Dawro Full Bible Ethiopic
ማዝሙርያ 81
ባላ ማዝሙርያ
ዛማረቱዋ ካፖ ሱሱላቱዋን የጸቴዳ፥ አሳፍ ጻፌዳዋ
ኑዉ ዎልቃ ግድያ ጾሳዉ፥
ህንተ ቃላ ቁ ኦደ የጽተ፤
ያቆባ ጾሳ ሳቢተ።
የ ዶምተ፤ ካራቡዋ ባቂተ፤
ዲንነ ማስንቁዋን ሎአ የ ስስተ።
አግናይ ጼርያ ዎደነ፥
አግናይ ዶይስያ ዎደ
ባላ ጋላሳን ማላካታ ፑንተ።1
ሀዌ እስራኤልያዉ ህግያ፤
ያቆባ ጾሳፐ እመቴዳ ዎጋ።
ግብጼ ቢታ እ ሾጬዳ ዎደ፥
ዮሴፎ አሳዉ ሀ ዎጋ አዋዬዳ።
ታን ኤረና ኮሻ ሀዋዳን ያግያዋ ስሳድ።
“ህንተ ሀሽያፐ ቶኩዋ ዎድ፤
ህንተ ኩሽያ ጹብያፐ ሸምፕሳድ።
ህንተ መቱዋ ዎደ ታና ጼሴድታ፤
ህንተና አሻድ፤2
ታን ጉምያ ሻርያ ግዶን ጌሜዳሳፐ ህንተና አላድ።
ማሪባ ግያ ፑልቱዋ ማታን ታን ህንተና ፓጫድ።
ታ አሳዉ፥ ታን ህንተና ሴርያዋ ስስተ፤
ሀእ እስራኤላቶ፥ ሀይዜርክተ!
ህንተ ግዶን አላጋ ጾስ ደኦፖ፤3
ሀራ ጾሳዉ ጎይኖፕተ።
ታን፥ መና ጎዳ ህንተ ጾሳ፥
ህንተና ግብጼ ቢታፐ ከሳደ አሄዳዋ።
ነ ዶና ሎይ ሀንጋ፤
ታን ኔና ዳርሳደ ባርሳና።
“ሽን ታ አሳቱ ታ ቃላ ስስበይክኖ፤
እስራኤላቱ ታዉ አዛዘትበይክኖ።
ሄዋ ድራዉ፥ ታን ኡንቱንቱ ባረንቱ ቆፋ ካላና ማላ፥
ኤኖ ጌና ዎዛናዉ አደ እማድ።
ታ አሳይ ታና ስሴደንቶ፥
እስራኤላቱ ታ ኦግያ ካሌደንቶ አዬ ደኢ!
ታን ኡንቱንቱ ሞርክያ ኤለ ጾናና ሽን፤
ኡንቱንቱ ባልጋራቱዋ ቦላ ታ ኩሽያ ዎና ሽን።
መና ጎዳ እጽያዋንቱ አ ስንን ሆካና፥
ኡንቱንቱ ሙሩካ መናሳ ግዳናዋ።
ታን ህንተና ሎኦ ዛርጋ ምዛና፤
ቃይ ኤሳ፥ ሹቻ ጎንጎሉዋፐ ካልሳና” ያጌ።
Source notes (3)
- Cross-reference ፓይ. 10:10
- Cross-reference ከሳ 17:7፤ ፓይ. 20:13
- Cross-reference ከሳ 20:2-3፤ ዛረ. 5:6-7
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.