Dawro Full Bible Ethiopic
ማዝሙርያ 51
ማሮተ ደማናዉ ሺቄዳ ዎሳ
ዛማረቱዋ ካፖ የጸቴዳ፥ በርሳብና ሻርሙጼዳ ሀኖታ ትምቢትያ ኦድያ ናታን አዉ ኦዲደ ስምና፥ ዳዊታ ማዛሙርያ
አቤት ጾሳዉ፥ አገና ነ ሲቁዋዳን ታና ማራ፤
ነ ቃረታ ዳሩዋዳን ታ ባይዙዋ ቁጫ።
ታ ኢታተፐ ታና ሙለ ሜጫ፤
ታ ናጋራፐ ታና ጌሻ።
አያዉ ጎፐ፥ ታ ባይዙዋ ታን ኤራይ፤
ታ ናጋራይ ኡባ ገደ ታ ስንና።
ታን ኔና፥ ነ ጻላላ ናቃድ፤1
ነ አይፍያ ስንን ኢታባ ኦድ።
ሄዋ ድራዉ፥ ሃሳያደካ ኔን ልከ፤
ፕርዳደካ ኔን ጽሉዋ።
ታን የለቶደፐካ ቱሙ ናጋራንቻ፤
ታ አት ኡሉዋን ብሮ አትያ ዎደፐ ዶማደካ፥
ታን ናጋራንቻ።
ሄኮ ኔን ዎዛና ግዶ ቱማተ ኮያሳ፤
ሄዋ ድራዉ፥ ነ አዳ ኤራተ ታ ጋርሳን ታማርሳ።
ሂሶጵያ ግያ ቦንጭያን ኔን ታና ጌሻ፤
ታን ጌያና።
ታና ሜጫ፤
ታን ሻቻፐ አአደ ቦጻና።
ኔን ታና ናሸቻነ
ሀሹ ግያዋ ስሳ፤
ኔን ታና መንሬዳባ ግዶፐካ፥
ዛራደ ናሸቻ።
ታ ናጋራፐ ነ ስን ዎራ ዛራ፤
ታ ኢታተ ኡባ ቁጫ።
አቤት ጾሳዉ፥ ጌሻ ዎዛና ታ ግዶን መ፤
ምንስያ አያና ታ ግዶን ኦራ።
ታና ነ ስንፐ ኦሎፓ፤
ነ ጌሻ አያና ታፐ አኮፓ።
ነ አቶተ ናሸቻ ታዉ ዛራደ እማ፤
ታን ነዉ ኤኖ ጋደ አዛዘታናዳን፥
ታና ዘምፕሳ።
ሄ ዎደ ታን ባይዛንቻቱዋ ነ ኦግያ ታማርሳና፤
ሄ ናጋራንቻቱነ ኔኮ ስማና።
አቤት ጾሳዉ፥ ታና አሽያ ጾሳዉ፥
ሱ ጉሴዳ ናጋራፐ ታና አሻ፤
ሄ ዎደ ታ እንጻርሳይ ነ ጽሎተባ የጻና።
አቤት ጎዳዉ፥ ታ ዶና ዶያ፤
ያቶፐ፥ ታ እንጻርሳይ ነ ጋላታ አዋያና።
ኔን ያርሹዋን ናሸታንቶ ታ ነዉ ሺሻናሽን፥
ኔን ያርሹዋን ናሸታካ።
ጾሳዉ ያርሽያ ያርሹ
አሽከ አያና፤ አቤት ጾሳዉ፥
“ናጋራ ኦናን አጋርክታሻ” ግያ፥
መኤዳ ዎዛና ኔን ካካ።
አቤት ጾሳዉ፥ ነ ዶሱዋን ጽዮንዉ ኬካ፤
የሩሳላመ ግምበቱዋ ግምባ።
ሄ ዎደ ጽሎ ያርሹዋን፥
ጹግያ ያርሹዋንነ፥
መህያ አሹዋ ዉርስ ጹግያ ያርሹዋን ኔን ናሸታና።
ቃይ ኮሩማቱ ነ ያርሽያሳን ያርሸታና።2
Source notes (2)
- Cross-reference ሮመ 3:4
- Cross-reference 1 ሳሜላ 22:9-10
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.