ኢስያሳ 61

አቶተ ምሽራቹዋ

1ኡባ ሞድያ መና ጎዳ አያናይ ታ ቦላን ደኤ፤12 አያዉ ጎፐ፥ ቆሄቴዳዋንቶ ሎኦ ምሽራቹዋ ኦዳና ማላ፥ ጾሳይ ታና ኦኬዳ። እ ታና ዎዛናይ መኤዳዋንቶ ኮለትያዋነ ኦሞደቴዳዋንቶ ኦሞዱዋፐ ከስያዋ አዋያና ማላነ ቃሸቴዳዋንቶ ብለ አዋያና ማላ ኪቴዳ። 2መና ጎዳይ ዶሬዳ ላይነ ኑ ጾሳይ ሀሉዋ ከስያ ጋላሳ አዋያና ማላነ ካዮትያዋንታ ኡባቱዋ ምንና ማላ፥ ታና ኪቴዳ።3 3ሄዋዳንካ ቃይ፥ ጽዮነን ካዮትያዋንቶ፥ ብድን ድራዉ ካላቻ፥ ካዩ ድራዉ ናሸቻ ዛይትያ፥ ላባና አያና ድራዉ ጋላታ ቁማዩዋ እማና ማላ፥ ታና ኪቴዳ። ኡንቱንቱ መና ጎዳይ ባረ ቦንቾ ቶኬዳ ጽሎ ም ጌተቲደ ጼሰታና።

4ኡንቱንቱ በን ኮለቴዳዋንታ ዛረደ ኬጻና፤ በን ኩንዴዳዋንታካ ዛረደ ኤሳና። ኡንቱንቱ ኦኔዳዋንታነ ዳሮ የለታፐ ካሰ ኮለቴዳ ካታማቱዋ ዛረደ ኬጻና። 5አላጋ ቢታ አሳቱ ህንተ ዶርሳ ዉድያ ሄማና፤ እማቱካ ህንተ ጋድያ ጎሻናነ ህንተ ዎይንያ ቱራ ናግያዋንታ ግዳና። 6ህንተ ቃይ፥ “መና ጎዳ ቄሳቱ ዋ” ጌተቲደ ጼሰታና፤ አሳይካ ህንተና፥ “ኑ ጾሳ ኦሳንቻቱዋ” ያጊደ ጼሳና። ህንተ ካዉተቱዋ ዱረተ ማና፤ ኡንቱንቱ ዱረተንካ ህንተ ጬቀታና።

7ህንተ ዬላ ድራዉ ህንተ ላኡ ኩሽያ ሳማ አካና፤ ካዉሼዳዋ ድራዉካ ህንተ ካጫን ህንተ ናሸታና። ሄዋ ድራዉ፥ ህንተ ህንተ ጋድያን ላኡ ዳኩዋ ላታና፤ ህንተ ናሸቻይካ መና ናሸቻ ግዳናዋ።

8ጾሳይ ሀዋዳን ያጌ፤ “ታን መና ጎዳይ ሱረ ፕርዳ ዶሳይ፤ ቦንቂያነ ባይዙዋ እጻይ። ታን አማነታደ፥ ኡንቱንቱ ኦሱዋ ጋትያ ኡንቱንቶ ጭጋና። ታን ኡንቱንቱና መና ጫቁዋ ጫቀታና። 9ኡንቱንቱ ዛራቱ ካዉተቱዋ ግዶን፥ ኡንቱንቱ ናናይካ ጋደ አሳቱዋ ግዶን ኤረታና፤ ኡንቱንታ በኤዳ ኡባይ ታን፥ መና ጎዳይ አንጄዳ አሳቱዋ ኡንቱንቱ ግድያዋ ጌሺደ ኤራና” ያጌ።

10ታን መና ጎዳን ሎይ ናሸታይ፤ ታ ሸምፑካ ታ ጾሳን ሀሹ ጌ።4 አያዉ ጎፐ፥ ቡላችያዌ ባረ ሁጲያን ቄሲ ሻሽያ ዎያዋዳን፥ ቡላቼትያናካ ዱማ ዱማ አሌቁዋን አሌቀትያዋዳን፥ እ ታና አቶተ ማዩዋ ማይዜዳ፤ ጽሎተ ቁማዩዋካ ቦላና ታዉ ጉጄዳ። 11ቢታይ ጫርሻ ሞክያዋዳንነ አታክልትያ ሳአይካ ቶኬዳዋ ድችያዋዳን፥ ሄዋዳንካ፥ ኡባ ሞድያ መና ጎዳይ ጽሎተነ ጋላታ ካዉተ ኡባ ስንን ፑልትሳና።