Dawro Full Bible Ethiopic
ማዝሙርያ 132
ጌሻ ጎልያ ሳባናዉ ሺቆ ማዝሙርያ
ፑደ ከሲደ የጼዳ የ
አቤት መና ጎዳዉ፥
ዳዊታነ እ ዳንዳዬዳ መቱዋ ቆፓ።
መና ጎዳዉ እ ጫቄዳዋ፥
ያቆባ ጾሳዉ፥ ዎልቃማዉ
እ ሀዋዳን ያጊደ ገፔዳዋ ሀሳያ፤
“ሀዋፐ ጉይያን ታን ታ ጎለ ገልከ፥
ዎይ ታ ሂጻን ግስከ።
ታን ታ አይፍያ ጪልምከ፥
ዎይ ገምእሽከ።
ሄዌነ፥ ታን መና ጎዳዉ ሳኣ፥
ያቆባ ጾሳዉ፥ ዎልቃማዉ
ደኢያሳ ጊግሳና ጋካናሳ” ያጌዳ።
ሄኮ፥ ኑን ታቦታባ፥
ቤተሌመን ስሴዶ፤1
ይኣሪማ ግያ ቢታን አ ኑን ደሜዶ።
ኑን፥ “አነ እ ደኢያሳ ቦይተ፤
አ ገዲ የያሳን ጉፋኒደ፥
አዉ ጎይኔቶ” ያጌዶ።
አቤት መና ጎዳዉ፥ ደንዳ!
ነ ምኖተዉ ማላ ግድያ ነ ታቦታና፥
ነ ጌሻ ጎልያ ገላደ ደአ።
ነ ቄሳቱ ጽሎተ ማይኖ፤
ነ አሳቱ ናሸቻዉ የጽኖ።
ነ ቆማ ዳዊታ ድራዉ፥
ኔን ኦኬዳ ካትያ አጎፓ።
መና ጎዳይ ዳዊታዉ ላመተና ጫቁዋ
ሀዋዳን ያጊደ ጫቄዳ፤2
“ነ ጉልባታፐ የለቴዳ ነ ናናቱዋፐ እቱዋ
ታን ካዉና።
ነ ናናቱ ታ ጫቁዋነ
ታን ታማርስያ ትምርትያ ናጎፐ፥
ኡንቱንቱ ናናቱካ ነ ካዉተ አራታን መናዉ ኡታና” ያጌዳ።
መና ጎዳይ ጽዮነ ዶሬዳ፤
ባረዉ ደኢያሳ ኦናዉካ አሞቲደ፥
ሀዋዳን ያጌዳ፤
“ሀዌ ታዉ መናዉ ደእያ ሳኣ፤
ታን አሞቴዳ ድራዉ፥ ሀዋን ኡታና።
ታን ዳሮ ካ እማደ ጽዮኖ አንጃና፤
እዝን ደእያ ህዬሳቱዋካ ቁማ ካልሳና።
እዝን ደእያ ቄሳቱ ዋካ
ታን አቶተ ማይዛና፤
እዝን ጾሳ አሳቱካ ናሸቻዉ የጻና።
“ሀ ሳኣን፥
ዳዊታ ዘረፐ እቱዋ ካዉና፤3
ታን ኦኬዳ ካትያ ካዉተ ጋምኤና።
ታን አ ሞርከቱዋ ዬላ ማይዛና፤
ሽን አ ሁጲያን ደእያ ካዉተ ካላቻይ ጶላና” ያጌዳ።
Source notes (3)
- Cross-reference 2 ኦዱዋ 6:41-42
- Cross-reference 2 ሳሜላ 7:12-16፤ 1 ኦዱዋ 17:11-14፤ ማዝ. 89:3-4፤ ኪታ 2:30
- Cross-reference 1 ካታ. 11:36
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.