ዮሃንሳ ሳፃ 14

ታን ዶርሳነ 144,000 አሳቱዋ በኣድ

1ሄዋፐ ጉይያን፥ ታን በኣድ። በእተ፥ ዶርሳይ ጽዮነ ደርያ ቦላ ኤቄዳ። አ ሱንይነ አ አቡ ሱንይ ዴሙዋን ጻፈቴዳ፥ እት ጼታነ ኦይታማነ ኦይዱ ሻአ አሳቱ አናና እትፐ ደኢኖ።1 2ሳሉዋፐ ኩን ሃ ጉንነ ዳዳ ጉን ማላትያ ዎልቃማ ኮሻ ታን ስሳድ። ቃይ ታን ስሴዳ ኮሻይ ዲ ዲጽያዋንቱ ባረንቱ ዲ ዲጽና ስሰትያ ኮሻ ማላቴ። 3እት ጼታነ ኦይታማነ ኦይዱ ሻአ አሳቱ ካዉተ ኦይድያ ስንን፥ ኦይዱ ፓጻ ደእያ መታቱዋ ስንንነ ጭማቱዋ ስንን ኤቄድኖ። ሳኣፐ ዎዘቴዳ ኡንቱንቱፐ አትን፥ ሀራይ ኦንነ ታማራናዉ ዳንዳየና ኦራ ማዝሙርያ የጼድኖ። 4ሀዋንቱ ጌሻ አሳቱዋ ግድያ ድራዉ፥ ማጫዋንቱና ጋከቲደ ባረና ቱንስበይክኖ። ዶርሳይ2 ብያሳ ኡባ ኡንቱንቱ ካሊኖ። ኡንቱንቱ ጾሳዉነ ዶርሳዉ ባይራ ግዳናዉ፥ ሳኣ አሳ ግዶፐ ዎዘቴዳዋንታ። 5ኡንቱንቱ ኡባካ ዎርዶት ኤርክኖ፤ ኡንቱንቱን ባይዙ ባዋ።3

ታን ጾሳ ኪታንቻ በኣድ

6ሳኣን ደእያ አሳ ኡባዉ፥ ዛርያ ኡባዉ፥ ቆሙዋ ኡባዉ፥ ዱማ ዱማ ቢታ ቃላ ኡባዉነ ያራ ኡባዉ መና ዎንጋላ ምሽራቹዋ አዋያናዉ፥ ቦላ ሳሉዋን ፓልያ ሀራ ኪታንቻ ታን በኣድ። 7ሄ ኪታንቻይ ባረ ቃላ ቁ ኦደ፥ “ጾሳዉ ያይተ፤ አ ቦንችተ። አያዉ ጎፐ፥ ሳኣ አሳ እ ፕርድያ ሳቲ ጋኬዳ። ሳሉዋ፥ ሳኣ፥ አባነ ሃ ፑልቱዋ መዳ ጾሳዉ ጎይንተ” ያጌዳ።

8ሀራ ላኤን ኪታንቻይ፥ “ዎልቃማ ባብሎና ኩንዳዱ፤ እዛ ኩንዴዳ ጋሱነካ አሳ ዛርያ ኡባ ኢታ ኦሱዋ ኦስስያ ድራሳ” ያጊደ፥ ኮይሮ ኪታንቻ ካሌዳ።4

9ሄዘን ኪታንቻይ ባረ ኮሻ ቁ ኦደ፥ ሀዋዳን ያጊደ፥ ኮይሮ ላኡ ኪታንቻቱዋ ካሌዳ፤ “ዶአዉነ አ ምስለዉ ጎይንያ ኦንነ ቃይ አ ማላ ባረ ዴሙዋን ዎይ ባረ ኩሽያን ዎያ ኦንነ ደኦፐ፥ 10ጾሳይ ባረ ዎልቃማ ሀንቁዋ ቡርጩኩዋን ኩንዳ ሀንቁዋ ዎይንያ ኤሳ እ ኡሻና። ሄዋ ኦዳ ኡባይ ጌሻ ኪታንቻቱዋ ስንንነ ዶርሳ ስንን፥ ታማንነ ኤጽያ ዲንያን ፓጻ ካኤታና።5 11ኡንቱንታ ፓጻ ካእያ ታማ ጩዋይ መ መናዉ ጩዋታና። ዶአዉነ ሄ ዶኣ ምስለዉ ጎይንያ ኦስነ ቃይ ሄ ዶኣ ሱን ማላታና ደእያ ኦስነ ቃማነ ጋላስ ሸምፑ ባዋ” ያጌዳ።6

12ጾሳዉ አዛዘትያነ የሱሳዉ አማነትያ ጌሻቱ ዳንዳይያ ዳንዳያይ ሀዋና።

13ሄዋፐ ጉይያን ሳሉዋፐ፥ “ሀዋ ጻፋ፤ ሀዋፐ ስንዉ ጎዳን ሀይቂያዋንቱ አንጀቴዳዋንታ” ያግያ ኮሻ ታን ስሳድ።

አያናይ፥ “ቱማ፤ ኡንቱንቱ ባረንቱ ዳቡራፐ ሸምፓና፤ አያዉ ጎፐ፥ ኡንቱንቱ ሎኦ ኪታዉ፥ ጾሳይ ሎኡዋን ዛራና” ያጌ።

ታን ቆይቻ ዎድያ በኣድ

14ቃይካ ታን በኣድ። በእተ፥ ቦ ሻሪ ደኤ። ሻርያ ቦላን አሳ ናኣ ማላትያዌ ኡቴዳ፤ አ ሁጲያን ዎርቃ ካላቻይ፥ ቃይ አ ኩሽያን ቃራ ባጫይ ደኤ።7 15ሀራ ኪታንቻይ ጌሻ ጎልያፐ ከሲደ፥ ሻርያ ቦላን ኡቴዳዎ ባረ ቃላ ቁ ኦደ፥ “ቆይቻ ሳቲ ጋኬዳ ድራዉ፥ ነ ባጫ የዳደ ካ ቆይጫ፤ አያዉ ጎፐ፥ ሳኣ ካይ መሌዳ” ያጌዳ።8 16ሻርያ ቦላን ኡቴዳዌ፥ ባረ ባጫ ሳኣ የዲደ፥ ሳኣ ካ ጫኬዳ።

17ቃይካ ሳሉዋን ደእያ ጌሻ ጎልያፐ ሀራ ኪታንቻይ ከሴዳ፤ አዉካ ኩሳ ባጫይ ደኤ።

18ታማዉ ካፖ ግዴዳ ሀራ ኪታንቻይ ያርሽያ ሳፐ ከሲደ፥ ኩሳ ባጫይ ደእያ ኪታንቻዉ ባረ ቃላ ቁ ኦደ፥ “ዎይንያ አይፊ ቴሬዳ ድራዉ፥ ነ ኩሳ ባጫ የዳደ፥ ሳኣን ደእያ ዎይንያ ቱራፐ ሆንዶዳ አይፍያ ቃንጻ!” ያጌዳ። 19ሄ ኪታንቻይ ባረ ባጫ ሳኣ የዲደ፥ ሳኣን ደእያ ዎይንያፐ ሆንዶዳ አይፍያ ቃንጼዳ፤ ጾሳ ዎልቃማ ሀንቁዋ ሄ ዎይንያ ጉምእያ ኦላን የጌዳ። 20ካታማፐ ጋጻን ደእያ ዎይንያ አይፍያ ጉምእያ ኦላን ዎይንያ አይፊ ጉምኤቴ። ሱይ ከሲደ፥ ሄ ዎይንያ ጉምእያ ኦላፐ ሄዙ ጼቱ ኪሎ ሚትርያ ኬና ሃኪደ፥ ፓራዉ ፑሉዋ ጋክያዋ ኬና ቁ ጊደ ኤሌዳ።9