Dawro Full Bible Ethiopic
ማዝሙርያ 109
ሞርክያ ቦላ ሺቆ ዎሳ
ዛማረቱዋ ካፖ የጸቴዳ፥ ዳውት ጻፌዳ ማዛሙርያ
አቤት ታን ጋላትያ ጾሳዉ፥
ኔን ታዉ ጮኡ ጎፓ።
አያዉ ጎፐ፥ ኢታ ዎርዳንቻ አሳቱ፥
ባረንቱ ዶና ታ ቦላ ዶዬድኖ፤
ኡንቱንቱ ዎርዶ እንጻርሳን ታ ቦላ ሃሳዪኖ።
ኡንቱንቱ እጾ ቃላና ታና ዶዲኖ፤
ጋሱ ባይናን ታናና ኦለቲኖ።
ታን ኡንቱንታ ሲቃይነ ኡንቱንቶ ዎሳይ፤
ግዶፐካ፥ ኡንቱንቱ ታና ሞቲኖ።
ታን ሎኡዋ ኦና፥
ኡንቱንቱ ታዉ ኢታ ዛሪኖ፤
ታን ኡንቱንታ ሲቅና፥ ኡንቱንቱ ታና እጺኖ።
ታ ሞርክያ ቦላ ኢታ ዳና ሱን፤
ሞታንቻይ አ ኡሸቻን ኤቆ።
አ ብድያ ዎደ፥ እ ባይዛንቻ ግዲደ ቤቶ፤
አ ዎሳይካ አዉ ስሚደ ጎመቶ!
አ ላይይ ቃሞ፤1
አ ሱንተካ ሀራይ አኮ!
አ ናናቱ አዉዋ ዪደ ዪእኖ፤
አ ማቻታ አምኤ ግዱ!
አ ናናቱ ዩይ ዩዪደ ዎስኖ፤
ባረንቱ ደእያ ኦናፐካ የደርሰትኖ!
አ ማጹዋ ኡባ አጮ ኦይቆ፤
እ ዳቡሪደ ከሴዳባ ኡባ አላጋይ ቦንቆ!
ኦንነ አዉ ኬካባ ኦፖ፥
ዎይ አዉዋ ዬዳ አ ናናቶ ቃረቶፖ!
አ ናናቱ ኡባይ ዉር ይኖ፤
ካልያ የለታን አ ሱንይ ዶገቶ።
አ አዎቱዋ ናጋራይ መና ጎዳ ስንን ቆፈቶ፤
አ አት ናጋራይ ኡባካ ቁጨቶፖ!
ሄ ናጋራይ ኡባ ገደ መና ጎዳ ስንን ቤቶ፤
ኡንቱንታ ሀሳይስያዌ ሳኣፐ ቆለት ክቾ!
አያዉ ጎፐ፥ እ
ኬካባ ኦናዉ ኡባካ ቆፕቤና፤
ህዬሳቱዋ፥ መቶታንቻቱዋነ
ዎዛናይ ማዱጼዳዋንታ የደርሲደ ዎዳ።
እ ሸቃናዉ ዶሴዳ ድራዉ፥
እካ ሸቀቴዳዋ ግዶ!
እ አንጃናዉ ዶሰና ድራዉ፥
አንጁ አፐ ሃኮ!
እ ሸቂደ ሳለና፤
አ ሸቃይ ሃዳን አ ቦላ ካ!
ዛይትያዳን አ መቀን ገሎ!
አፍላዳን አ ካሞ፤
ሳቂያዳን ኡባ ገደ አ ጼሳን ደኦ!
ሀዌ ታና ሞትያዋንቶነ
ታና ኢታን ዝግርያዋንቶ፥
መና ጎዳይ እምያ ዎይቱዋ ግዶ!
ሽን አቤት ኡባ ሞድያ መና ጎዳዉ፥
ነ ሱን ድራዉ፥ ታና ማዳ።
አገና ነ ሲቁዋነ
ነ ኬካተ ድራዉ፥ ታና አሻ።
አያዉ ጎፐ፥ ታን
ህዬሳነ መቶታንቻ አሳ፤
ታ ዎዛናይካ ማዱንጼዳ።
ታን ኦማርሳ ኩዋዳን ያና ሀናይ፤
ታን ቦልያዳን ቆቆፈታይ።
ጾምሽን ታ ጉልባታይ እጼዳ፤
ታ ቦላይካ ላፌ።
ታና ሞትያዋንቶ ቅሊጭያዋ ግዳድ፤2
ኡንቱንቱ ታና በኢደ፥ ባረንቱ ሁጲያ ቃኖ።
አቤት መና ጎዳዉ ታ ጾሳዉ፥ ታና ማዳ፤
አገና ነ ሲቁዋዳን ታና አሻ።
አቤት መና ጎዳዉ፥ ሄዌ
ነ ኩሽያ ግዴዳዋነ
ሄዋ ኔን ኦዳዋ ታ ሞርከቱ ኤርኖ።
ኡንቱንቱ ታና ሸቆፐነ፥
ኔን ታና አንጃ!
ታ ቦላ ደንድያዋንቱ ዬላትኖ፤
ሽን ታና ነ ቆማ ናሸቻ።
ታና ሞትያዋንቱ ካዉሻ ማይኖ፤
ባረንቱ ዬላካ ኩታዳን ቁማይኖ።
ታን ታ እንጻርሳን መና ጎዳ ዳሮፐ ጋላታና፤
ዳሮ አሳይ ሺቄዳሳን አ ጋላታና።
አያዉ ጎፐ፥ እ ህዬሳ ድራዉ ሞተቴ፤
ሀይቆ ፕርድያ አሳፐካ አ አሼ።
Source notes (2)
- Cross-reference ኪታ 1:20
- Cross-reference ማቶሳ 27:39፤ ማር. 15:29
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.