Dawro Full Bible Ethiopic
ማዝሙርያ 135
ጋላታ ማዝሙርያ
መና ጎዳ ጋላትተ!
ህንተኖ መና ጎዳ ቆማቶ፥
መና ጎዳ ሱን ጋላትተ!
ህንተኖ መና ጎዳ ጎልያ ግዶን፥
ኑ ጾሳ ጎልያ ዳባባን ኤቄዳዋንቶ፥
ጾሳ ጋላትተ!
መና ጎዳይ ኬካ ግድያ ድራዉ፥
መና ጎዳ ጋላትተ!
እ ሎአ ግድያ ድራዉ፥
አ ሱን ሳቢተ!
መና ጎዳይ ያቆባ ባረ ሁጰው፥
እስራኤልያ አሳካ ባረዉ ቡዞ ኦደ ዶሬዳ።
መና ጎዳይ ዎልቃማ ግድያዋነ
ኑ ጎዳይ ጾሳቱዋ ኡባፐ ቂያዋ፥
ታን ኤራይ።
ሳሉዋንካ ሳንካ፥
አባቱዋንነ ኡንቱንቱ ጪሞቱዋ ኡባ ግዶንካ፥
መና ጎዳይ ባረ ዶሴዳዋ ኡባ ኦ።
እራ ቶኮ ሻርያ ሳኣ ጋጻፐ እ ደን፤
እ እራና ዋልቃን ኪቴ፤
ባረ ምንጅያ ሳኣፐ ጫርኩዋ ከሴ።
ግብጼ ቢታን አሳ ናናቱዋፐነ፥
መህያ ማራፐ፥
ባይራ የለቴዳዋንታ ዎዳ።
ኔኖ ግብጼ፥ ፓርኦናነ አ ቆማቱዋ ሙራናዉ፥
ህንተንቱ ግዶን ኦራባነ ማላልስያባ የዴዳ።
እ ዳሮ ካዉተቱዋ ባይዜዳ፤
ዎልቃማ ካተቱዋካ ዎዳ።
አሞረቱዋ ካትያ ስሆና፥
ባሳነ ካትያ ኦጋነ፥
ካናነ ካተቱዋ ኡባ ዎዳ።
ኡንቱንቱ ቢታ ባረ አሳቱዋ፥
እስራኤላቱዋ ላትሴዳ።
አቤት መና ጎዳዉ፥ ነ ሱንይ መናዉ ደአና፤
የለታፐ የለታ ጋካናዉ መና ጎዳይ ሀሳየታና።
መና ጎዳይ ባረ አሳዉ ፕርዳና፤
እ ባረ ቆማቶ ቃረታና።
ጋድያ አሳቱዋ ኤቃቱ አሳ ኩሺ
ብራፐነ ዎርቃፐ መዳዋንታ።1
ኡንቱንቶ ዶናይ ደኤ፥ ሽን ሃሳይክኖ፤
አይፊ ደኤ፥ ሽን ጼልክኖ።
ሀይይ ደኤ፥ ሽን ስስክኖ፤
ኡንቱንቱ ዶናን ሸምፑ ባዋ።
ኡንቱንታ መዳዋንቱነ፥
ኡንቱንቱን አማነትያዋንቱ፥
ኡባይ ኡንቱንቱዳን ሀንኖ።
እስራኤልያ ጎልያ አሳቶ፥
መና ጎዳ ጋላትተ፤
አሮና ጎልያ አሳቶ፥
መና ጎዳ ጋላትተ፤
ሌዊያ ጎልያ አሳቶ፥
መና ጎዳ ጋላትተ፤
መና ጎዳዉ ያይያዋንቶ፥
ኡባይ መና ጎዳ ጋላትተ።
የሩሳላመን ደእያ መና ጎዳይ
ጽዮነን ጋላተቶ!
መና ጎዳ ጋላትተ!
Source notes (1)
- Cross-reference ማዝ. 115:4-8፤ ሳፃ 9:20
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.