Dawro Full Bible Ethiopic
ማዝሙርያ 16
ጾሳይ ታ ላታ
ዳዊታ ዎሳ
አቤት ጾሳዉ፥
ታን ኔኮ ባቃቴዳ ድራዉ፥ ታና ናጋ።
ታን መና ጎዳዉ፥ “ኔን ታ ጎዳ፤
ኔፐ አትን፥ ሀራ ሎኡ ታዉ ባዋ” ያጋይ።
ሳኣን ደእያ ጌሻቱ
አይ ማላ ጋላተቴድኖ!
ታ ናሸቻይ ኡባይ ኡንቱንቱና እትፐ ግድያዋ።
ዎርዶ ጾሳቱዋ ካልያዋንቱ
ባረንቱ ቦላ መቱዋ ዳርሲኖ።
ሽን ታን ኡንቱንቱ ዎርዶ ጾሳቶ ያርሽከ፤
ታን ኡንቱንቱ ሱን ጼስከ።
ታ መና ጎዳዉ፥ ታ ደኡዋ ላታይነ ጹአይ ኔና፤
ታና ኮሽያ ኡባ ኔን ታዉ እማሳ።
ታ ደኡዋ ሳማይ ኔና።
ኔን ታዉ ዋዳ ሳማይ አይ ኬሻ ሎኤ!
ኤ ታ ላታይ ቱሙዋፐ ሎአ!
ታና ዞርያ መና ጎዳ ጋላታይ፤
ብላሄካ ታ ዎዛናይ ታና ሴሬ።
ታን ኡባ ገደ መና ጎዳ ታፐ ስንያይ1
እ ታፐ ኡሸቻ ባጋና ደእያ ድራዉ፥
ታን ህርግከ።
ሄዋ ድራዉ፥ ታ ዎዛናይ ናሸቴ፤
ታ ሸምፑካ ሀሹ ጌ።
ታ ቦላይካ ህርግ ባይናን ደኤ።
ታና ስኦልያዉ አደ እማካ፤2
ኔን ነ ጌሻ ሙስሳካ።
ኔን ታና ደኡዋ ኦግያ በሳሳ።
ታን ነ ማታን ደእና፥ ታ ናሸቻይ ፖለቴ፤
ነ ኡሸቻ ባጋና እንጂ መናዉ ደኤ።
Source notes (2)
- Cross-reference ኪታ 2:25-28
- Cross-reference ኪታ 13:35
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.