Dawro Full Bible Ethiopic
ማዝሙርያ 77
ምንዋ ዎሳ
አሳፍ ዛማረቱዋ ካፖ ጁዱቶ የጼዳ፥ ማዛሙርያ
ታን ጾሳዉ ማጋናይ፤
ታና ስሶ ጋደ ታን ጾሳ ዎሳይ።
ታን ታ መቱዋ ጋላስ ጎዳ ኮያይ።
ቃማን ታን ሸምፐናን ታ ኩሸቱዋ አኮ ምጫይ፤
ግዶፐነ፥ ታን ምነታናዉ ዳንዳይከ።
ታን ጾሳባ ቆፕያ ዎደ፥ ኦላይ፤
ታን አባ ዩሻ ቆፕያ ዎደ፥
ታ ሸምፑ ዳቡሬ።
ኔን ቃማ ኡባ ታና ገምእሹዋ ድጋደ አህሳሳ።
ታን ሎይ ህርግያ ድራዉ፥
ሃሳያናዉ ዳንዳይከ።
ታን አዳ ጋላሳቱዋ ቆፓይ፤
ካሰ ላይቱዋካ ሀሳያይ።
ታን ቆፋ ሼካደ አቃይ፤
ታ ዎዛናይ ዩሽ ቆፕያ ዎደ፥
ታን ታ ሁጲያ ሀዋዳን ያጋደ ኦቻይ፤
“ጎዳይ ኑና መናዉ አግ ባሻኔ?
ዛረደ እ ኑና ኬካ በሰኔ?
አ ሲቁ አቴዴ?
እ ጌዳዌ ሀዋፐ ስንናዉ ሳኣን ኦኔ?
ጾሳይ ማርያዋ ዶጌዴ?
ባረ ቃረታካ ሀንቁዋን ላሜዴ?” ያጋደ ኦቻይ።
ቃይካ ታን፥ “ታና ቆሄዳዌ፥
ኡባፐ ቂያ ጾሳ ኡሸቻ ኩሺ፥
ካሰፐ ማድያ ማዱዋ አጌዳዋ” ያጋይ።
መና ጎዳዉ፥ ነ ኦሶቱዋ ታን ቆፓና።
ኤ፤ ኔን በን ዎደ፥
ኦዳ ማላልስያባቱዋ ኡባ ታን ሀሳያና።
ነ ኦዳዋ ኡባ፥
ታን ዛራ ዛራደ ቆፓና፤
ነ ዎልቃማ ኦሶቱዋ ኡባ ታን ዩሻ ቆፓና።
አቤት ጾሳዉ፥ ነ ኦጊ ጌሻ፤
አይ ጾስነ ኑ ጾሳ ማላ ዎልቃማ ግደና።
ኔን ማላልስያባ ኦያ ጾሳ።
አሳ ግዶን ነ ዎልቃ ቆንጭስያዋ።
ነ አሳ፥ ያቆባነ ዮሴፎ ዘረቱዋ፥
ነ ቀስያን ዎዛዳ።
አቤት ጾሳዉ፥ ሃቱ ኔና በኤድኖ፤
ሃቱ ኔና በኢደ ያዬድኖ።
አባ ጪማቱካ ኮኮሬድኖ።
ሻረቱ እራ ዱገ ዛሪደ ትጌድኖ፤
ጉጉንይ ሳሉዋን ጉሜዳ።
ነ ዋልቃንይ ያን ሃን ዋልቃሜዳ።
ነ ጉጉንይ ጉንይ ጎትያ ግዶን ኮሹሜዳ፤
ነ ዋልቃን ጶለይ ሳኣ ፖእሴዳ።
ቢታይካ ጋጅ ጋጂደ ኮኮሬዳ።
ኔን አባ ግዱዋና ሀመታሳ፤
ጪሞ አባ ግዱዋና አሳ፤
ግዶፐነ፥ ነ ገዲ የዳ ሳአይ ቤተና።
ሙሴነ አሮና ኩሽያን
ኔን ነ አሳ ዶርሳ ዉድያዳን ካለዳ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.