ ስንን ካሎ ሀመቲደ ዬላተና ማላ፥ ገምእሸናን ባረ ማዩዋ ማዪደ ናግያ ኡራይ አንጀቴዳዋ!” ያጌዳ።

16ሄ ኢታ አያናቱ ካተቱዋ እብራይስጸ ቃላን አርማገዶና5 ጌተትያ ሳኣ ሺሼድኖ።6

17ላፑን ኪታንቻይ ባረ ከርያን ደእያዋ ጫርኩዋን ጉስና፥ ጌሻ ጎልያን ደእያ አራታፐ፥ “ፖለቴዳ” ያግያ ዎልቃማ ኮሻይ ዬዳ። 18ሄዋፐ ጉይያን፥ ዋልቃንይ ዎልቃሜዳ፤ ጉንይ ስሰቴዳ፤ ጉጉንይካ ጉሜዳ። ቃይ ቢታይ ፓላ ቃ ቃጼዳ። አሳይ ሳኣን መቶደፐካ ቢታይ ሄዋ ማላ ቃ ቃጽ ኤረና፤ ሄዌ ኡባፐ አዳ ቃ። 19ዎልቃማ ካታማይ ሄዙ ከሲደ ዛኤዳ። ቢታ ኡባን ደእያ ካታማቱ ዬድኖ። ጾሳይ ዎልቃማ ባብሎኖ ቆፒደ፥ ባረ ኢታ ሀንቁዋ ዎይንያ ኤሳይ ኩሜዳ ቡርጩኩዋፐ ዎይንያ ኤሳ ባብሎኖ ኡሼዳ።7 20አባን ዶደቴዳ ቢታይ ኡባይ ዬዳ፤ ደሪካ ቤትቤና። 21አሳ ቦላ ኦይታሙ ኪሎ ኬና ዴጽያ ዎልቃማ ሻቻይ ሳሉዋፐ ዎዳ። አሳይ ሄ ሻቻ ቦሻ ድራዉ፥ ጾሳ ቦሬዳ፤ አያዉ ጎፐ፥ ቦሻይ ዳሮ ዎልቃማ።8