Skip to content
BibleKenya

Dawro Full Bible Ethiopic

ማዝሙርያ 72

ካትያዉ ሺቆ ዎሳ

ሶሎሞና የ

አቤት ጾሳዉ፥ ካቲ ነ ሱረተን ፕርዳናዳን፥

ኔን አ ታማርሳ፤

ኑ ካትያዉ ነ ጽሎተ እማ።

ያቶፐ፥ እ ነ አሳዉ ጽሎተን ፕርዶ፤

ናቀቴዳዋንቶካ ሱረተን ዳናቶ።

ደረቱ ሳሮተ አይፍያ፥

ዞዘቱካ ጽሎተ አይፍያ ነ አሳዉ አይፍኖ።

ሄ ካቲ አሳ ግዶን ናቀቴዳዋንቱ ድራዉ ሞተቶ፤

ህዬሳቱዋ እ አሾ፤

ኡቁንያዋንታ እ መንሬ።

አዋይነ አግናይ ደእያ ዎደ ኡባን፥

የለታፐ የለታ ጋካናዉ፥ አሳይ አዉ ያዪኖ።

ካቲ ሾይቃን ቡክያ እራነ

ጋድያ ካልስያ እራ ማላ ግዶ።

እ ደእያ ላይ ኡባን ጽሉ ዳሻና፤

አግናይ ያና ጋካናዉ ሳሮተይ ዳራና።

አባፐ አባ ጋካናዉ፥

ቃይ ኤፍራጺሳ ሻፋፐ ሳኣ ጋጻ ጋካናዉ እ ሞዶ።1

ባዙዋ አሳቱ አዉ ሆክኖ፤

አ ሞርከቱ ባና ላጭኖ።

ታርሴሳነ ሃን ዶደቴዳ ቢታ ካተቱ፥

አዉ ጊራ ጊርኖ።

ሼባነ ሳባ ካተቱ፥

አዉ እሞታ አይኖ።

ካተቱ ኡባይ አዉ ጉልባትኖ፤

ካዉተቱ ኡባይ አዉ ኪተትኖ።

አ ጼስያ ህዬሳቱዋ፥ ናቀቴዳዋንታነ

ማድያዌ ባይናዋንታ እ አሼ።

ህዬሳቶነ ማንቆቶ እ ቃረቴ፤

ህዬሳቱዋ ሸምፑዋ አሼ።

ኡንቱንታ ናቁዋፐነ ማካላፐ እ ዎዜ።

ኡንቱንቱ ሱይ አ ስንን አልአ።

ካቲ ሸምፑዋ ጋምኦ፤

ሼባ ቢታ ዎርቃይ አዉ እመቶ።

ፓጨናን አዉ ዎሳይ ዎሰቶ፤

ጋላሳ ኡባን እ አንጀቶ።

ቢታን ዳሮ ካይ ሞኮ፤

ደረቱ ካን ካመትኖ።

ቢታይ ሊባኖሰ ደሪ ሞክያዋዳን ካ ሞኮ፤

ማታይ ደምባ ኩምያዋዳን አሳይ ካታማ ኩሞ።

ካትያ ሱንይ መናዉ ደኦ፤

አዋይ ደኤዳ ኬሻ ኡባን ጼገቲደ፥ ጋምኦ።

አሳይ ኡባይ አ ባጋና አንጀታና፤

ካዉተቱ ኡባይ አ፥ “አንጀታ” ያጊደ አንጃና።

ማላልስያባ ባረካ ኦያ መና ጎዳ ጾሳዉ፥

እስራኤልያ ጾሳዉ ጋላታይ ግዶ።

አ ቦንቾ ሱንይ መናዉ ጋላተቶ፤

አ ቦንቹ ሳኣ ኡባ ኩሞ።

አመንእ። አመንእ።

እሰይ ናኣ ዳዊታ ዎሳይ ሀዋን ፖለቴዳ።

Source notes (1)
  1. Cross-reference ዛካ. 9:10

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.