Dawro Full Bible Ethiopic
ማዝሙርያ 36
ናጋራንቻ ኢታተነ ጾሳ ሎኦተ
ዛማረቱዋ ካፖ የጸቴዳ፥ መና ጎዳ ቆማ ዳዊታ ማዝሙርያ
ኢታ አሳይ ባረ ዎዛናን ደእያ ኢታተ ኮሻ ሀይዜ።1
ጾሳዉ ያይያዌ አ ቆፋን ባዋ።
አያዉ ጎፐ፥ እ ባረና ሎይ ናሼ፤
ሄዎ እ ባረ ናጋራ ደማናዉነ እጻናዉ ዳንዳየና።
አ ዶናፐ ከስያ ሃሳያይ ገንያነ ዎርዱዋ።
አዳ ኤራባነ ሎኦባ ኦያዋ እ አጌዳ።
እ ባረ ሂጻን ደኢደካ ገንያባ ኦናዉ ሀልቼ።
እ ሎኦ ግደና ኦግያን ኤቄዳ፤
እ ኢታባ እጸና።
አቤት መና ጎዳዉ፥ አገና ነ ሲቁ ሳሎቱዋ ጋኬ፤
ነ ቱማተይካ ቦላ ሻርያዳን ቄ።
ነ ጽሎተይ ኡባፐ ቃ ደረቱዋ ማላ፤
ነ ፕርዳይካ ኡባፐ ዝቃ ጪማ ማላ።
አቤት መና ጎዳዉ፥ ኔን አሳካ ዶኣካ ናጋሳ።
አቤት ጾሳዉ፥ አገና ነ ሲቁ አይባ አልኦቤ!
አሳይ ነ ቀፍያ ግዶ ባቃት አቴ።
ኡንቱንቱ ነ ሶ ግዶን ፓላሆ ማዳፐ ሚደ ካሊኖ፤
ነ ኬካተ ሻፋፐ ኔን ኡንቱንታ ኡሻሳ።
አያዉ ጎፐ፥ ደኡዋ ፑልቱ ነ ማታን ደኤ፤
ነ ፖኡዋን ኑን ፖኡዋ በኤቶ።
ኔና ኤርያዋንታ ኔን ሲቅያ ሲቁዋነ
ሱረቶ ኬክያ ኬካ አጎፓ።
ኦቶራንቻ ገዲ ታና የፖ፤
ናጋራንቻቱዋ ኩሺ ታና የደርሶፖ።
ኢታ አሳቱ ኩንዴዳዋንታ በእተ፤
ኡንቱንቱ ኩንዴድኖ፤ ደንዳናዉካ ዳንዳይክኖ።
Source notes (1)
- Cross-reference ሮመ 3:18
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.