Dawro Full Bible Ethiopic
ማዝሙርያ 6
ኡንኦ ዎድያን ሺቄዳ ዎሳ
ዛማረቱዋ ካፖ ዲቱዋን የጸቴዳ፥ ዳዊታ ማዝሙርያ
አቤት መና ጎዳዉ፥ ነ ሀንቁዋን ታና ሴሮፓርኪ፤1
ዎይ ነ ይሉዋን ታና ሙሮፓርኪ።
አቤት መና ጎዳዉ፥ ታን ላባኔዳ ድራዉ፥
ታና ማራርኪ።
አቤት መና ጎዳዉ፥ ታ ዎዛናይ ማዱጾ ድራዉ፥ ታና ፓ።
ታ ሸምፓታ ዳሮፐ ኡንኤታዱ፤
ሽን ጾሳዉ፥ ታና ማዳናዉ ኔን አዉደ ጋካናዉ ጋምአይ?
አቤት ጾሳዉ፥ ኔን ስማደ፥ ታና አሻ፤
ነ ማሮታ ዳሩዋን ታና ከሳ አካ።
ሀይቄዳ ኡራይ ኦንነ ኔና ሀሳየና፤
ዱፉዋን ኔና ጋላትያዌ ባዋ።
ታን ኦልያን ዳቡራድ፤
ቃማ ኡባን ታን ዬካደ፥ ታ ሂጻ እርጽሳድ፤
ታ ቦርኮካ ታ አፎን ሙሱሳድ።
ታ ሞርከቱዋ ኡባ ጋሱዋን ታን አፎጼዳ ድራዉ፥
ታ አይፊ ጋልጄዳ፤
ታ አይፊ ደመናን እጼዳ።
መና ጎዳይ ታን ዬክያ ዬኩዋ ስሴዳ ድራዉ፥
ህንተኖ፥ ኢታ ኦያ ኡባቶ፥
ገደ ታፐ ሻከትተ።2
መና ጎዳይ ታ ዋትዋቱዋ ስሴዳ፤
መና ጎዳይ ታ ዎሳነ ስሴ።
ታ ሞርከ ኡባቱ ዬላትኖነ ቱጋትኖ።
ኡንቱንቱ ቆፐናን ዬላቲደ፥ ጉየ ስምኖ።
Source notes (2)
- Cross-reference ማዝ. 38:1
- Cross-reference ማቶሳ 7:23፤ ሉቃሳ 13:27
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.