ኢስያሳ 63

ጾሳ ኦራ ማላልስያ መታ

(63:1—66:24)

አይሁዳ ግደና አሳቱዋ ጾሳይ ጾንያ ጾኑዋ

1ኤዶማ ጋድያን ደእያ ቦጽራ ግያ ካታማፐ ዞኦ ማዩዋ ማዪደ ይያዌ፥ ሄዌ እ ኦኔ? ሀ ፑላና ደእያ ማዩዋ ማዪደ፥ ባረ ዎልቃ ምኖተን ስንዉ ሀመትያዌ ኦኔ?1

ጾሳይ፥ “ሄዌ ጽሉዋ ሃሳይያዌነ ዎልቃን አሽያዌ ታና ግድክታ!” ያጌ።

2ዎይንያ ጉምኢያሳን ዎይንያ የያ ብታንያ ማዩዋዳን፥ ነ ማዩ አያዉ ዞኤዴ?

3ጾሳይ ሀዋዳን ያጊደ ዛራና፤ “ዎይንያ ጉምኢያሳ ታን ታረካ የድ፤ ካዉተቱዋፐ እት አሳይነ ታናና ባዋ። ታን ኡንቱንታ ታ ሀንቁዋን የድ፤ ታ ይሉዋንካ ኡንቱንታ ድርጸረድ። ኡንቱንቱ ሱይ ታ ማዩዋ ቦላን ጨትና፥ ታ ማዩ ኡባይ ባዬዳ።2 4ታን ታ አሳ ዎዝያ ጋላሳይነ ኡንቱንቱ ሞርከቶ ሀሉዋ ከስያ ላይይ ጋኬዳ። 5ታን ጼላድ፤ ሽን ታና ማድያ እት አሳይነ ቤትቤና። ማድያዌ ዬዳ ድራዉ፥ ታን ማላለታድ። ሄዋ ድራዉ፥ ታ ቀሲ ታዉ ጾኑዋ አሄዳ፤ ታ ሀንቁካ ታና ማዴዳ።3 6ታን ታ ሀንቁዋን ካዉተቱዋ የድ፤ ታ ይሉዋንካ ኡንቱንታ መንሬድ፤ ኡንቱንቱ ሱካ ታን ጋድያን ጉሳድ” ያጋና።

ጾሳይ እስራኤልያዉ ኬክያ ኬካ

7መና ጎዳይ ኑዉ ኦዳ ኦሱዋ ኡባ ድራዉ፥ መና ጎዳ አገና ሲቁዋነ አ ጋላታ ታን ኦዳና፤ ኤ፥ ባረ ማሮታንነ ባረ ኬካተ ዳሩዋን እስራኤልያ አሳዉ እ እሜዳ ጮራ ሎኦባ ታን ኦዳና። 8ጾሳይ ኦዲደ፥ “ኡንቱንቱ ቱሙ ታ አሳቱዋነ ታ ናናቱዋ ግድያ ድራዉ፥ ታና ጭማናዉ ኮይክኖ” ያጌዳ። ሄዋ ድራዉ፥ እ ኡንቱንታ አሽያዋ ግዴዳ። 9ኡንቱንቱ ዋይያ ኡባን እ ዋየቴዳ። አ ደኡሳ ኪታንቻይ ኡንቱንታ አሼዳ። እ ኡንቱንታ ባረ ሲቁዋንነ ባረ ማሮታን ዎዜዳ። ካሰ አዳ ዎደቱዋ ኡባን እ ኡንቱንታ ደንደ ቶኬዳ።

10ሽን ኡንቱንቱ ማካሌድኖ፤ አ ጌሻ አያናካ ካዮዬድኖ። ሄዋ ድራዉ፥ እ ስሚደ፥ ኡንቱንቶ ሞርከ ግዴዳ፤ ኡንቱንቱናካ ኦለቴዳ።

11ሄዋፐ ጉይያን አሳይ በንዋ፥ እ ባረ ቆማ ሙሴ ዎደ ኦዳዋ ሀሳዪደ፥ ሀዋዳን ያጌዳ፤ “ባረ ዉድያ ሄንንቻቱዋናካ ኡባ አባ ግዶና አደ ከሴዳዌ ሀቃን ደኢ? ቃይ ሄ ዎደ ባረ ጌሻ አያና ኡንቱንቱ ግዶን ዎዳዌ ሀእ ሀቃን ደኢ? 12ባረ ቦንቹዋ ቀስያ ዎልቃማ ዎልቃ ሙሴዉ ኡሸቻ ኩሽያ ግዳናዳን ኪቴዳዌ፥ ባረ መና ሀይ ከሳናዉ፥ ኡንቱንቱ ስንን ደእያ ሃ ሻኬዳዌ፥4 13ኡንቱንቱ ጪሙዋ ግዶና ፕንዳዌ ሀቃን ደኢ?” ያጌድኖ።

ባዙዋና አያ ፓራዳን፥ ኡንቱንቱ በትበይክኖ። 14ዎምባ ዱገ ዎያ መህያዳን፥ መና ጎዳ አያናይ ኡንቱንታ ሸምፕሴዳ። ሄዋዳን ኔን ነ ሱን ቦንችሳናዉ ነ አሳ ካለዳ።

ማሮታነ ማዱዋ ደማናዉ ዎስያ ዎሳ

15አቤት ጾሳዉ፥ ሳሉዋና ዱገ ጼላ፤ ኔን ደእያ ጌሻነ ቦንቾ ግዴዳ ሳፐ ኤለካ በአ። ኔን ምሸትያ ምሹነ ነ ዎልቃይ አኔ? ነ ዎዛናይ ኑና ላሞትያ ላሞታይነ ነ ቃረታይ ኑፐ ሃኬዳ። 16አብራሃመ ኑና ኤራና ዮፐካ፥ ያቆብ ኑና አኬከናን ዮፐካ፥ አቤት መና ጎዳዉ፥ ኔን ኑ አዉዋ። በን ዎደፐካ ዶሚደ፥ ነ ሱንይ ኑና ዎዝያዋ። 17አቤት መና ጎዳዉ፥ ኑን ነ ኦግያፐ ባያናዳን፥ አያዉ ኦዲ? ቃይ ኑን ነዉ ያየናዳን፥ ኑ ዎዛና አያዉ ሌፋያዴ? ጾሳዉ፥ ነ ቆማቱ ድራዉ፥ ነ ቢታ ላቴዳ ዛራቱዋ ድራዉ፥ ኑኮ ስማ። 18ነ ጌሻ አሳይ ነ ጌሻ ጎልያ ጉ ዎድያዉ ላቴድኖ፤ ሽን ኑ ሞርከቱ አ ዱገ ዛሪደ የድኖ። 19ኑን በንፐካ ነዋንታ፤ ኡንቱንታ ኔን ሞዳባካ፤ ኡንቱንቱ ነ ሱንን ጼሰትበይክኖ።