ማርቆሳ ምሽራቹዋ 3

ኩሺ ስሌዳ ብታንያ

(ማቶሳ 12:9-14፤ ሉቃሳ 6:6-11)

1የሱስ አይሁዳ ዎሳ ጎልያ ሽረትካ ገሌዳ፤ ሄዋን ኩሺ ስሌዳ እት ብታኒ ደኤ። 2እት እት አሳይ የሱሳ ሞታናዉ ኮዪደ፥ ኩሺ ስሌዳ ብታንያ ሳምባታን እ ፓፐ በአናዉ ናጌ። 3የሱስ ሄ ኩሺ ስሌዳ ብታንያ፥ “ደንዳ ኤቃደ ስንዉ ሃያ” ያጌዳ። 4ሄዋፐ ጉይያን አሳ፥ “ሳምባታን ሎኦባ ኦያዌ ዎጌየ ኢታባ ኦያዌ ዎጌ? አሳ ሸምፑዋ አሽያዌ ዎጌየ ዎያዌ ዎጌ?” ያጊደ ኦቼዳ።

ሽን አሳይ ጮኡ ጌዳ። 5የሱስ ሀንቀቲደ፥ ኡንቱንታ ዩሽ አ ጼሊደ፥ ኡንቱንቱ ኦድና ስሰናዋንታ ግድያ ድራዉ፥ ኡንቱንቶ ዳሪ ካዮቴዳ፤ ሄ ብታንያ፥ “ነ ኩሽያ ፕድ ኦ” ያጌዳ፤ ብታኒ ፕድ ኦና፥ አ ኩሺ ፓጽ አጌዳ። 6ፓርሳዋቱ አይሁዳ ዎሳ ጎልያፐ ካረ ከሲደ፥ የሱሳ ዎት ዎነንቶ ሄሮድሳና ደእያዋንቱና ማቀቴድኖ።

አሳይ አባ ላንቂያን የሱሳኮ ሺቄድኖ

7የሱስ ባረና ካልያዋንቱና ጋሊላ አባ ቤዳ፤ ጋሊላፐ ጮራ አሳይ አ ካሌዳ። 8ቃይካ ጮራ አሳይ ይሁዳፐ፥ የሩሳላመፐ፥ ኤዶምያሳፐ፥ ዮርዳኖሳ ሻፋፐ ሄፍን ባጋፐ፥ ጺሮሳ ካታማፐነ ሲዶና ካታማፐ የሱስ ኦዳዋ ስሲደ፥ አኮ ዬዳ። 9የሱስ ጮራ አሳይ ባረና ሱግ ኡንኤና ማላ፥ ባረና ካልያዋንታ ዎንግርያ ባረዉ ጋምኤና ማላ አዛዜዳ። 10ዳሮ አሳ እ ፓዳ ድራዉ፥ ሀርግያ አሳይ ኡባይ አ ቦቻናዉ ሱገረቴ። 11ኢታ አያናይ ደእያ አሳቱካ አ በኤዳ ዎደ ኡባን አ ስንን ጉፋኒደ፥ ባረንቱ ቃላ ቁ ኦደ፥ “ኔን ጾሳ ናኣ ግድኪ!” ያጌድኖ።

12የሱስ ሄ ኢታ አያናቱ ባረባ አሳዉ ኦዲደ፥ ባረና ቆንጭያ ከሰና ማላ፥ ኡንቱንታ ምንሲደ አዛዜዳ።

የሱስ ባረ ኪትያዋንታ ዶሬዳ

(ማቶሳ 10:1-4፤ ሉቃሳ 6:12-16)

13የሱስ ደርያ ቦላ ከሲደ፥ ባረ ኮዬዳ አሳቱዋ ባረኮ ጼሴዳ፤ ሄዋፐ ጉየ አኮ ቤድኖ። 14-15ኡንቱንቱ ባረናና ደአና ማላነ ቃላ ኦዳናዉ ኡንቱንታ ኪታና ማላ፥ ኢታ አያናቱዋ አሳፐ ከሳናዉ ኡንቱንቶ ማታይ ደአና ማላ፥ ታማነ ላኡ አሳቱዋ ዶሬዳ።

16እ ዶሬዳ ታማነ ላአቱ ሀዋንታ: ጰጽሮሳ ያጊደ ሱንዳ ስሞና፥ 17ቦኣነርጌሳ ያጊደ ሱንዳ ዛብድዮሳ ናና ያቆባነ ያቆባ እሻ ዮሃንሳ። “ቦኣነርጌሳ” ግያዌ “ዎልቃማ አሳቱዋ” ግያዋ። 18እንድራሳነ ፕልጶሳ፥ ባርታላሞሳነ ማቶሳ፥ ቶማሳነ እልፕዮሳ ናኣ ያቆባ፥ ታዶሳነ ባረ ቢታዉ ሴለትያ ስሞና፥ 19የሱሳ አ እሜዳ ይሁዳ አስቆሮታ።1

የሱሳነ ብኤል-ዘቡላ

(ማቶሳ 12:22-32፤ ሉቃሳ 11:14-23፤ 12:10)

20የሱስ ሶይ ቤዳ፤ ላኤንዋካ ቃይ ጮራ አሳይ ሺቅና፥ እነ አ ካልያዋንቱና ሀራይ አቶ፥ ቁማ ማናዉካ ዳንዳይበይክኖ፤ 21አሳይ አ፥ “ጎዬ” ግያ ድራዉ፥ አ ዳባቱ ሄዋ ስሲደ፥ አ አካናዉ ቤድኖ።

22ህግያ ታማርስያ እት እት አሳቱ የሩሳላመፐ ዪደ፥ “የሱሳ ቦላ ብኤል-ዘቡል ደኤ” ያጌድኖ፤ ቃይ፥ “ጻላሀቱዋ ካፑ ባረዉ ዎልቃ እምና፥ ኢታ አያናቱዋ ከሴ” ያጊደ ሃሳዬድኖ።2

23የሱስ አሳ ባረኮ ጼሲደ፥ ሌምሱዋ ኦዲደ፥ “ሴጻናይ ሴጻና ዎት ከሳናዉ ዳንዳይ? 24እት ካዉተይ ባረ ግዶን ሻከቶፐ፥ ሄ ካዉተይ ኤቃናዉ ዳንዳየና፤ 25ቃይ እት ጎለ አሳይካ ባረ ግዶን ሻከቶፐ፥ ሄ ጎለ አሳይካ ኤቃናዉ ዳንዳየና። 26ሴጻናይ ባረናና ዋላቀቲደ ሻከቶፐ፥ ባያናፐ አትን፥ ደአና ዳንዳየና።

27“ሽን ዎልቃማ አሳ ጎለ ገሊደ ካሰቲደ አ ቃቼናን ደኢደ፥ አ ሚሻ ቦንቃናዉ ዳንዳይያ አሳይ ባዋ፤ ቃቼዳዋፐ ጉይያን፥ አ ጎልያ ቦንቃናዉ ዳንዳዬ።

28“ታን ህንተንቶ ቱሙዋ ጋይ፤ ጾሳይ አሳ ናናዉ ናጋራ ኡባነ ኡንቱንቱ ቦርያ ቦርያ3 ኡባ አቶ ጋና፤ 29ሽን ጌሻ አያና ቦላ ኢታ ቦርያ ሃሳይያ ኦስነ መናዉ ናጋራ ግዳናፐ አትን፥ ጾሳይ ኡባካ አቶ ጌና” ያጌዳ።4 30የሱስ ሄዋ ጌዳዌ፥ እት እት አሳቱ፥ “የሱሳ ቦላ ኢታ አያናይ ደኤ” ያጌዳ ድራሳ።

የሱሳ ዳዮነ እሻቱዋ

(ማቶሳ 12:46-50፤ ሉቃሳ 8:19-21)

31የሱሳ ዳያነ አ እሻቱ ዪደ፥ ካረን ኤቂ አኮ አሳ ኪቲደ፥ አ ጼስሴድኖ። 32ጮራ አሳይ አ ማታን ኡቴድኖ፤ ሄ ኪተቴዳዌ አ፥ “በአ፤ ነ ዳያነ ነ እሻቱ ካረን ኤቂደ፥ ኔናና ጋከታናዉ ኮዪኖ” ያጌዳ።

33የሱስ ዛሪደ፥ “ታ ዳያ ኦኔ? ቃይ ታ እሻቱ ኦኔ?” ያጌዳ። 34ባረ ማታን ኡቴዳ አሳ ዩሽ አ ጼሊደ፥ “በእተ፤ ታ ዳያነ ታ እሻቱ ሀዋንቱሽ። 35ጾሳይ ኮይያዋ ኦያ ኡባይ ታ እሻ፥ ታ ምቻቶነ ታ ዳዮ” ያጌዳ።