ዮሃንሳ ሳፃ 1

1ኤሌል ሀናናዉ በስያዋ ባረ ኦሳንቻቱዋ በሳና ማላ፥ ጾሳይ የሱስ ክርስቶሳዉ እሜዳ ሳጻይ ሀዋ፤ የሱስ ባረ ኪታንቻ ኪቲደ፥ ሀ ሳፃ ባረ ኦሳንቻ ዮሃንሳ ኤርሴዳ። 2ዮሃንስ በኢደ ቱማተን ኦዴዳ ኡባባይ፥ ጾሳ ቃላነ የሱስ ክርስቶሳ ማርካተ። 3ሀ ማጻፋ ናባብያ ኡራይ1 አንጀቴዳዋ፤ ቃይ ሀ ትምቢትያ ማጻፋ ስስያዋንቱነ ሀ ማጻፋን ጻፈቴዳዋ ናግያዋንቱ አንጀቴዳዋንታ፤ አያዉ ጎፐ፥ ሀ የዉ ፖለታናዉ ዎዲ ማታቴዳ።

ኢስያን ደእያ ላፑ ዎሳ ጎለቶ ኪተቴዳ ሳሮታ

4ታን ዮሃንስ፥ ኢስያ ጋድያን2 ደእያ ላፑ ዎሳ ጎለቶ ያጋይ፤

ካሰ ደእያ ጾሳፐ፥

ሀእካ ደእያ ጾሳፐ፥

ስንፐካ ያና ጾሳፐ፥

ቃይ አ ካዉተ ኦይድያ ስንን ደእያ ላፑ አያናቱዋፐ፥

አ ኬካተይነ ሳሮተይ፥

ህንተንቶ ግዶ።3

5ቃይ አማነቴዳ ማርካ፥

ሀይቁዋፐ ኮይሮ ደንዴዳ ናኣፐ፥

ሳኣ ካታቱዋ ሞድያ የሱስ ክርስቶሳፐ፥

አ ኬካተይነ ሳሮተይ፥

ህንተንቶ ግዶ።

እ ኑና ሲቄነ፥

ቃይ ኑ ናጋራ አይለተፐካ፥

ባረ ሱን ኑና ከሴዳ።4

6ኑና ባረ ጾሳዉነ አዎ ኦና ማላ፥

እ ኑና ካታቱዋነ፥

ቄሳቱዋ ኦዳ፤

አዉ መናፐ መና ጋካናዉ፥ ቦንቹነ

ሞድያ ዎልቃይ ግዶ። አመንእ።5

7በእተ፥

የሱስ ሻርያን ዬ።

አሳይ ኡባይ፥ ሀራይ አቶ፥

አ ጫዴዳዋንቱካ፥ አ በአና፤

ሳኣን ደእያ አሳይ ኡባይ፥

አ ጋሱዋን ዬካናዋንታ።

ሀዌ ቱሙፐ ሀናናዋ። አመንእ።6

8ካሰ ደእያዌ፥ ሀእካ ደእያዌ፥ ስንፐካ ያና ጎዳይ፥ ኡባፐ ዎልቃማ ጾሳይ፥ “ኡባባዉ አልፋይነ ኦሜጋይ፥ ኮይሩነ ዉርሰይ ታና”7 ያጌ።8

ክርስቶስ ሳጻን ቆንጬዳዋ

9ታን ዮሃንስ፥ ህንተንቱ እሻይ፥ ህንተናና የሱስ ክርስቶሳ ዋይያነ አ ካዉተ ቃይ አ ዳንዳያ እትፐ ሻከትያዌ፥ ጾሳ ቃላ ኦዴዳ ድራዉነ የሱሳዋ ማርካቴዳ ድራዉ፥ ፒጽሞ ግያ ሃይ ዶዶ ቢታን ደኣድ። 10ጎዳ ጋላሳን ታን አያናን ደአይ፤ ታን ታፐ ጉየና ማላካታ ዋሱዋ ማላ ዎልቃማ ኮሻ ስሳድ። 11ሄ ኮሻይ ታና፥ “ኔን በእያዋ ማጻፋን ጻፋ፤ ኢስያን ደእያ ላፑ ዎሳ ጎለቶ፥ ኤፈሶና፥ ሳምርኔሳ፥ ጰርጋሞና፥ ትያጽሮና፥ ሳርዴሳ፥ ፕላደልፍያ፥ ሎዶቅያ ዎሳ ጎለቶ ዬዳ” ያጌዳ።

12ታን ታዉ ኦድያ ኮሻ በአናዉ ጉየ ስማድ፤ ጾምፕያ ዎያ ላፑ ዎርቃ ባላቱዋ በኣድ። 13ሄ ባላቱዋ ግዶን አሳ ናኣ ማላትያዋ በኣድ፤ አዱሳ አፍላ ባረ ገድያ ጋ ማዪደ፥ ዎርቃ ዳንጩዋ ባረ ትራን ዩሽ አዳ።9 14አ ሁጲነ አ ሁጲያ ብናናይ ቦ ዶርሳ እስክያነ ሄዋፐካ አደ ሻቻ ማላቴ፤ አ አይፊካ ታማ ላጩዋ ማላቴ።10 15አ ገዲካ ጮጭያ ታማን ቴሪደ ጶልያ ናሃስያ ግያ ብራታ ማላቴ፤ አ ኮሻይካ ዎልቃማ ሻፋ ጉን ማላ።11 16እ ባረ ኡሸቻ ኩሽያን ላፑ ጾልንታቱዋ ኦይቄዳ። አ ዶናፐ ላኡ ባጋና ቃረቴዳ ማሻይ ከሴዳ። አ ዴሙካ ሎይ ፖእያ አዋይፍያ ማላቴ።

17ታን አ በኤዳ ዎደ ሀይቄዳዋዳን ሀናደ፥ አ ገድያ ማታን ኩንዳድ። ባረ ኡሸቻ ኩሽያ ታ ቦላ ዎደ፥ ታና ሀዋዳን ያጌዳ፤ “ያዮፓ፤ ኮይሩካ ዉርሰይካ ታና።12 18ታን ደኡዋን ደእያዋ። ታን ሀይቃድ፤ ሽን በአ፥ መ መናዉካ ደኡዋን ደአይ። ሀይቁዋ ቁልፒነ ስኦልያ ቁልፒ ታ ኩሽያን ደኤ። 19ስም ኔን በኤዳባነ ሀእ ደእያዋ፥ ቃይ ስንፐ ሀናናባ ጻፋ። 20ኔን ታ ኡሸቻ ኩሽያን በኤዳ ላፑ ጾልንታቱዋ ብለይነ ቃይ ጾምፓቱዋ ዎያ ላፑ ዎርቃ ባላቱዋ ብለይ ሀዋ፤ ላፑ ጾልንታቱ ላፑ ዎሳ ጎለቱዋ ኪታንቻቱዋ፤13 ዎሳ ጎልያ ላፑ ዎርቃ ባላቱ ላፑ ዎሳ ጎልያ።”