ማዝሙርያ 4

ማዶ ኦማርስ ሺቅያ ዎሳ

ዛማረቱዋ ካፖ ዲቱዋን የጸቴዳ፥ ዳዊታ ማዝሙርያ

1አቤት ታና ጽልስያ ጾሳዉ፥

ታን ኔና ጼስያ ዎደ፥ ታዉ ኮያ።

ታን ኡንኤቴዳ ዎደ፥ ታና ሸምፕሳዳ።

ታዉ ኔን ቃረታደ ታ ዎሳ ስሳ።

2ህንተኖ አሳቶ፥ አዉደ ጋካናዉ ታ ቦንቹዋ ካዉሺቴ?

ሾር ባይናባካ አዉደ ጋካናዉ ህንተ ሲቂቴ?

ዎርዱዋ አዉደ ጋካናዉ ጫድ ኦይቂ ካሊቴ?

3ሽን መና ጎዳይ ጾሳ አሳቱዋ

ባረዉ ዱማይ ዎዳዋ ህንተ ኤርተ።

ታን መና ጎዳ ጼስያ ዎደ፥

እ ታዉ ስሴ።

4ሀንቀትተ፥ ሽን ህንተ ሀንቁዋን ናጋራ ኦፕተ።1

ሂጻን ግስያ ዎደ፥

ህንተ ዎዛና ብድተነ ስርጵ ጊተ።

5ልከ ያርሹዋ ያርሽተነ

መና ጎዳን አማነትተ።

6ዳሮቱ፥ “ኑና ሎኦባ በሳናዌ ኦኔ?” ያጊኖ።

አቤት መና ጎዳዉ፥ ኔን ኑና ኬካ አይፍያን ጼላ።

7ኔን ታ ዎዛናን ዎልቃማ ናሸቻ ኩንዳ።

ሄዌነ፥ ካ አይፊነ ኦራ ዎይንያ ኤሳይ፥

ባረንቶ ዳርና ናሸትያ ናሸቻፐካ ዳርያዋ።

8አቤት መና ጎዳዉ፥

ነ ጻላላይ ታና ሳሩዋን ናጋ ዎያ ድራዉ፥

ታን ግሳደ ሳሮተን ገምእሻይ።