Skip to content
BibleKenya

Dawro Full Bible Ethiopic

ማዝሙርያ 119

ጾሳ ህግያዉ እመቴዳ ሳባ

አለፍ

ባረንቱ ኦግያን ቶሺ ባይናዋንቱነ፥

መና ጎዳ ህግያዳን ሀመትያዋንቱ፥

አንጀቴዳዋንታ።

እ ኦዴዳዋ ኦያዋንቱነ

ባረንቱ ኩመን ዎዛናፐ አ ሲቅያዋንቱ፥

አንጀቴዳዋንታ።

ኡንቱንቱ ባላባ ኦክኖ፤

ጾሳ ኦግያን ሀመቲኖ።

ነ ዎጋዉ አማነቲደ ናጋና ማላ፥

ኔን ኑና አዛዛዳ።

ነ አዋዮ አዛዘትያዋን

ታ ኦጊ ምናናዳን አሞታይ።

ያቶፐ፥ ነ አዛዙዋ ኡባ ሀይዛደ፥

ታን ኡባካ ዬላትከ።

ነ ጽሎ ፕርዳ ታማራደ፥

ታን ኔና ሱረ ዎዛናፐ ጋላታና።

ታን ነ አዋዩዋዳን ኦና፤

ታና ኡባካ የጎፓ።

ቤት

ያላጋይ ባረ ኦግያ ጌሻ ኦደ

ዎት ናጋናዉ ዳንዳዪ?

ነ ቃላይ ግያዋዳን ደኦፐ ዳንዳዬ።

ታን ታ ፖሎ ዎዛናፐ ኔና ኮያይ፤

ነ አዛዞቱዋፐ ዎራ ሀመተናዳን ታና ናጋ።

ታን ኔና ናቀናዳን

ነ ቃላ ታ ዎዛናን ዎድ።

አቤት መና ጎዳዉ፥ ኔን ጋላተታ!

ነ አዋዩዋ ታና ታማርሳ።

ነ ዶናፐ ከሴዳ ፕርዳ ኡባ፥

ታን ታ እንጻርሳን ኦዳይ።

ዱረተን ናሸትያዋዳን፥

ታን ኔን ኦዴዳ ቃላን ናሸታይ።

ነ ዎጋቱዋ ዛራ ዛራደ ቆፓይነ

ነ ኦግያ ሎይ አኬካይ።

ታን ነ አዋዩዋን ናሸታይ፤

ነ ቃላካ ታን ዶግከ።

ጋሜል

ታን ፓጻ ደአና ማላነ

ነ ቃላዉ አዛዘታና ማላ፥

ታዉ ነ ቆማው ኬካባ ኦ።

ነ ህግያ ግዶን ደእያ ማላልስያ ቱማተ፥

ታን በአና ማላ፥ ታ አይፍያ ዶያ።

ታን ሀ ሳኣን እማ፤

ነ አዛዞቱዋ ታፐ ገንፓ።

ታን ኡባ ዎደ፥

ነ ፕርዳ ሎይ ላሞታይ።

ኦቶረትያዋንቱ፥ ሸቀቴዳዋንታ፥

ነ አዛዙዋፐ ዎራ ሀመትያዋንታ፥

ኔን ሴራሳ።

ታን ኔን ኦዴዳዋ ኦዳ ድራዉ፥

ኡንቱንቱ ቦርያነ ኡንቱንቱ ካያ ታ ቦላፐ ድጋ።

ሀራይ አቶ ካፓቱ ሺቂደ፥

ታ ቦላ ማቀቶፐካ፥

ታን፥ ነ ቆማይ፥ ነ አዋዩዋ ዛራ ዛራደ ቆፓና።

ኔን ኦዴዳ ቃላቱ ታና ናሸቺኖ፤

ኡንቱንቱ ታና ዞሪኖ።

ዳሌጽ

ታን ሀይቃና ሀናይ፤

ኔን ጌዳ ቃላዳን ታ ሸምፑዋ አሻ።

ታን ታ ኦግያዋ ነዉ ኦድና፥

ኔን ታና ስሳዳ፤

ስም፥ ነ አዋዩዋ ታና ታማርሳ።

ነ ዎጋ ኦግያ ታና አኬክሳ፤

ማላልስያ ነ ኦሱዋ

ታን ዛራ ዛራደካ ቆፓና።

ካዩ ዳሬዳዋን ታ ሸምፑ ዳቡሬዳ፤

ኔን ጌዳ ቃላዳን ታና ምንሳ።

ዎርዶ ኦግያ ታፐ ሃሳ፤

ነ አ ኬካተን ነ ህግያ ታና ታማርሳ።

ቱሙዋ ኦግያ ዶራድ፤

ነ ፕርዳ ሀይዛድ።

አቤት መና ጎዳዉ፥ ታን

ኔን ኦዴዳዋ ምንሳ ኦይቃድ፤

ስም ታና ዬላዮፓ!

ኔን ታ ዎዛና ላአ ከሴዳ ድራዉ፥

ታን ነ አዛዙዋ ኦግያን ዎጻይ።

ሄ

አቤት መና ጎዳዉ፥ ነ አዋዩዋ ብለ

ታና ታማርሳ፤

ታን ዉርሰይ ጋካናዉ አ ናጋና።

ታን ነ ህግያ ናጋና ማላነ

ታ ኩመን ዎዛናፐ ታን አዉ አዛዘታና ማላ፥

ኔን ታዉ አኬካ እማ።

ነ አዛዙዋ ኦግያን ታና ካለ፤

አያዉ ጎፐ፥ ታን አን ናሸታይ።

ታ ዎዛና አሙዋኮ ግደናን፥

ኔን ኦዴዳ ቃላኮ ዛራ።

ፓናባ ጼለና ማላ፥

ታ አይፈቱዋ ተአ፤

ነ ኦግያን ታ ደኡዋ ኦራ።

ኔን ያየታና ማላ፥

ኔን ገሎ ቃላ ታዉ፥

ነ ቆማዉ ፖላ።

ያሽያ ቦርያ ታፐ ድጋ።

ነ ፕርዳይ አይ ማላ ሎኤ!

ታን ነ ዎጋ ናጋናዉ አሞታይ፤

ኔን ጽሉዋ ግድያ ድራዉ፥

ታ ደኡዋ ኦራ።

ዋዉ

አቤት መና ጎዳዉ፥ አገና ነ ሲቁዋ ታና በሳ፤

ኔን ጌዳ ቃላዳን ታና አሻ።

ታን ነ ቃላን አማነትያ ድራዉ፥

ታና ቦርያዋንቶ ዛራናዉ ዳንዳያይ።

ታን ነ ፕርዳን ናሸቻ ኦያ ድራዉ፥

ታ እንጻርሳፐ ቱማተ ቃላ ይሶፓ።

ታን ኡባ ገደ፥ መ መናዉካ

ነ ህግያዉ አዛዘታና።

ታን ነ ዎጋ ፖልያ ድራዉ፥

አኩዋን ሀመታና።

ታን ካተቱዋ ስንን ኤቃደ፥

ኔን ኦዴዳባ ኦዳደ ዬላትከ።

ታን ዶስያ ነ አዛዞቱዋን ናሸታይ

ታን ሲቅያ ነ አዛዞቱዋ ቦንቻይ፤

ነ አዋዩዋካ ዛራ ዛራደ ቆፓና።

ዛዉ

ኔን ታዉ፥ ነ ቆማዉ፥

እሜዳ ቃላ ቆፓ፤

ሄ ቃላን ታን ሂዶታ ኦይ።

ኔን፥ “ታን ኔና ፓጻ ዎና”

ጌዳ ቃላይ ታ ቱጋ ዎደ ታና ምንዳ።

ኦቶራንቻቱ ታና ልክያፐ አደ ሸቂኖ፤

ሽን ታን ነ ህግያፐ ሸርእ ጊከ።

አቤት መና ጎዳዉ፥ በኒደፐ ደእያ ነ ፕርዳ ታን ሀሳያይ፤

ሄዋን ታን ምነታይ።

ኢታቱ ነ ህግያዉ አዛዘተናዋ በእና፥

ይሉ ታና ዎዳ።

ታን ደእያ አላጋ ቢታን፥

ነ አዋዩ ታዉ የ ግዴዳ።

አቤት መና ጎዳዉ፥ ታን ቃማ ነ ሱን ቆፓይ፤

ነ ህግያካ ናጋይ።

ነ ዎጋዉ አዛዘትያዌ ታዉ አንጆ ግዴዳ።

ሄት

አቤት መና ጎዳዉ፥ ታና ጋኬዳ ሳማይ ኔና፤

ታን ነ ቃላዉ አዛዘታና ያጋይ።

ታን ታ ኩመን ዎዛናፐ ኔና ዎሳይ።

ኔን ጌዳ ቃላዳን ታዉ ቃረታ።

ታን ታ ኦግያ አኬካ ጼላደ፥

ኔን ኦዴዳባኮ ስማድ።

ታን ነ አዛዙዋ ናጋናዉ፥

ኤሌላናፐ አትና ታክከ።

ኢታቱ ታና ዎዶሩዋን ቃቾፐካ፥

ታን ነ ህግያ ዶጋበይከ።

ነ ጽሎ ፕርዳ ድራዉ፥ ኔና ጋላታናዉ፥

ታን ቃማ ብላሄ ደንዳይ።

ታን ነዉ ያይያዋንቱ ኡባዉነ

ነ ዎጋ ናግያዋንቶ ዳቦ።

አቤት መና ጎዳዉ፥ ሳአይ

አገና ነ ሲቁዋን ኩሜዳ፤

ነ አዋዩዋ ታና ታማርሳ።

ጼት

አቤት መና ጎዳዉ፥ ነ ጌዳ ቃላዳን፥

ታዉ ነ ቆማዉ ኬካባ ኦዳ።

ታን ነ አዛዞቱዋን አማነትያ ድራዉ፥

ሎኦ ፕርዳነ ኤራተ ታና ታማርሳ።

ታን ሙረታናፐ ካሰ ዎራ ሀመታድ፤

ሽን ሀእ ነ ቃላዉ አዛዘታይ።

ኔን ኬካ፤ ኔን ኬካባ ኦሳ፤

ነ አዋዩዋ ታና ታማርሳ።

ኦቶራንቻቱ ታና ዎርዱዋ ኦኪኖ፤

ሽን ታን ነ ዎጋ ታ ኩመን ዎዛናፐ ናጋና።

ኡንቱንቱ ዎዛናይ ኡባካ ዶንጭሎዋንታ፤

ሽን ታን ነ ህግያን ናሸታይ።

ታን ሙረቴዳዌ ታዉ ሎኤዳ፤

አያዉ ጎፐ፥ ነ አዋዩዋ ታማራናዉ ታና ማዴዳ።

ዳሮ ሻኡ ዎርቃፐነ ብራፐ፥

ነ ዶናፐ ከሴዳ ህጊ ታዉ አ።

ዮድ

ታና ነ ኩሺ መዳነ ጊግሴዳ።

ነ አዛዙዋ ታን ታማራና ማላ፥

ታዉ አኬካ እማ።

ታን ነ ቃላን ህዶታ ዎያ ኦዳ ድራዉ፥

ነዉ ያይያዋንቱ ታና በኢደ ናሸትኖ።

አቤት መና ጎዳዉ፥ ነ ፕርዳይ ጽላ ግድያዋነ

ኔን አማነቴዳዋ ግዶ ድራዉ ታና ሙሬዳዋ ኤራይ።

ኔን ታዉ ነ ቆማዉ ጌዳ ቃላዳን፥

አገና ነ ሲቁ ታና ምንሶ።

ታን ፓጻ ደአና ማላ፥ ታዉ ቃረታ፤

አያዉ ጎፐ፥ ነ ህጊ ታና ናሸቼ።

ኦቶራንቻቱ ዎርዱዋን

ታና ሞትያ ድራዉ፥ ዬላትኖ።

ታና ግዶፐ፥ ታን ነ ዎጋቱዋ

ዛራ ዛራደ ቆፓይ።

ነዉ ያይያዋንቱነ፥

ኔን ኦዴዳባ ኤርያዋንቱ ኡባይ፥

ታኮ ዪኖ።

ታን ዬላተና ማላ፥

ነ አዋዮ አዛዘትያዋን

ቶሺ ባይናዋ ግዳርክታ!

ካፍ

ኔን ታና አሻና ማላ፥

ታን ናጋደ ዳቡራይ፤

ታን ነ ቃላን ህዶታ ኦይ።

ኔን ጌዳ ቃላይ ፖለትና

በአናዉ ጼሊደ፥ ታ አይፊ ጋልጄዳ።

ታን፥ “ኔን ታና አዉደ ምንኒሻ?” ያጋይ።

ጩዋን ካቄዳ ኦጎሩዋ ግዳደ ጉንዳድ፤

ግዶፐነ፥ ነ አዋዩዋ ባልከ።

ታን ነ ቆማይ አዉደ ጋካናዉ ናጎ?

ታና የደርስያዋንታ ኔን አዉደ ፕርዳኒ?

ነ ህግያ ናገና ኦቶራንቻቱ፥

ታና ኩድሳና ጊደ፥ ታዉ ኦላ ቦኪኖ።

ነ አዛዞቱ ኡባይ አማንያዋንታ።

ታና አሳቱ ዎርዱዋን የደርስያ ድራዉ፥

ሀእ ታና ማዳ!

ኡንቱንቱ ታና ዎ ድጌድኖሽን፤

ታን ነ ዎጋ አጋበይከ።

አገና ነ ሲቁዋን ታ ደኡዋ ናጋ፤

ሄዌነ፥ ኔን ነ ዶናፐ ኦዴዳዋ ታን ናጋናሳ።

ላሜድ

አቤት መና ጎዳዉ፥ ነ ቃላይ መናሳ፤

እካ ሳሉዋን ምኒደ ደኤ።

ኔን የለታፐ የለታ ጋካናዉ አማነትያዋ።

ኔን ሀ ሳኣ ባሳደ ኤሳዳ፤

እካ ምኒደ ደኤ።

ኔን ጌዳዋዳን ኡባባይካ

ሀች ጋካናዉ ምኒደ ደኤ፤

አያዉ ጎፐ፥ ኡባቱካ ነ ቆማቱዋ።

ነ ህጊ ታና ናሸችያባ ግደነንቶ፥

ታ ቱጋ ዎደ ታን ያና ሽን።

ነ ዎጋ ኡባካ ዶግከ፤

አያዉ ጎፐ፥ ኔን አን ታና ፓጻ ዎዳ።

ታን ነዋቴ፤ ታና አሻ፤

አያዉ ጎፐ፥ ታን ነ ዎጋ ናጋናዉ ኮያይ።

ኢታቱ ታና ይሳናዉ ኩኩሊደ ናጊኖ፤

ሽን ታን ኔን ኦዴዳዋ ቆፓይ።

ፖሎ ጌተቶባዉ ኡባባዉ ዛዋይ ደእያዋ ታን በኣድ፤

ሽን ነ ህግያዉ ዛዋይ ባዋ።

ሜም

ታን ነ ህግያ ዋታ ዶሳይታ!

ጋላሳ ኩመን ታን ቆፕያዌ አ።

ነ አዛዞቱ ኡባ ዎደካ ታናና ደእያ ድራዉ፥

ኡንቱንቱ ታና ታ ሞርከቱዋፐ አዳ ኤራንቻ ከሲኖ።

ታን ኔን ኦዴዳዋ ቆፕያ ድራዉ፥

ታና ታማርሴዳ ኡባፐካ አዳ አኬካይ ታዉ ደኤ።

ታን ነ ዎጋዉ አዛዘትያ ድራዉ፥

ጭማቱዋፐ አደ አኬካይ።

ታን ነ ቃላዉ አዛዘታናዉ ኮይያ ድራዉ፥

ታ ገድያ ኢታ ኦግያ ኡባፐ ናጋድ።

ኔን ታና ታማርሴዳ ድራዉ፥

ታን ነ ፕርዳፐ ዎራ ባበይከ።

ነ ቃላይ አያ ማልኢ!

ኤሳ እልሉዋፐካ አደ፥

ታ ዶናን ማልኤ።

ነ ዎጋፐ አኬካ ደማድ፤

ሄዋ ድራዉ፥ ታን ጌላ ኦግያ ኡባ እጻይ።

ኖን

ነ ቃላይ ታ ገድያዉ ጾምፕያ፥

ታ ኦግያዉካ ፖኡዋ።

ነ ጽሎ ፕርዳዳን ደአናዉ፥

ታን ጫቄዳ ጫቁዋ ምንና።

ታን ዳሮ ቱጋታድ፤

አቤት መና ጎዳዉ፥ ኔን ጌዳ ቃላዳን

ታና ፓጻ ዎ።

አቤት መና ጎዳዉ፥ ታ ዶናፐ ከስያ ጋላታ፥ ያርሹዋ አካ፤

ታና ፕርዳ ታማርሳ።

ታ ሸምፑ መቱዋ ቦላ ደእንቶካ፥

ታን ነ ህግያ ዶግከ።

ኢታቱ ታዉ ግትያ የጌድኖ፤

ሽን ታን ነ ዎጋፐ ሸርእ ጋበይከ።

ኔን ኦዴዳባይ መናዉ ታዋ፤

ኤ፥ እ ታ ዎዛናዉ ናሸቻ።

ታን መናዉ፥ ዉርሰ ጋካናዉ

ነ አዋዩዋዳን ኦናዉ ቃቻድ።

ሳምከት

ታን ላኡ ቆፋይ ደእያ አሳቱዋ እጻይ፤

ሽን ነ ህግያ ሲቃይ።

ኔን ታዉ ቆሰታ አትያ ሳነ

ታ ጎንዳልያ፤

ታን ነ ቃላን ህዶታ ኦይ።

ታን ታ ጾሳ አዛዙዋ ናጋና ማላ፥

ህንተኖ፥ ኢታባ ኦያዋንቶ፥

ታፐ ሃክተ!

ኔን ጌዳ ቃላዳን ታና ምንሳ፤

ያቶፐ፥ ታን ፓጻ ደአና።

ታን ህዶታን ናግያባን ታና ዬላዮፓ።

ታና ዘምፕሳ፤ ያቶፐ፥

ታን ሳሮ ደአና፤

ታን ኡባ ዎደ ነ አዋዩዋ ሀይዛና።

ነ አዋዩዋፐ ዎራ ብያዋንታ ኡባ ኔን አካካ፤

ኡንቱንቱ ጭሙ ጮ መላ።

ሳኣን ደእያ ኢታቱዋ ኡባ

ኔን ፕቱዋዳን ፓይዳሳ፤

ሄዋ ድራዉ፥ ታን ኔን ኦዴዳባ ሲቃይ።

ታ ቦላይ ነዉ ያዪደ ኮኮሬዳ፤

ታን ነ ፕርዳዉ ያያይ።

ኤ

ልከባነ ጽሎባ ኦድ፤

ታና ኡቁንያዋንቶ ኦሎፓ።

ታና ነ ቆማ ማዳናዉ ዋሰ ግዳ፤

ታና ኦቶራንቻቱዋን ኡቁንሶፓ።

ኔን፥ “ኔና አሻና”

ጌዳ ጽሎ ቃላ ፖሎ ጋደ ናግሽን፥

ታ አይፊ ጋልጄዳ።

ታዉ፥ ነ ቆማዉ፥ ኔን

አገና ነ ሲቁዋዳን ኦ፤

ነ አዋዩዋካ ታና ታማርሳ።

ታን ነ ቆማ፤

ኔን ኦድያባ ታን ኤራና ማላ፥

አኬካ ታዉ እማ።

አቤት መና ጎዳዉ፥ አሳቱ

ነ ህግያ መንዳ ድራዉ፥

ኔን ፕርዳና ዎዲ ሀአ።

ታን ነ አዛዙዋ

ዎርቃፐ አደ ሲቃይ፤

ኤ፥ ጌሻ ዎርቃፐካ አደ ሲቃይ።

ሄዋ ድራዉ፥ ታን

ነ ዎጋቱ ኡባይ ግያዋዳን ሀመታይ፤

ጌላ ኦግያ ኡባ ታን እጻይ።

ፐ

ኔን ኦዴዳባይ ማላልስያባ፤

ሄዋ ድራዉ፥ ታን አዉ አዛዘታይ።

ነ ቃላ ብለይ ፖኡዋ እሜ፤

አኬካይ ፓጬዳዋንቶ አኬካ እሜ።

ታን ነ አዛዞ፥

ዳሮ ሳመታደ ታ ዶና ዶያይ።

ሃ ታኮ ስማ፤

ነ ሱን ሲቅያዋንቱ ኡባዉ

ኔን ኦያዋዳን ታዉካ ቃረታ።

ኔን ጌዳ ቃላዳን

ታ ሄመታ ሱርሳ፤

አይ ናጋራይነ ታና ሞዶፖ።

ታን ነ ዎጋዉ አዛዘታናዉ፥

ታና ኡቁኔዳዋንቱ ኩሽያፐ ዎዛ።

ታ ቦላ፥ ነ ቆማ ቦላ፥

ነ ሶምኡዋ ፖእሳ፤

ነ አዋዩዋካ ታማርሳ።

ነ ህግያዉ አሳይ አዛዘትቤና ድራዉ፥

ታ አይፍያፐ አፎይ ሻፋዳን ጎጌ።

ጻደ

አቤት መና ጎዳዉ፥ ኔን ጽሉዋ፤

ነ ፕርዳይካ ልከ።

ኔን ኦዴዳባይ

ጽሉዋነ ኡባ አማነትያዋ።

ታ ሞርከቱ ነ ቃላ ቶቼዳ ድራዉ፥

ነ ቃላ ምሹ ታ ጎምፓን ኤጽ ከሴዳ።

ኔን ጌዳ ቃላይ ዳሮፐ አማነትያዋ፤

ታን፥ ነ ቆማይ አ ሲቃይ።

ታን ጉነ ካቴዳ አሳ፤

ግዶፐነ፥ ታን ነ ዎጋ ዶግከ።

ነ ጽሎተይ መናዉ ደኤ፤

ነ ህጊካ ቱማ።

መቱነ ቱጋይ ታና ጋኬዳ፤

ሽን ነ አዛዞቱ ታና ናሸቺኖ።

ኔን ኦዴዳባይ መናዉካ ጽሉዋ፤

ታን ፓጻ ደአና ማላ፥ አኬካ ታዉ እማ።

ቆፍ

አቤት መና ጎዳዉ፥ ኩመን ዎዛናፐ፥

ነዉ ዋሳድ፤ ታዉ አላ።

ታንካ ነ አዋዩዋ አዛዘታና።

ታን ነዉ ዋሳድ፤ ታና አሻ፤

ታንካ ኔን ኦዴዳባ ኦና።

ጻልቂ ዶለና ጉራን ደንዳደ፥

“ታና ማዳ” ጋደ ነዉ ዋሳይ።

ኔን ታዉ ጌዳ ቃላን ህዶታ ኦይ።

ነ ቃላባ ዛራ ዛራደ ቆፓናዉ፥

ቃማ ኡታ አቃይ።

አቤት መና ጎዳዉ፥

አገና ነ ሲቁዋ ድራዉ፥ ታዋ ስሳ፤

ነ ጽሎ ፕርዳዳን ታና ፓጻ ዎ።

ኢታባዉ ታና የደርስያዋንቱ፥

ታኮ ማቴድኖ፤

ኡንቱንቱ ነ ህግያፐ ሃኪኖ።

ሽን አቤት መና ጎዳዉ፥

ኔን ታ ማታን ደኣሳ፤

ነ አዛዞቱ ኡባይካ ቱማ።

ታን በንፐ ዶማደ፥

ኔን ኦዴዳባ ታማራድ፤

አ ኔን መናዉ ምንሳ ኤሳዳ።

ሬሽ

ታ ቱጋ በኣደ፥ ታና አሻ፤

አያዉ ጎፐ፥ ታን ነ ህግያ ዶጋበይከ።

ታ ድራዉ ሞተታደ ታና ዎዛ፤

ኔን ጌዳ ቃላዳን ታና ፓጻ ዎ።

ነ አዋዩዋ ኡንቱንቱ አከና ድራዉ፥

አቶተይ ኢታቱዋፐ ሃኩዋን ደኤ።

አቤት መና ጎዳዉ፥ ነ ቃረታይ ዳራ፤

ነ ጽሎ ፕርዳዳን ታና ፓጻ ዎ።

ታ ሞርከቱነ ታና የደርስያዋንቱ ዳራ፤

ሽን ታን ኔን ኦዴዳዋፐ ሸርእ ጊከ።

ኡንቱንቱ ነ አዛዞቱዋ ናገና ድራዉ፥

ታን ካድያዋንታ በኣደ ሸነታድ።

አቤት መና ጎዳዉ፥

ታን ነ ዎጋ ሲቅያ ሲቁዋ ቆፓ፤

አገና ነ ሲቁዋዳን ታና ፓጻ ዎ።

ነ ቃላይ ኮይሮፐካ ቱማ፤

ነ ጽሎ ፕርዳይ ኡባይካ መናዉ ደኤ።

ሺን

ካፓቱ ታና ጮ የደርሲኖ፤

ሽን ታ ዎዛናይ ነ ቃላዉ ያዬ።

ዳሮባ ኦሞዴዳ አሳይ ናሸትያዋዳን፥

ኔን ጌዳ ቃላን ታን ናሸታይ።

ታን ዎርዱዋ እጻይነ ሸነታይ፤

ሽን ነ ህግያ ሲቃይ።

ነ ጽሎ ፕርዳ ድራዉ፥

ታን ኔና ጋላሳን ላፑ ገደ ጋላታይ።

ነ ህግያ ሲቅያዋንቶ

ኩመን ሳሮተይ ደኤ፤

ኡንቱንታ ኡባካ አያይነ ባናዉ ዳንዳየና።

አቤት መና ጎዳዉ፥ ታን

ነ አቶተ ሂዶታን ናጋይ፤

ነ አዛዞቱዋካ ኦይ።

ታን ኔን ኦዴዳባ ናጋይ፤

ታን ዳሮፐ አ ሲቃይ።

ታን ነ ዎጋዉነ

ኔን ኦዴዳዎ አዛዘታና፤

አያዉ ጎፐ፥ ታ ኦግያ ኡባ ኔን በኣሳ።

ታዉ

አቤት መና ጎዳዉ፥ ታ ዋሱ፥

ነ ስን ጋኮ፤

ኔን ጌዳ ቃላዳን ታዉ አኬካ እማ።

ታ ዋትዋቱ ነ ስን ጋኮ፤

ኔን ጌዳ ቃላዳን ታና አሻ።

ኔን ነ አዋዩዋ

ታና ታማርስያ ድራዉ፥

ታ ዶናፐ ጋላታይ ፑልታና።

ነ አዛዞቱ ኡባይ ጽሎ ግድያ ድራዉ፥

ታ እንጻርሳይ ነ ቃላባ የጻና።

ታን ነ ዎጋ ዶሬዳ ድራዉ፥

ነ ኩሺ ታና ማዳናዉ ጊጌዳዋ ግዶ።

አቤት መና ጎዳዉ፥ ኔን

ታና አሻና ማላ ላሞታይ፤

ነ ህጊካ ታና ናሸቼ።

ታን ኔና ጋላታና ማላ፥

ታና ፓጻ ዎ፤

ነ ፕርዳይካ ታና ማዶ።

ታን ባዬዳ ዶርሳዳን ብቻራይ፤

ታና ነ ቆማ ኮያ፤

አያዉ ጎፐ፥ ታን ነ አዛዙዋ ዶጋበይከ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.