Dawro Full Bible Ethiopic
ማዝሙርያ 116
ሀይቁዋፐ አቴዳ አሳ ጋላታ
እ ታ ኮሻነ ታ ዋትዋቱዋ ስሴዳ ድራዉ፥
ታን መና ጎዳ ሲቃይ።
እ ባረ ሀይ ታኮ የጌዳ ድራዉ፥
ታን ፓጻ ደኤዳ ኬናን ኡባን አ ጼሳና።
ሀይቁ ጲርያዳን ታና ኦይቃናዉ ሀኔዳ፤
ሞገታና ህርጋይ ታና ኢሴዳ።
ታና ኡንአይ ቶሌዳ።
ሄ ዎደ ታን፥ “አቤት መና ጎዳዉ፥ ሀዳራ!
ታና አሻ” ያጋደ መና ጎዳ ሱን ጼሳድ።
መና ጎዳይ ኬካነ ጽሉዋ፤
ኑ ጾሳይ ቃረትያዋ።
መና ጎዳይ አሽከ ዎዛናይ ደእያዋንታ ናጌ፤
ታን መቶቴዳ ዎደ፥ እ ታና አሼዳ።
ታ ሸምፓቴ፥ ስም ዎፑ ጋ፤
አያዉ ጎፐ፥ መና ጎዳይ ነዉ ኬኬዳ።
መና ጎዳይ ታና ሀይቁዋፐ፥
ታ አይፍያ አፎፐ፥
ታ ገድያካ ብያፐ አሼዳ።
ሄዋ ድራዉ፥ ታን፥
ፓጻ ደእያዋንቱ ግዶን፥
መና ጎዳ ስንን ሀመታይ።
ታን፥ “ታና ኡንአይ ቶሌዳ” ግያ ዎደካ፥1
ታ አማኑዋ አጋበይከ።
ታን ዳጋማደ፥ “አሳይ ኡባይ ዎርዱዋ” ያጋድ።
እ ታዉ ኬኬዳ ኬካተ ድራዉ፥
ታን መና ጎዳዉ አይ ጭጋናዉ ዳንዳያይታ?
ታን ጹኣ ዎይንያ ኤሳ ጋላታዉ ሺሻደ፥
እ ታና አሾ ድራዉ፥
መና ጎዳ ሱን ጼሳና።
አ አሳ ኡባ ስንን
ታን ቃንግያ መና ጎዳዉ ጋና።
ጌሻቱዋ ሀይቁ መና ጎዳ ስንን፥
ሎይ ዳሮፐ ቦንቼቴዳዋ።
አቤት መና ጎዳዉ፥ ታን ነ ቆማ፤
ኤ፥ ታን ነ ቆማ፥ ነ ቆማት ናኣ።
ታና ቃሹዋፐ ኔን ብላዳ።
አቤት መና ጎዳዉ፥
ታን ጋላታ ያርሹዋ ነዉ ያርሻና፤
ነ ሱን ጼሳና።
አሳ ኡባ ስንን፥
ታን ቃንገቴዳ ቃንገ መና ጎዳዉ ጋና።
ሄዋካ ታን ጋናዌ፥
የሩሳላመን ደእያ መና ጎዳ ጎልያ ዳባባና።
መና ጎዳ ጋላትተ!
Source notes (1)
- Cross-reference 2 ቆሮ. 4:13
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.